Hosea 10:1-15
10 “Isaraela la ketre vin ka hetre mecin* nge ka hamë wen.
Pine laka, ej a wa wen atrun, kolo fe a elë la etrune la itre ita ne huuje i angeic;Pine laka, kola ham atrune la nöj, kolo fe a mingöming catre la itre ikapa ka hmitrötr* i angeic.
2 Ka thoi la hni i angatr;Tro ha jelengazo angatr enehila.
Tro la ketre atr a thëtrije la itre ita ne huuje i angatr, me apatrene la itre ikapa i angatr.
3 Tro hë angatr a qaja enehila ka hape: ‘Pëkö joxu së, ke tha hne së kö hna xoue Iehova.
Nge nyine u la tro sa hetre joxu?’
4 Angatr a qaja la itre trengewekë ka pë alien, me sisinyi thoi, me isisinyikeu;Celë hi matre, tro la iameköti ka troa traqa a tune la haö ka poizin ngöne la itre xötre iumany.
5 Tro hë la angetre Samaria a seseu* göne la neköi kau gool e Beth-Aven.
Tro la nöj a treije pin ej,Memine fe la itre atre huuj ne la itre haze trenyiwa, ka madrin kow ej memine la elolon ej,Ke tro ha xom ananyin ej qaathei angatr.
6 Tro ha xom ej a tro Asuria nyine ahnahna kowe la joxu ka tru.
Tro ha thaipië Eferaima,Nge tro Isaraela a hmahma pine la eamo hnei angeic hna trongën.
7 Tro Samaria memine la joxu i angeic a patr,*Tune la wanapalaman ka manij hune la tim.
8 Tro ha apatrene la itre hnë hmi gaa hmitrötr e Beth-Aven, lo ka akeinyi Isaraela.
Tro ha cia la itre neköi sinöe me itre hnitr ka ithiny hune la itre ita ne huuje i angatr.
Tro la itre atr a qaja kowe la itre wetr ka hape, ‘Juetrë huni ju!’
Me kowe la itre sasala, ‘Mala tranyi huni pi!’
9 Isaraela fe, qaan e Gibea, hnei ö hna kuca la ngazo.
Hnei angatr e cili hna catre që.
Tha hna apatren* asë kö la nöje ka tha meköti kö ngöne lo isi e Gibea.
10 Qanyinge kö iëne la ijine tro ni a haji angatr.
Tro hë la itre nöj a cas me uti koi angatr,Ngöne la ijine troa hnöthe la lue ngazo i angatr* koi angatr.
11 Eferaima ekö la neköi kau föe hna inine hnyawa nge ka pi wejeweje qitr,Celë hi matre, tha hnenge kö hna huliwane la nyinawa ka mingöming i angeic.
Ngo tro hë ni a upe la ketre atr troa tithi Eferaima.
Tro Iudra a hule la nyine uja dro, nge tro Iakobo a hul thatraqai angeic la nyine amudromudrone la dro.
12 Pine laka, ijine pala kö troa thele Iehova
Iëne jë la ketre hnepadro nge eënyine jë.Jume jë la itre itine la meköt, nge menuëne jë la ihnimi nyipici.Nge tro hë Akötresie a traqa matre ini epuni la meköt.
13 Ngo hnei epuni pe hna traane la iakötrë,Me menuëne la ewekë ka tha meköti kö,Nge hnei epuni hna xeni la wene ne la iaö;Ke hnei epun hna mejiun koi epuni kö,Me kowe la itre soce i epun ka nyimutre.
14 Tro ha elë la ketre meje ka tru kowe la nöje i epun,Nge tro ha apatrene trij la nöjei traon i epun hna eköhagen,Tune lo aqane kuca i Salemana koi Beth-Arebela,Ngöne lo kola hna la itre thin koi etë ezine la itre nekö i angatr.
15 Bethela fe, hane hi la nyine troa kuca koi ö, pine la etrune la iakötrë i ö.
Eje hi, tro ha patre* la joxu ne Isaraela e kaqa ne lai.”
Itre mekun ecahu fen
^ Maine jë, “ka xötr.”
^ Wange ju la HQP.
^ Maine, “xouene troa traqa la ketre ewekë.”
^ Heb., “tro ha lep ahumun.”
^ Heb., “tha hna e angatr asë kö.”
^ Kola hape, ngöne la angatr a troa thue la itre ngazo i angatr tune la kola thue ehnef.
^ Heb., “tro ha lep ahumun.”
