Ezera 6:1-22
6 Celë hi matre, hnei Dariu joxu hna iupe troa ithel hnine la itre tusi hna amë ngöne la itre hnahagene trengamo e Babulona.
2 Ame hna öhne la ketre tusi hna ewath ngöne la traon ne Akemetha, ngöne la nöje Madai. Hane hi la maca hna fejan:
3 “Ngöne la pane macatre ne mus i Koreso joxu, hnei Koreso joxu hna ameköti ewekë thatraqane la uma i Akötresie e Ierusalema: ‘Loi e tro la angetre Iudra a xupe la uma, matre ijiji angatre hmaca jë troa huuj e cili. Nge epi troa ami trepene lai uma. Tro ej a 60 kubit* la edraiën, nge 60 kubit la eisaisan.
4 Nge tro fe a kuca la köni hnë lapa hna kuca hnei itre ietë ka tru, itre etë hna ukune trongën kowe la göhnen, me ca hnë lapa hna kuca hnei sinöe. Nge loi e troa nyithupen hnene la itre manie i joxu.
5 Ketre, loi e tro hmaca a bëeke fë la itre trengene gool me sileva, lo hnei Nebukaneza hna xom qa hnine la uma i Akötresie e Ierusalema a tro Babulona, matre tro hmaca a amë ngöne la itre göhnen hnine la uma ne hmi e Ierusalema, hnine la uma i Akötresie.
6 “Haawe enehila, ame eö Tatenai, gavena ne la götran Tröne La Hneopegejë,* me eö Setarabozenai, epon me itre sine huliwa i epon, itre xa gavena ka co ne la götran Tröne La Hneopegejë, nue angatre pi.
7 The thele hmaca kö troa acilëne la huliwa ne xupi uma i Akötresie. Nge qa ne la gavena i angetre Iudra, me itre qatr thei angetre Iudra, troa xupe hmaca la uma i Akötresie ngöne la göhnene hnapan.
8 Ketre, eni a amekötine la aqane tro epuni a xatuane la itre qatr i angetre Iudra, matre tro la uma i Akötresie a cile hmaca: Tro ha xomi mani hnine la trengamo i joxu, me qa ngöne la mani hna kuiën ngöne la götran Tröne La Hneopegejë, troa canga nyithupene la itre atre cili, matre tro angatr a atreine xupe la uma, nge tha tro kö a cile la huliwa.
9 Nge loi e tro pala hi a hamë angatr e nöjei drai la ka nyipiewekë, (neköi kau, me nani trahmany, me neköi mamoe thatraqane la itre huuj ne dreuth asë kowe la Akötresi ne hnengödrai, me qitr, me sotr, me waina, me oel, thenge la hna sipon hnene la itre atre huuj e Ierusalema),
10 matre tro pala hi angatr a tro fë huuj ka amadrinëne la Akötresie ne hnengödrai, nge tro angatr a thithi fë la mele ne la joxu me itre nekö i nyidrë.
11 Nge ase hë ni amekötin ka hape, ame la atre cil kowe la hna amekötin celë, tro ha nyithupene koi angeic. Tro ha hnöthi angeic hune la ketre inehe hna seng qa ngöne la uma i angeic, nge tro ha hnë kabine* ne la nöjei atr la uma i angeic.
12 Haawe, epi tro la Akötresie ka amë la ëje i nyidrë e cili,* a akeine la nöjei joxu me nöjei nöj ka thele troa ena la hna amekötin celë, nge ka thë la uma i Akötresie e Ierusalema. Eni Dariu la ka amekötin, nge canga trongëne jë.”
13 Ame hnei Tatenai, gavena ne la götran Tröne La Hneopegejë, me Setarabozenai, me itre sine huliwa i nyidro, hna canga trongëne la hna amekötin hnei Dariu joxu.
14 Nge hnene la itre qatr ne Iudra hna catre xupe la uma, me anyimenyimëne la huliwa, ke hna thuecatre i angatr hnene la itre hna perofetan hnei Hagai perofeta, me Zakaria api Ido. Matre hnei angatr hna afenesine la troa xupi uma thenge lo hna amekötin hnene la Akötresi Isaraela, me Koreso, me Dariu, me Aretaseta joxu ne Peresi.
15 Hnei angatr hna afenesine la uma ne hmi ngöne la hnaakönine drai ne la treu Adara,* hmekune la kola 6 lao macatre ne mus i Dariu.
16 Ame hnei angetre Isaraela, me itre atre huuj, me angetre Levi, me itre xa ka bëeke qa ngöne la nöje trenyiwa, hna ce feete madrine la ijine kola xötrei löthe* la uma ne hmi Akötresie.
17 Hnei angatr hna traqa fë la 100 lao kau, me 200 lao nani trahmany, me 400 lao neköi mamoe, troa feetëne la kola xötrei löthe la uma ne hmi Akötresie. Nge ame kowe la itre huuj ne la ngazo* i Isaraela asë, hna traqa fë la 12 lao nani, thenge la etrune la itre tribu i Isaraela.
18 Hnei angatr hna acile la itre atre huuj ngöne la itre gurup i angatr, me angetre Levi thenge la isa lapa i angatr, matre kuca la huliwa i Akötresie e Ierusalema, tune lo hna cinyihan hnine la itusi Mose.
19 Hnene la itre ka bëeke qa ngöne la nöje trenyiwa, hna feetëne la Paseka ngöne la hna 14 ne drai ne la pane treu.
20 Nge hnene la itre atre huuj, me angetre Levi hna ahmitrötrë angatr, matre tro angatr asë a hmitrötr. Angatr a humuthe pi la itre öni ne Paseka, thatraqane la itre ka bëeke qa ngöne la nöje trenyiwa, me itre xa atre huuj, me koi angatre fe.
21 Nge hnei angetre Isaraela ka bëeke qa ngöne la nöje trenyiwa hna xeni la Paseka, me nöjei atr ka ce me angatr, lo itre ka trije la itre huliwa ka sis ne la itre nöj, matre nyihlue* i Iehova Akötresi Isaraela.
22 Angatr a feetëne jë la Feet ne la itre Falawa Ka Pë Levenen koi 7 lao drai, nge madrine catr angatr. Eje hi, hnei Iehova hna amadrinë angatr, me kuca matre, ka tru angatr kowe la joxu ne Asuria. Matre hnene la joxu hna xatua* angatr troa xupe la uma ne la nyipi Akötresie, lo Akötresi Isaraela.
Itre mekun ecahu fen
^ Traqa koi 27 m. Wange ju la Ith. B14.
^ Wange ju la Ezera 4:10, ith.
^ Maine jë, “hmitru.” “ita agetrin.”
^ Ene e Ierusalema maine hnine la uma ne hmi.
^ Wange ju la Ith. B15.
^ Maine, “nue koi.”
^ Wange ju la HQP.
^ Heb., “thel.”
^ Heb., “acatrene la lue ime i angatr.”
