Ezekiela 48:1-35
48 “Hane hi la itre ëjene la itre tribu qa kolopi pun: ame la götrane i Dana, ke ka xötrethenge la gojenyine tro Hethelon uti hë Lebo-Hamath,* me uti hë Hazar-Enana, nge ej a xötrethenge trootro la ifego ne Damaseko a tro kolopi ezin e Hamath; ej a tro qa ngöne la ifego ne koië uti hë la ifego ne kuë.
2 Ame la götrane i Asera, ke ej a ifedrekeu memine la götrane i Dana, nge ej a tro qa ngöne la ifego ne koië uti hë la ifego ne kuë.
3 Ame la götrane i Nafatali, ke ej a ifedrekeu memine la götrane i Asera, nge ej a tro qa ngöne la ifego ne koië uti hë la ifego ne kuë.
4 Ame la götrane i Manase, ke ej a ifedrekeu memine la götrane i Nafatali, nge ej a tro qa ngöne la ifego ne koië uti hë la ifego ne kuë.
5 Ame la götrane i Eferaima, ke ej a ifedrekeu memine la götrane i Manase, nge ej a tro qa ngöne la ifego ne koië uti hë la ifego ne kuë.
6 Ame la götrane i Reubena, ke ej a ifedrekeu memine la götrane i Eferaima, nge ej a tro qa ngöne la ifego ne koië uti hë la ifego ne kuë.
7 Ame la götrane i Iudra, ke ej a ifedrekeu memine la götrane i Reubena, nge ej a tro qa ngöne la ifego ne koië uti hë la ifego ne kuë.
8 Ame ngöne la ifego i Iudra qa koië uti hë kuë, qa i epuni troa xomi götran nyine ahnahna ka 25 000 kubit* la eisaisan. Qane la ifegon ej e koië uti hë la ifegon ej e kuë, ame la etrune la itre ifegon ej, ke tro ha ihmeku memine la etrune la itre götran hna hamën kowe la itre tribu ka fedr kow ej. Nge tro ha acile la hnë hmi e kuhu nyipin.
9 “Ame la götran hnei epuni hna troa xom nyine ahnahna koi Iehova, ke tro ej a 25 000 kubit la eqean, nge 10 000 kubit la eisaisan.
10 Celë hi lai ahnahna ka hmitrötr thatraqane la itre atre huuj. Tro ej a traqa koi 25 000 kubit e kolopi, nge 10 000 kubit e kuë, me 10 000 kubit e koië, nge 25 000 kubit e kolojë. Nge tro ha amë la hnë hmi koi Iehova e kuhu nyipin.
11 Tro ha nue la götrane cili kowe la itre atre huuj hna ahmitrötrën, ene lo itre matra i Zadoka, lo itre ka eatrëne la hnëqa i angatr koi ni me kuca pala hi la loi, ngöne lo angetre Isaraela me angetre Levi a trotrije la loi.
12 Troa hetre edrö i angatr qa ngöne la götran hna xom nyine ahnahna, matre troa ketre ewekë ka nyipi hmitrötr. Tro la götrane cili a ifedrekeu memine la zi i angetre Levi.
13 “Nge ezine la götran ne la itre atre huuj, ke tro ha hamën kowe la angetre Levi la ketre götran ka 25 000 kubit la eqean, nge 10 000 kubit la eisaisan. (E troa e asë, ke traqa koi 25 000 kubit la eqean, nge 10 000 kubit la eisaisan.)
14 Tha tro pi kö angatr a salemën, maine nyihnan, maine isazen la ketre götran ne la hnepadro celë ka sisitria, ke ewekë ka hmitrötre lai koi Iehova.
15 “Nge ame pë hë la götrane ka lapa pe, lo ka 5 000 kubit la eisaisan, nge ka eje ngöne la ifego ka 25 000 kubit, ke thatraqane la itre atr me itre öni, me itre huliwa hna kuca e nöjei drai ngöne la traon. Nge tro ha xupe la traon e kuhu nyipin.
16 Hane hi la itre tulu ne la traon: traqa koi 4 500 kubit la ifego e kolopi, nge 4 500 kubit la ifego e kolojë, me 4 500 kubit la ifego e koië, nge 4 500 kubit la ifego e kuë.
17 Nge ame la itre hna axö öni ne la traon, ke traqa koi 250 kubit e kolopi, nge 250 kubit e kolojë, me 250 kubit e koië, nge 250 kubit e kuë.
18 “Nge ame la lue götran ka lapa pe e koië me kuë, lo ka lapan asë la eqeane lo götran hna hamën nyine ahnahna ka hmitrötr, ke traqa koi 10 000 kubit. Tro ej a ihmeku memine la eqeane la götran hna hamën nyine ahnahna ka hmitrötr. Nge ame la hna troa menuën qa ngöne la lue götrane cili, ke nyine tro pë hë a ithuan la itre ka huliwa hnine la traon.
19 Qanyine kö la itre ka huliwa ngöne la traon, troa eënyine la lue götrane cili, ene lo itre atr ka xulu qa ngöne la nöjei tribu ne Isaraela.
20 “Ame la götran hna hamën nyine ahnahna, ke ketre kare, traqa koi 25 000 kubit la eqeane la 4 lao götran. Qa i epuni troa xom ej nyine ahnahna ka hmitrötr, memine la itre hnepadro thatraqane la traon.
21 “Ame la lue hnepadro ka lapa pe e koië me kuë ne la götran hna hamën nyine ahnahna ka hmitrötr, memine la itre hnepadro thatraqane la traon, ke troa hamëne kowe la tan. Tro lue ej a lapan asë la eqeane la ifego ka 25 000 kubit, ngöne la götrane koië me kuë, lo hna hamën nyine ahnahna ka hmitrötr. Tro itre ej a ihmeku memine la eqeane la itre hnepadro ezin, nge troa hamën itre ej kowe la tan. Nge troa amë e kuhu nyipin, la götran hna hamën nyine ahnahna ka hmitrötr, me hnë hmi ne la uma ne hmi.
22 “Ame la itre hnepadro ne la angetre Levi, me itre hnepadro thatraqane la traon, ke tro itre ej a lapa nyipine la lue götran ne la tan. Tro la götran ne la tan a ej e nyipine la ifego i Iudra me Beniamina.
23 “Nge ame kowe la itre xaa tribu, tro la götrane i Beniamina a tro qa ngöne la ifego e koië uti hë la ifego e kuë.
24 Nge ame la götrane i Simeona, ke ka ifedrekeu memine la götrane i Beniamina, ej a tro qa ngöne la ifego e koië uti hë la ifego e kuë.
25 Nge ame la götrane i Isakara, ke ka ifedrekeu memine la götrane i Simeona, ej a tro qa ngöne la ifego e koië uti hë la ifego e kuë.
26 Nge ame la götrane i Zebulona, ke ka ifedrekeu memine la götrane i Isakara, ej a tro qa ngöne la ifego e koië uti hë la ifego e kuë.
27 Nge ame la götrane i Gada, ke ka ifedrekeu memine la götrane i Zebulona, ej a tro qa ngöne la ifego e koië uti hë la ifego e kuë.
28 Ame la ifego e kolojë ka ifedrekeu memine la ifego i Gada, tro ej a tro qa Tamara uti hë la itre timi e Meriba-Kadesi, me qa ngöne la itre Tim* uti hë la Hnagejë Ka Tru.*
29 “Celë hi nöj hnei epun hna troa thawa nyine edrö kowe la itre tribu ne Isaraela, nge celë hi götrane i angatr,” öni Iehova Joxu Ka Sisitria.
30 “Hane hi la itre hnë tro qa ngöne la traon: e kolopi, ej a traqa koi 4 500 kubit.
31 “Nge tro fe a ati ëjene la itre qëhnelö ne la traon, thenge la ëjene la itre tribu ne Isaraela. Ame la köni qëhnelö e kolopi, ke cas koi Reubena, nge cas koi Iudra, nge cas koi Levi.
32 “Traqa koi 4 500 kubit la eqeane la götrane koië, nge hetrenyi e cili la köni qëhnelö: cas koi Iosefa, nge cas koi Beniamina, nge cas koi Dana.
33 “Traqa koi 4 500 kubit la eqeane la götrane kolojë, nge hetrenyi e cili la köni qëhnelö: cas koi Simeona, nge cas koi Isakara, nge cas koi Zebulona.
34 “Traqa koi 4 500 kubit la eqeane la götrane kuë, nge hetrenyi e cili la köni qëhnelö: cas koi Gada, nge cas koi Asera, nge cas koi Nafatali.
35 “E troa tuluthe kanothe la götrane cili, ke traqa koi 18 000 kubit. Nge qaane ju hi la drai ce, tro ha ati ëjene la traon, Iehova hi e celë.”
Itre mekun ecahu fen
^ Maine, “hnë lö e Hamath.”
^ Kola qaja la itre kubit ka qea. Wange ju la Xaa Ith. B14.
^ Ene la itre tim e Aigupito.
^ Ene la hnagejë Mediterane.
