Esodro 14:1-31
14 Öni Iehova jë hi koi Mose ka hape:
2 “Qaja jë kowe la angetre Isaraela troa bëek me lapa qëmekene Pihahiroth, akawane Migedola memine la hnagejë, hmekun e Baalazefona. Tro epuni a lapa e cili qëmekene la hnagejë.
3 Nge tro hë Farao a qaja göne la angetre Isaraela ka hape, ‘Tro menu hë angatr ngöne la nöj, ase hë thingi jë i angatr hnene la hnapapa.’
4 Tro ni a axetine la hni Farao, nge tro hë angeic a weji angatr. Nge troa atrunyi ni jëne Farao, me trongene isi angeic asë. Nge tro angetre Aigupito a atre ka hape, Iehova ni.” Celë hi hnei angatr hna kuca.
5 E thupen, hna thuemacane la joxu ne Aigupito laka, kötre hë la nöj. Ame hnei Farao me itre hlue i angeic hna saze mekun göne la nöj, matre öni angatr: “Hnauëne laka, easa kuca tune la? Easë a nue fë nemene la itre hlue së, lo angetre Isaraela?”
6 Nge hnei angeic hna iupe troa hnëkëne la itre ikatre i angeic, me ce tro me itre sooce i angeic.
7 Nge hnei Farao hna xome la 600 lao ikatr ne isi, me nöjei ikatr asë ne Aigupito, me itre sooc ka troa tith itre ej.
8 Qa ngöne lai, hnei Iehova hna axetine la hni Farao joxu ne Aigupito. Nge hnei Farao hna weje la angetre Isaraela, nge pëkö xou* i angatr la angatr a tro qa Aigupito.
9 Angetre Aigupito a weji angatre jë. Nge hnene la nöjei ikatre i Farao, me itre ka ti ikatr, memine la trongene isi angeic hna traqa koi angatr, nge angatre pe a lapa ezine la hnagejë hmekune Pihahiroth, qëmekene Baalazefona.
10 Ame hë la Farao a easenyi angatr, hnene la angetre Isaraela hna gala me goeëne la kola weji angatr hnene la angetre Aigupito. Ame hnei angatr hna xou me hë Iehova.
11 Öni angatre jë hi koi Mose: “Pëkö hua e Aigupito matre tro eö a tro sai hun troa meci e celë ngöne la hnapapa? Hnauëne laka, lö sai eahuni pi hnei eö qa Aigupito?
12 Tha hnei eahuni kö lo hna qaja koi eö e Aigupito ka hape, ‘Nue huni pi troa nyihluene la angetre Aigupito’? Ke loi ju kö la tro huni a nyihluene la angetre Aigupito, hune la troa meci ngöne la hnapapa.”
13 Matre öni Mose kowe la nöj: “The xou kö, cile catre ju, nge goeëne jë la iamele qaathei Iehova, ene la nyine tro nyidrëti a kuca koi epun enehila. Ke ame la angetre Aigupito hnei epuni hna goeën enehila, tha tro hmaca kö epun a öhnyi angatr.
14 Iehova kö la ka troa isi thatraqai epun, nge ame epun, tro epuni a lapa thaup.”
15 Öni Iehova jë hi koi Mose: “Hnauëne laka, eö pala hi a hë ni? Qaja jë kowe la angetre Isaraela ka hape, mejë jë.
16 Nge ame eö, adraiëne jë la sine tö i eö, nge line pi la ime i eö hune la hnagejë, nge thawaluëne pi, matre tro la angetre Isaraela a tro ngöne la gaa weliwel nyipine la hnagejë.
17 Nge ame ni, tro ni a nue matre xet la hni ne la angetre Aigupito, matre tro angatr a weji angetre Isaraela, nge tro hë ni a atrunyi ni jëne Farao, me trongene isi i angeic asë, me itre ikatr, me itre ka ti ikatr.
18 Nge tro hë la angetre Aigupito a atre laka, Iehova ni, ke tro ni a atrunyi ni jëne Farao, me itre ikatr, me angetre tith.”
19 Nge hnene la angela ne la nyipi Akötresie ka wejemekene la angetre Isaraela, hna tro hutrö i angatr. Nge hnene la iaw ka cile meköt qëmeke i angatr, hna tro me cile pena hutrö i angatr.
20 Nge ej a cil nyipine la lapa i angetre Aigupito, me lapa i angetre Isaraela. Ngöne la ketre götran, ej a iaw ka mit, nge ngöne la ketre götran, ej a thina ngöne la jidr. Qa ngöne lai, thatreine kö la ketre lapa troa easenyine la ketre ngöne la jidri ka pexej.
21 Nge hnei Mose hna li ime hune la hnagejë, nge ngöne la jidri ka pexej, hnei Iehova hna ufe la hnagejë hnene la enyi ka catr qa koië, matre weliwele pi la trepene lai hnagejë, ame hna thawaluëne pi la tim.
22 Ame hna tro pi la angetre Isaraela nyipine la hnagejë, hune la gaa weliwel. Nge kola isa cile la lue götrane gejë kösë lue hag, cas ngöne la götrane maca, nge cas ngöne la götrane mi angatr.
23 Ame hnei angetre Aigupito hna weji angatr, me uti thenge angatr e kuhu hnagejë, itre hos i Farao asë, me itre ikatre i angeic, me itre ka tith.
24 Thupene la pane xötre hawa ne la hmakany,* hnei Iehova hna goeëne la lapa i angetre Aigupito qa hnine la eë ka cile meköt, me iaw ka cile meköt, nge nyidrëti a amenune pi la angetre Aigupito.
25 Nge hnei nyidrëti hna feje trije la itre wil ne la itre ikatre i angatr, matre jole hë koi angatr troa xomiujin. Nge hnene la angetre Aigupito hna qaja ka hape: “Ikötrenyi jë, the easenyine kö la angetre Isarael, ke Iehova a lepi Aigupito troa isigöli angatr.”
26 Matre öni Iehova koi Mose: “Li ime pi hune la hnagejë, matre troa kacatrane la angetre Aigupito, me itre ikatre i angatr, me itre ka tith.”
27 Nge hnei Mose hna canga li ime hune la hnagejë. Nge ame hë la kola kaqa ne lai, bëeke hmaca jë hi la hnagejë kowe la göhnen ej, nge kola ikötrenyi la angetre Aigupito, ame hnei Iehova hna apatrenyi angatr ngöne la hnagejë.
28 Nge kaca hmaca pi la hnagejë me hetin la itre ikatr, me itre ka tith, me trongene isi i Farao asë, lo itre ka uti thenge angetre Isaraela nyipine la hnagejë. Nge pëkö ca ka mel e angatr.
29 Ngo hnene la angetre Isaraela hna tro hune la gaa weliwel, me gaa catr nyipine la hnagejë. Nge itre tim a nyi lue götrane gejë kösë lue hag, cas ngöne la götrane maca, nge cas ngöne la götrane mi angatr.
30 Ngöne la drai cili, hnei Iehova hna amelene la angetre Isaraela qa ngöne la ime i angetre Aigupito. Nge Isaraela a goeëne la angetre Aigupito ka mec ngöne la zanehngala.
31 Nge hnene fe la nöje Isaraela hna öhne la men* atraqatr i Iehova, jëne la ka traqa kowe la angetre Aigupito, matre hnene la nöj hna xoue Iehova, me lapaune koi Iehova, me koi Mose hlue i nyidrë.
Itre mekun ecahu fen
^ Heb., “ime hna xejë draiën.”
^ Kola hape, qaane 2h uti hë 6 h.
^ Heb., “wanakoim.”
