Ezekiela 29:1-21
29 Ame ngöne la hna 10 ne macatre, ngöne la drai 12 ne la hna 10 ne treu, hnei Iehova hna ithanata koi ni, me hape:
2 “Nekö i atr, xei jë koi Farao joxu ne Aigupito, nge perofetane jë la akötr ka troa traqa koi angeic, me nöje Aigupito asë.
3 Hane hi la nyine tro eö a qaja: ‘Hane hi la hna qaja hnei Iehova Joxu Ka Sisitria:
“Tro hë ni a uti koi ö Farao joxu ne Aigupito,Eö lo öni atraqatr ka lapa ngöne la itre tim ka neni qa ngöne la hneopegejë i angeic Nil,*Eö lo atre qaja ka hape: ‘Zinge kö la Nil.
Hnenge hna xup ej thatraqai ni.’
4 Eje hi, tro ni a ami nyine jel ngöne la që i ö, nge tro ni a afedren hune la itre enienine i ö, la itre ii ne la hneopegejë i ö Nil.
Tro ni a xomi ö qa ngöne la hneopegejë i ö Nil, memine la nöjei ii ka fedr hune la itre enienine i ö.
5 Nge tro hë ni a nuetriji ö ngöne la hnapapa, eö me itre ii ne la hneopegejë i ö Nil.
Tro eö a kei ngöne la itre hlapa, nge pëkö ka troa kepe eö me hlemi ö.
Tro ni a hamë eö nyine a ne la itre öni wael me itre waco.
6 Nge tro hë la angetre Aigupito asë a atre laka, Iehova ni,Ke ceitui angatr me sine jez* ka hmalohmaloi hna hujan hnene la angetre Isaraela.
7 Ame lo angetre Isaraela a ea la iwanakoime i ö, ke fici ö ju hi,Nge ela ju hi la iape i angatr hnei ö.
Ame lo angatr a huja eö, xeci pi hi ö,Nge peje pi hi la lue ca* i angatr hnei ö.”
8 “‘Matre hane hi la hna qaja hnei Iehova Joxu Ka Sisitria: “Tro ni a upe la taua troa lepi ö, nge tro ni a apatrene la itre atr me öni ka lapa thei ö.
9 Tro ha pë atren e Aigupito, nge tro hë ej a ketre götran hna lep apatren. Nge tro hë angatr a atre e cili laka, Iehova ni, ke öni ö* lo: ‘Zinge kö la Nil! Hnenge hna xup ej thatraqai ni!’
10 Celë hi matre, tro ni a kuca la ketre ewekë koi ö, me kowe la hneopegejë i ö Nil. Tro ni a kuca matre tro Aigupito a ketre götran hna lep apatren, me gaa qaqacil, matre hnapapa ju pe hi qane Migedola uti hë Seveni, lo ifego ne Aithiope.
11 Pë hmaca kö atre me öni ka troa cili thenge, nge tha tro kö a lapan ej koi 40 lao macatre.
12 Tro ni a kuca matre pëkö xaa nöj ka troa hnapapa tui Aigupito. Nge ngöne la 40 lao macatre, pëkö ketre traon ka troa pë atren tune la itre traon ne Aigupito. Eje hi, tro ni a aisaijene la angetre Aigupito nyipine la itre nöj, me amë trongë angatr e cailo fen.”
13 “‘Nge hane hi la hna qaja hnei Iehova Joxu Ka Sisitria: “Thupene la 40 lao macatre, tro ni a acasin la angetre Aigupito, me abëekë angatr qa ngöne la itre nöj hna isaije angatre kow.
14 Tro ni a bëeke fë la angetre Aigupito hna kötre fë kowe la nöje Patherusi, lo zi i angatr. Nge tro hë angatr e cili a ketre baselaia hna wangacon.
15 Tro ha catre la itre xaa baselaia hune la nöje Aigupito, nge tha tro hmaca kö angeic a mus kowe la itre xaa nöj; eje hi, tro ni a akucakucanyi angeic, uti hë la tro angeic a thatreine mus kowe la itre xaa nöj.
16 Tha tro hmaca kö la nöje Isaraela a mejiune koi angeic; tro pe angeic a amekunë angatr lo aqane menu i angatr, ngöne lo angatr a sipo ixatua koi angeic. Nge tro hë la angetre Isaraela a atre e cili laka, Iehova ni Joxu Ka Sisitria.”’”
17 Ngo ngöne la hna 27 ne macatre, lo pane drai ne la pane treu, hnei Iehova hna ithanata koi ni, me hape:
18 “Nekö i atr, hnei Nebukaneza* joxu ne Babulona hna folosan la trongene isi i angeic ngöne lo angatr a lepi Turo. Pa asë hë la itre he, nge eatre hë la itre iape i angatr hna ipeny. Ngazo pe, tha hna nyithupei angeice kö me trongene isi i angeic, la angatr a nue trengecatr troa lepi Turo.
19 “Matre hane hi la hna qaja hnei Iehova Joxu Ka Sisitria: ‘Tro ni a hamën la nöje Aigupito koi Nebukaneza* joxu ne Babulona. Tro angeic a eöth asë la itre mo i Aigupito, me thapa la itre ewekë ka tru, me atrekënö asë; celë hi thupen ne la trongene isi i angeic.’
20 “‘Tro ni a hamë Aigupito koi angeic, hnane la huliwa hnei angeic hna kuca troa thapa la traon,* ke hnei angatr hna huliwa koi ni,’ öni Iehova Joxu Ka Sisitria.
21 “Ngöne la drai cili, tro ni a acian la ketre jian* thatraqan la nöje Isaraela, nge tro ni a aijijë eö troa ithanata koi angatr. Nge tro hë angatr a atre laka, Iehova ni.”
Itre mekun ecahu fen
^ Ame la “Nil” ngöne la xötre celë, me itre xötr e thupen, ke kola qaja la hneopegejë me itre jë i timi ej.
^ Heb., “ketre rozo.”
^ Heb., “itre gö.”
^ Heb., “angeic.”
^ Maine, “Nebukaderezar” ketre aqane cinyanyin.
^ Maine, “Nebukaderezar” ketre aqane cinyanyin.
^ Ene Turo.
^ Maine, “tro ni a thue trengecatre kowe.”
