Esodro 17:1-16
17 Hnene la nöje Isaraela asë hna tro qa ngöne la hnapapa ne Sina, me mano trootro thenge la hna amekötin hnei Iehova. Matre angatr a acili itate ju e Refidima. Ngo pëkö tim nyine iji kowe la nöj.
2 Ame hnene la nöj hna nyiqaane wesitrë Mose me hape: “Thue ime i eahuni jë tim!” Ngo öni Mose: “Hnauëne laka, epuni a wesitrë ni? Hnauëne la epuni pala hi a tupathi Iehova?”
3 Ngo meci hë la nöj hnei pi ij, matre hnei angatr hna eetr koi Mose, me hape: “Hnauëne la eö a tro sai huni qa Aigupito? Hnauëne la eö a nue huni troa meci hnei pi ij, eahun, me itre nekö hun, me itre öni hun?”
4 Thupene lai, hnei Mose hna xëwe koi Iehova me hape: “Nemene la nyine tro ni a kuca memine la nöje ce? Easenyi hë matre tranyi ni jë hnei etë!”
5 Ame hnei Iehova hna qaja koi Mose ka hape: “Tro jë eö qëmekene la nöj, nge thenge jë fe la itre xa qatr ne Isaraela, nge xome jë fe la sine tö, lo hnei eö hna xom troa lepe la Nil. Xome trongëne jë, nge tro jë hë.
6 Tro ni a cil qëmeke i eö, e cili hune la ietë e Horeba. Tro hë eö a lepe lai ietë, nge tro ha neni la tim qa ngön, nge tro hë la nöj a ij.” Celë hi hnei Mose hna kuca qëmekene la itre qatr ne Isaraela.
7 Nge hnei angeic hna ati ëjene la götrane cili, Masa* me Meriba,* ke hnei angetre Isaraela hna wesitrë angeic, nge hnei angatr hna tupathi Iehova me hape: “Iehova kö the së maine waea?”
8 Thupene lai, hnei angetre Amaleka hna traqa troa isi me Isaraela e Refidima.
9 Matre öni Mose koi Iosua: “Iëne jë la itre trahmany, nge tro jë troa isi me angetre Amaleka. Elany, tro ni a cil hune la sasala, me cila xome la sine tö ne la nyipi Akötresie.”
10 Nge hnei Iosua hna kuca thenge la hna qaja hnei Mose, nge angeic a isi jë me angetre Amaleka. Nge hnei Mose, me Arona me Huro, hna elë hune la sasala.
11 Ame la Mose a adraiëne la lue ime i angeic, angetre Isaraela a ngaane la angetre Amaleka. Ngo e kei hë la lue ime i angeic, hune hë la angetre Amaleka.
12 Ngo ame hë la kola genyi la lue ime i Mose, hnei Arona me Huro hna xome la ketre etë, me amë fei angeic. Ame hnei Mose hna lapa hun ej, nge nyidroti a isa cila xome la lue ime i Mose, matre cile catr uti hë la kola lö la jö.
13 Nge hnei Iosua hna ngaane la angetre Amaleka me itre sine xöle i angatr memine la taua.
14 Iehova a qaja jë koi Mose ka hape: “Cinyianyine jë ngöne itus, matre tro pala hi sa mekun,* nge qaja hmaca ju koi Iosua ka hape, ‘Tro ni a apatrenyi angetre Amaleka qa la fene hnengödrai, nge tha tro hmaca kö a hane meku angatr.’”
15 Ame hnei Mose hna xupe la ketre ita ne huuj, me ati ëjen ej, Iehovanisi.
16 Nge öni angeic: “Pine laka, itre ime i angetre Amaleka a cile kowe la therone i Iehova, tro Iehova a isi me angatr ngöne la nöjei xötr atr i angatr.”
Itre mekun ecahu fen
^ Kola hape, “jol”, “itupath.”
^ Kola hape, “iwesitrë.”
^ Maine, “nyine amekunën.”
