Ezekiela 1:1-28
1 Ame ngöne la hna 30 ne macatre, ngöne la drai 5 ne la hna 4 ne treu, lo eni a lapa nyipine la itre hna kötre fë ezine la hneopegejë Kebara, hna fe la hnengödrai nge hnenge hna nyiqaane meköle goeëne la itre ewekë qaathei Akötresie.
2 Ame ngöne la drai 5 ne la treu (ene la hna 5 ne macatre ne kötre sai Iehoiakin joxu),
3 ezine la hneopegejë Kebara ngöne la nöje i angetre Kaledaia, hnei Iehova hna ewekë koi ni Ezekiela,* nekö i Buzi lo atre huuj. Nge e cili hi la kola huliwa* theng la mene i Iehova.
4 Eni pala kö a goeën, nge öhne ju hi ni la ketre enyi ka catr qa kolopi, nge hetrenyi fe la ketre iaw atraqatr, me eë ka xulu qa ngön;* nge kola hudrume la lai xötreith. Nge nyipine la eë, hetre ketre ewekë ka ceitu me gool ka wië.*
5 Ngöne la eë, hetre ketre ewekë ka ceitu me 4 lao ewekë ka mel; ceitu i angatr me itre atr.
6 Nge isa 4 lao iqëmeke i angatr me 4 lao iap.
7 Ka cile meköti la itre waca i angatr, kösë waca ne neköi kau. Itre ej a melemel tune la kopa hna xöl.
8 Fene la 4 lao iape i angatr, hetre iwanakoime i atr. Nge isa 4 lao iqëmeke i angatr, me 4 lao iap.
9 Ame la itre iape i angatr, ke kola iketr. Tha ka hane kö angatre xei la angatr a tro; angatr a isa tro meköt qëmekei angatr.
10 Hane hi la pengöne la itre iqëmeke i angatr: isa hetrenyi angatr la iqëmeke ne atr, me iqëmeke ne liona ngöne la götrane maca, me iqëmeke ne kau ngöne la götrane mi, me iqëmeke ne aeto.
11 Celë hi pengöne la itre iqëmeke i angatr. Angatr a isa xejë draië la lue iape i angatr ka iketr e koho, nge lue xan ka heetrëne la ngönetrei i angatr.
12 Angatr a isa tro meköt qëmekei angatr; angatr a tro thenge la hna amekötin hnene la ua. Tha ka hane kö angatre xei la angatr a tro.
13 Nge ceitui angatr me itre wanalep ka mel. Nge hetre ketre ewekë ka tune la uke jina ka mele catr, ka tro me bëek nyipi angatr, nge kola xulu qa ngön la itre samek.
14 Ame la angatr a tro me bëek, ke kösë itre samek.
15 Eni pala kö a goeë angatr, nge mama pi hi la ketre iwil hune la ihnadro, ezine la 4 lao angela ka 4 lao iqëmek.
16 Ame asë hi la itre wil, ke ka melemel tune la etë berulo; ceitun asë hi la 4 lao wil. Nge ame göne la pengön me aqane kuca lai wil, ke kösë hetre wil hnine la ketre iwil.*
17 Matre ame la itre wil a nyinyap, tha nyipiewekë kö troa jea, ke itre ej asë hi a nyapën la nöjei götran.
18 Nyine haine la edraiëne la itre wil, nge ka tiqa hnei alamek hun itre ej.
19 Ame la itre angela a tro, ke kolo fe a nyenyape la itre wil. Nge ame la itre angela a sesë qa ngöne la ihnadro, ke kolo fe a mejë la itre wil.
20 Angatr a tro kowe la hna upi angatr hnene la ua, ngöne la nöjei götran hna tro kow hnene la ua. Itre wil a xötrethenge angatr, ke casi hi la ua ka huliwa thene la itre angela me itre wil.
21 Ame la itre angela a tro, ke kolo fe a nyenyape la itre wil, nge ame la angatr a cil, ke kolo fe a cile la itre wil; nge ame la angatr a sesë draië, itre wile fe a ixötrethenge, ke casi hi la ua ka huliwa thene la itre angela me itre wil.
22 Nge hune la he ne la itre angela, hetre ewekë hna seluth nge ka melemel tune la kristal nge ka ketre pengön. Hna seluth ej hune la itre he i angatr.
23 Fene la ewekë cili, kola cile meköt* me ifedrekeu la itre iape i angatr. Isa hetre lue iape i angatr troa heetrën la ketre götrane ngönetrei, nge lue xan nyine heetrëne la ketre.
24 Ame hnenge hna dreng la mejene la itre iape i angatr: kösë mejene tim ka enienij, lo mejene la Ka Tru Trenge Men. Ame la itre angela a tro, ke kösë mejene la ketre trongene isi. Nge ame la angatr a cil, ke angatre hmaca a sa la itre iape i angatr.
25 Ame hna dreng la ketre nin qa hune la ewekë hna seluth, hune la itre he i angatr. (Ame la angatr a cil, ke angatre hmaca a sa la itre iape i angatr.)
26 Nge ame hune la ewekë hna seluth hune la itre he i angatr, ke hetre ewekë ka tune la etë safairo, nge ka ceitu me theron. Nge kola lapane la theron hnene la ketre ewekë ka ceitu me atr.
27 Qane la gö i nyidrë a tro draië, hnenge hna öhn la ketre ewekë ka melemel tune la gool ka wië,* nge ka ceitu me eë ka mele catr; nge qane la gö i nyidrë a tro ipië, hnenge hna öhn la ketre ewekë ka ceitu me eë. Nge kola hudrum xötreithi nyidrë
28 tune la lewen hnine la iaw e ijine mani. Celë hi pengöne la lai ka hudrum xötreithi nyidrë. Ej a tune la elolo i Iehova, matre ame la eni a öhn ej, hnenge hna kei qe ipië e kuhu hnadro. Nge drenge ju hi ni la nin ne la ketre atr ka ewekë.
Itre mekun ecahu fen
^ Kola hape, “Akötresie a aegöcatren.”
^ Heb., “traqa la ime i Iehova.”
^ Maine, “itre samek.”
^ Ketre ewekë hna kuca hnei sileva me gool, nge ka melemel.
^ Casi hi la etrune la itre wil.
^ Maine jë, “seluth.”
^ Ketre ewekë hna kuca hnei sileva hna ithuenyikön me gool, nge ka melemel.
