Ezekiela 13:1-23
13 Hnei Iehova hmaca hna ithanata koi ni, me hape:
2 “Nekö i atr, perofetane jë la akötr ka troa traqa kowe la itre perofeta e Isaraela, nge qa i ö troa qaja kowe la itre ka perofetane* thoin la hna meköle goeën ka hape: ‘Drenge ju la hna qaja hnei Iehova.
3 Hane hi la hna qaja hnei Iehova Joxu Ka Sisitria: “Ekölöhini la itre perofeta ka kei thenge la itre sipu mekuna i angatr, ngo pë pe hnei angatre hna öhn!
4 Isaraela fe, ceitune hi la itre perofeta i ö me itre kuli wael ka tro nyipine la itre tra etë!
5 Hetre gaa xulu ngöne la ihag etë, ngo tha tro kö epuni a pelethe hmaca, matre xatuane la nöje Isaraela troa cile catr ngöne la drai ne isi i Iehova.”
6 “Hnei angatr hna öhne la itre hna meköle goeëne ka iaö me perofetane la thoi, me hape: ‘Hane hi la hna qaja hnei Iehova,’ ngo tha Iehova kö la ka upi angatr. Ame pe, angatr a lapa treqen troa eatr la itre trengathoi i angatr.
7 Hapeu, tha ka iaö kö la hnei epuni hna meköle goeën, nge tha itre trengathoi kö la hnei epuni hna perofetan, lo epuni a hape: ‘Hane hi la hna qaja hnei Iehova,’ ngo tha qaathenge pe?”’
8 “‘Hane hi la hna qaja hnei Iehova Joxu Ka Sisitria: “‘Pine laka, ka iaö la itre trengewekë i epun, nge ka thoi la itre hnei epun hna meköle goeën, tro hë ni a ujë koi epun,’ öni Iehova Joxu Ka Sisitria.”
9 Ase hë ni xejë la imeng troa lep la itre perofeta ka meköle goeëne la iaö me ka perofeta thoi. Tha tro kö angatr a itre nyipi sineeng, tha tro kö a mama la ëje i angatr ngöne la tusi ne la itre atrene Isaraela, nge tha tro hmaca kö angatr a bëeke kowe la nöje Isaraela. Tro hë epuni a atre laka, Iehova ni Joxu Ka Sisitria.
10 Hnauëne laka, troa traqa la itre ewekë cili? Ke hnei angatr hna amenun la nöjeng, me hape: “Tingetinge hë!” ngo pë pe tingeting. Hetre atr ka acili ngöne uma ka tha catre kö, nge angatr a pele haone ju.*’
11 “Hape jë kowe la itre ka pele haon ej ka hape, tro ej a kei. Tro ha hlupi lai mani, me mala la itre wene mani ka catr,* nge tro ha akein ej hnene la itre enyi ka catr.
12 Nge e kei hë la ngöne uma, tro pena a hnyingë epun ka hape: ‘Tune kaa pë hë lo hna pele haon?’
13 “Matre hane hi la hna qaja hnei Iehova Joxu Ka Sisitria: ‘Ngöne la trengehning, tro ni a axulune la itre enyi ka catr. Ngöne la elëhning, tro ni a atrotrone la mani ka tru. Nge ngöne la trenge wesitreng, tro ni a amalane la itre wene mani ka catr.
14 Tro ni a thë la ngöne uma hnei epuni hna pele haon, me akein ej matre lapaxöxö pi la trepen. Nge e troa thapa la traon, tro hë epuni a meci e cili. Nge tro hë epuni a atre laka, Iehova ni.’
15 “‘Ame hë la eni a ase neng la elëhning kowe la ngöne uma me itre ka pele haon ej, tro hë ni a qaja koi epun ka hape: “Patre hë la ngöne uma me itre ka pele haon.
16 Patre hë lo itre perofeta ne Isaraela, lo itre ka perofetan göi Ierusalema, nge ka meköle goeën la tingeting kowe ej, ngacama pëkö tingeting,”’ öni Iehova Joxu Ka Sisitria.
17 “Ngo ame kö eö nekö i atr, ujë jë kowe la itre jajinyi ne la nöje i ö, lo itre ka perofetane la itre sipu mekuna i angatr, me itre akötr hnei angatr hna troa melën.
18 Hape jë: ‘Hane hi la hna qaja hnei Iehova Joxu Ka Sisitria: “Ekölöhini la itre föe ka cai leis nyine otrene im,* me itre isol thatraqane la nöjei pengöne he, nyine tra thethine la itre atr! Ame la mekuna i epun, ke tro epuni a tra thethine la itre atrene la nöjeng, me thupën la mele i epun?
19 Tro kö epuni a adronyi ni nyipine la nöjeng pine la wamine bali me itre sine falawa? Epuni a qeje trengathoi kowe la nöjeng, nge angatr a drei epun. Epuni hi lai a humuthe la itre atr tha nyine tro kö a humuth, me nuamelen la itre atr tha nyine tro kö a amelen!”’
20 “Matre hane hi la hna qaja hnei Iehova Joxu Ka Sisitria: ‘Itre föe, tro ni a lepi epun pine la itre leis hnei epuni hna kuca nyine tra thethine la itre atr kösë itre waco. Eje hi, tro ni a huletrij la itre leis qa ngöne la itre ime i epun, me nuamelene la itre atr hnei epuni hna tra thethin kösë itre waco.
21 Eje hi, tro ni a huletrij la itre isole i epun, me amelene la itre atr qa ngöne la ime i epun, nge tha tro hmaca kö angatr a nyine tha i epun. Nge tro hë epuni a atre e cili laka, Iehova ni.
22 Ke eje hi, kucakuca ha la atr ka meköt pine la itre trengathoi i epun, ngacama tha hnenge kö lo hna ahleuhleunyi* angeic. Ketre, hnei epuni fe hna thuecatrene la atr ka ngazo troa kuca catrëne la ngazo, matre meci pi angeic.
23 Celë hi matre, tha tro hmaca kö epun itre föe, a hetre hna meköle goeën ka iaö me kuci haze. Tro hë ni a amelene la nöjeng qa ngöne la ime i epun, nge tro hë epuni a atre laka, Iehova ni.’”
Itre mekun ecahu fen
^ Maine, “ka perofetane qa kuhu hni i angatr.”
^ Ene la kola xup la ketre ngöne uma ka tha catre kö, me pele haon ej matre kösë catrecatre hë.
^ Heb., “epun itre wene manie ka catr.”
^ Ene la itre leis ne kuci iöni hna hnöth ngöne la itre iwatingöneim me itre iwanakoim.
^ Maine, “akötrë angeic.”
