Hosea 12:1-14
12 “Eferaima a xeni eny.
Angeic a nyinyape thenge la enyi ne koië ngöne la drai ka pexej.
Angeice pala hi a thoi me isi.
Angatr a isisinyikeu me Asuria, me tro fë oel e Aigupito.
2 Iehova a kootrë Iudra;Tro nyidrëti a ihnyingë koi Iakobo pine la aqane ujë i angeic,Me të koi angeic thenge la itre huliwa i angeic.
3 E kuhu hni, hnei angeic hna ea la tidröca ne la mama i angeic,Nge hnei angeic hna nue trengecatr matre isi me Akötresie.
4 Qea catre la hnei angeic hna isi memine la angela, nge hune ju kö angeic.
Hnei angeic hna treije me xëwe koi nyidrë.”
Hnei Akötresieti hna öhnyi angeic e Bethela, me ithanata koi hun e cili,
5 Iehova la Akötresie ne la itre trongene isi e hnengödrai,Tha tro kö la itre atr a thëthëhmine laka, Iehova la ëje i nyidrë.
6 “Haawe, bëeke jë kowe la Akötresi ö,Catre jë huliwa ngöne la ihnimi nyipici me meköt,Nge catre jë mejiune kowe la Akötresi ö.
7 Ngo kola ea hnene la atr ka salem la itre tulu ka tria;Aja i angeic troa qenatrekënö.
8 Eferaima a qaja lapaane ka hape: ‘Eje hi, trenamo hë ni;Tru catre la manieng.
Nge pëkö nyine qaja göne la itre huliwang asë, maine pëkö nyine jele ngazon.’
9 Ngo eni Iehova la Akötresi eö qaan e Aigupito.
Tro hmaca ni a alapa eö fene la itre itatTune lo itre drai ne feet.
10 Hnenge hna ithanata kowe la itre perofeta,Me nyixane la itre hnei angatr hna meköle goeën,Nge jëne la itre perofeta, hnenge hna hamëne la itre ceitun.
11 Hna hetre iaö* me thoi e Gileada.
Hnei angatre hna huujëne la itre kau e Gilegala,Nge itre ita ne huuje i angatr a tune la itre itra etë ngöne la itre xötre iumany.
12 Hnei Iakobo hna kötr kowe la nöj* e Arama;*Hnei Isaraela e cili hna nyihluene la ketre trahmanyi pine la ketre föe,Nge hnei angeice hna thupë mamoe pine la föe cili.
13 Jëne la ketre perofeta, hnei Iehova hna xomi Isaraela qa Aigupito,Nge jëne la ketre perofeta, hnei nyidrëti hna thupë angeic.
14 Ngazo catre pi hë la aqane akötrë Akötresie hnei Eferaima;Zö i Angeice pala hi la madra ne la itre hna humuth;Tro hë la Joxu i angeic a nyithupene koi angeic pine ahmahmanyi nyidrë.”
Itre mekun ecahu fen
^ Maine, “itre ewekë ka ketre pengön,” “kuci haze.”
^ Heb., “hlapa.”
^ Maine, “e Suria.”
