Esodro 5:1-23
5 Thupene lai, hnei Mose me Arona hna lö koi Farao me hape: “Hane hi la hna qaja hnei Iehova Akötresi Isaraela, ‘nue pi la nöjeng, matre tro angatr a atrunyi ni ngöne la hnapapa.’”
2 Ngo öni Farao: “Ke drei lae Iehova matre tro ni a dreng, me nue Isaraela? Thatre Iehova kö ni, nge tha tro kö ni a nue Isaraela.”
3 Ngo öni nyidro: “Hnene la Akötresi angetre Heberu hna ithanata koi nyio, matre pane nue huni pi troa tro kowe la hnapapa, a köni drai ne tro, matre troa tro fë huuj koi Iehova Akötresi hun. Wanga tro nyidrëti a lepi huni hnei mec, maine humuthi huni hnei taua.”
4 Nge önine la joxu ne Aigupito ka hape: “Mose me Arona, hnauën la epon a ajolëne la nöj troa huliwa? Bëeke hmaca jë troa huliwa!”*
5 Nge öni Farao hmaca jë: “Öhne hi epon lai, nöje* ka ala nyimu catre la nöje cili, nge ame la mekuna i epon, tro angatr a mano hna huliwa?”
6 Ngöne la drai cili, hnei Farao hna upe la itre tane huliwa, me itre tane ka co ka hape:
7 “The hamëne hmaca kö la itre jez kowe la nöj matre xupi etë dro, ngo tro pe angatr a isa fej.
8 Nge qanyi epun troa upi angatr troa kuca la itre etë dro tun ekö. The acone kö la etrun, ke angatr a geny. Matre angatr a treij ka hape: ‘Nue eahuni pi troa tro, ke eahuni a ajan troa huuj kowe la Akötresi hun!’
9 Ahacene jë la huliwa i angatr, nge the mano kö thue huliwa i angatr, matre pëkö ijine i angatr troa drenge la itre trengathoi.”
10 Ame hnene la itre tane huliwa, me itre tane ka co, hna tro kowe la nöj troa qaja ka hape: “Hane hi la hna qaja hnei Farao, ‘Tha tro hmaca kö ni a thue jezi epun.
11 Tro jë epuni a isa thele jez, ngo tha tro kö a acone la etrune la itre etë dro.’”
12 Ame hnene la nöj hna isa ije ngöne la Aigupito asë, troa feke haö* nyine nyihnane la jez.
13 Nge itre tane huliwa a catrë angatre pala hi me hape: “Qaan enehila, casi pala hi la etrune la itre etë dro nyine tro epuni a kuca, tune lo kola thue jezi epun.”
14 Nge hnene la itre tane huliwa i Farao hna lepe la itre tane ka co, lo hnei angatre hna acil kowe la angetre Isaraela, öni angatr: “Hnauëne laka, tha eatrëne kö epuni lo etrune la itre etë dro lo hnei epuni hna majemine kuca? Celë hi ka traqa eidri lo me enehila.”
15 Ame hnene la itre tane ka co ne la angetre Isaraela hna lö koi Farao, me eetr me hape: “Hnauëne la nyipëti a ujë tune lai kowe la itre hlue i nyipë?
16 Pëhë jez hna traqa fë koi hun, ngo kolo pala hi a upi huni ka hape, ’xupe jë la itre etë dro, nge kola lepi hun, ngo zöne pe la nöje i nyipë.”
17 Ngo öni nyidrë: “Epuni ha geny, genyi hë epun. Matre öni epun, ‘Eahuni a ajane troa tro me huuje koi Iehova.’
18 Enehila, tro hmaca jë epun troa huliwa! Tha tro kö a thue jezi epun, ngo casi pala hi la etrune la itre etë dro hnei epuni hna troa kuca.”
19 Nge atre hë la itre tane ka co ne la angetre Isaraela laka, jole hë angatr, ke ase hë amekötine koi angatre ka hape: “Tha tro kö epuni a acone la etrune la itre etë dro nyine troa kuca e nöjei drai.”
20 Nge ame hë la angatr a tro qaathei Farao, ixelë ju hi angatr me Mose me Arona, nyidroti a treqe angatr.
21 Nge canga öni angatre jë hi: “Qanyi Iehova kö goeëne la hnei epone hna kuca me amekötin koi epon, ke zö i epon matre kola methinë* huni hnei Farao me itre hlue i nyidrë. Nge hnei epon hna hamë taua kowe la ime i angatr, matre humuthi hun.”
22 Ame hnei Mose hna hë Iehova me hape: “Iehova fe, hnauëne la nyipëti a akötrëne la nöje ce? Hnauëne laka, upi ni jë hnei nyipë a tro ce?
23 Qaane lo drai ne eni a lö koi Farao troa ithanata ngöne la ëje i nyipë, hnei angeic hna akötrëne catrëne la nöj. Nge tha amelene kö nyipëti la nöje i nyipë.”
Itre mekun ecahu fen
^ Maine, “huliwa ka hace.”
^ Heb., “atrene la nöj.”
^ Kolo munëne la itre ngöne feja hna nue pe hnine la itre hlapa.
^ Maine, “ke hnei epon hna kuca matre pui ngazo jë huni qëmeke i Farao me itre hlue i nyidrë.”
