Ieremia 21:1-14
21 Hane hi la hnei Iehova hna qaja koi Ieremia. Hnei Zedekia joxu hna upi Pasur nekö i Malekia, me Zefania nekö i Maseia atre huuj, troa sipo angeic ka hape:
2 “Pane hnyinge jë koi Iehova, ke Nebukaneza* joxu ne Babulona a isi me easë. Nge maine jë, tro Iehova a kuca la ketre ewekë ka tru nge nyine hain, matre tro Nebukaneza a tro qaathe së.”
3 Öni Ieremia jë hi: “Hane hi la hnei epuni hna troa qaja koi Zedekia:
4 ‘Hane hi la hna qaja hnei Iehova, Akötresi Isaraela: “Dreng! Tro ni a ujëne koi epun la itre jia ne isi ngöne la itre iwanakoime i epun, lo hnei epuni hna xom matre troa isi memine la joxu ne Babulona, me angetre Kaledaia ka cile xötreithe la ihag. Nge tro ni a acasi angatr nyipine la traone ce.
5 Eje hi, tro kö ni a isi me epun hnene la ecatrene la iwanakoimeng me imenge* ka catr ngöne la trengehni, me wesitr, me elëhni atraqatr.
6 Tro ni a lepe hnei akötr la itre atrene la traone celë, itre atr me itre öni. Nge tro hë angatr a mec hnene la mec ka ixötrekeu.*”’
7 “‘“Thupene lai,” öni Iehova, “hane hi la ka troa traqa koi Zedekia joxu ne Iudra, me itre ka huliwa koi angeic, me itre atrene la traon, lo itre ka troa mele pe qa ngöne la itre mec ka ixötrekeu, me isi,* me jiin: tro ni a nue angatr koi Nebukaneza* joxu ne Babulona. Eje hi, kowe la musi ne la itre ithupëjia me angatr, me musi ne la itre ka thele troa humuthi angatr. Tro angeic a humuthi angatr hnei taua. Tha tro kö angeic a meku angatr. Tha tro kö angeic a hnimi angatr me utipi angatr.”’
8 “Nge tro eö a qaja kowe la nöje celë: ‘Hane hi la hna qaja hnei Iehova: “Qanyi epuni kö iën la gojeny kowe la mel, maine gojeny kowe la mec.
9 Tro la itre ka lapa ngöne la traone celë a mec hnene la isi, me jiin, me itre mec ka ixötrekeu. Ngo ame la itre ka trotrij la traon me nue angatr kowe la angetre Kaledaia ka traqa troa thapa la traon, ke tro hë angatr a mel; edrö* i angatre pë hë la mele i angatr.”’
10 “‘“Ase hë ni mekun troa axulun* la akötr kowe la traone celë, ngo tha itre ewekë ka loi kö,” öni Iehova. “Tro ha nue la traon kowe la joxu ne Babulona, nge tro angeic a dreuthetriji ej.”
11 “‘Haawe, ame eö joxu ne Iudra, me epuni asë itre ka lapa ngöne la hnanyijoxu, drenge ju la hna qaja hnei Iehova.
12 Fami i Dravita fe, hane hi la hna qaja hnei Iehova:
“Isigöline jë la meköt e nöjei hmakany,Nge cilëgöline ju la itre hna qenatrekënönWanga tro la itre huliwa i epun ka ngazo,A jele la trengehning tune la eëNge tro ej a mel, nge pëkö ka troa apin.”’
13 ‘Tro ni a lepi ö, atrene la hnathup,Git ka cil ngöne la nöj gaa papa,’ öni Iehova.
‘Nge ame pena epun, itre ka qaja ka hape: “Drei la ka troa lepi së?
Drei la ka troa thapa la itre uma së?”
14 Tro ni a kuca matre tro epuni a xeni punLa itre huliwa i epun,’ öni Iehova.
‘Tro ni a dreuthetrij la hnaxulu i angeic,Nge tro la eë a manith asë, matre hnatresije pë hë xötreithi angeic.’”
Itre mekun ecahu fen
^ Maine, “Nebukaderezar” ketre aqane cinyanyin.
^ Heb., “xejë la wanakoim.”
^ Maine, “troa mec hnene la ketre meci ka tru.”
^ Heb., “taua.”
^ Maine, “Nebukaderezar” ketre aqane cinyanyin.
^ Maine, “tro angatr a mel.”
^ Heb., “hnenge hna ujë la iqëmekeng koi.”
