Hosea 9:1-17
9 “Isaraela fe, the madrine kö,Tha tro kö la madrine i ö a elitrauj tune la itre xaa nöj.
Ke hnei ö hna ananyine la Akötresi ö pine eö nyi föe ne gojeny.*
Hnime catr eö la thupe i ö qa ngöne la hna nyi föe ne gojeny ngöne la itre hnë lepe qitr.
2 Ngo tha tro kö eö a xen qa ngöne la hnë lepe qitr me qa ngöne la hnë weje wene vin,*Nge tro ha pë waina i ö ka hnyipixe.
3 Tha tro hmaca kö la angetre Isaraela a lapane la nöje i Iehova;Ngo tro pe Eferaima a bëeke a tro Aigupito,Nge tro angeic a xeni la ka pui ngazo e Asuria.
4 Tha tro hmaca kö angatr a nei waina nyine fii huuj koi Iehova;Tha tro kö la itre huuje i angatr a amadrinë nyidrë.
Ceitune itre ej memine la falawa ne hnëmec;Tro la nöjei atr ka xeni la falawa cili a pui ngazo.
Ke thatraqai angatr hmekuje hi la falawa cili;Tha tro kö a alöne lai ngöne la uma i Iehova.
5 Nemene la hnei epuni hna troa kuca ngöne la drai ne icasikeu,*Lo drai ne atrunyi Iehova?
6 Ke dreng, tro epuni a kötre mel wanga apatrenyi epuni pi.
Tro Aigupito a acasine la nöj, nge tro Mofi a kelemi angatr.
Tro hë la itre ka ithinyi a thapa la itre mo i angatre sileva,Nge tro ha cia hnitr ka ithiny hnine la itre itate i angatr.
7 Easenyi hë la itre drai ne tro angatr a isa qeje thiinan,Easenyi hë la itre drai ne troa të la itre huliwa i angatr,Nge tro kö Isaraela a öhne lai.
Tro ha hmo la perofeta i angatr, nge tro ha menu la atre kepe maca;Pine laka, tru catre la ngazo i ö, tro fe a tru catre la aqane methinë eö.”
8 Hnene la atre thup ne Eferaima hna ce memine la Akötresing.
Ngo enehila, itre perofeta i angeic a tune la itre hnö ne la atre tra thethi waco;Hetre imethinë hë e hnine la uma ne la Akötresi angeic.
9 Hnei angatr hna kei kowe la itre huliwa ka sis tune lo ka traqa e Gibea.
Tro hmaca Akötresieti a mekune la itre tria i angatr, me nyithupene la itre ngazo i angatr.
10 “Ame lo eni a öhnyi Isaraela, ceitunge hi memine la atr ka öhnyi wene rezë ngöne la hnapapa.
Ame lo eni a öhne la itre qaaqaa i epun, ceitunge hi memine la atr ka öhne la pane wacua ngöne la iwacua ka canga wa.
Ngo hnei angatre pe hna ujë koi Baala Peora;Me nyihluene la ewekë nyine hmahman,*Matre sisi hë angatr tune la ewekë hnei angatr hna hnim.
11 Nanyi hë la elolo i Eferaima tune la waco ka sesë;Pëhë ka hnaho, pëhë ka upune, nge goi pë fe hë ka kuci nekönatr.
12 Ngacama angatr a hetrune la itre nekönatr,Ngo tro ni a thepe nyudren uti hë la troa pë atr;Eje hi, ekölöhini pe angatr ngöne la ijine tro ni a trotriji angatr!
13 Hna traa Eferaima ngöne la hna axö öni, nge ceitui angeic me Turo koi ni;Enehila, tro Eferaima a upe la itre nekö i angeic kowe la ihumuth.”
14 Iehova fe, epi tro nyipëti a hamën la thupen ka ihmeku koi angatr;Ene la upune ka uthith, memine la lue thi ka pë hmun.*
15 “E Gilegala hi la nöjei ngazo i angatr, e cili hi la eni a nyiqaane methinë angatr.
Tro hë ni a helë angatr qa ngöne la umang pine la itre ngazo i angatr.
Tha tro hmaca kö ni a hnimi angatr;Ka pi hun la itre nekö i joxu i angatr.
16 Tro ha sa triji Eferaima.
Tro ha fitre la itre iwaane i angatr, nge tha tro kö angatr a wa.
Ngacama tro la itre föi angatr a hnaho, ngo tro ni a humuthe la itre nekö hnimina i angatr.”
17 Tro la Akötresing a nuetriji angatr,Ke tha hnei angatre kö hna drei nyidrë,Nge tro hë angatr a kötre kowe la itre xaa nöj.
Itre mekun ecahu fen
^ Maine, “ketre aqane kuci ngazo,” “kola ce meköl me nöjei atr.”
^ Maine, “wene rezë.”
^ Maine, “feete i epun hna sa drain.”
^ Maine, “kowe la haze ka axulune la hmahma.”
^ Maine, “ka fitr.”