Ieremia 50:1-46
50 Hane hi la hna qaja hnei Iehova koi Ieremia perofeta göi Babulona, lo nöje i angetre Kaledaia:
2 “Thuemacane jë nge tro fë jë nyipine la itre nöj.
Acile jë la ketre hatren nyine acasinekeun,* nge qaja trongëne jë.
The juetrëne pi kö la ketre ewekë!
Hape jë: ‘Ase hë thepe Babulona.
Ase hë ahmahmanyi Bel.
Ase hë axouenyi Merodaka.
Ase hë thaipiëne la itre idrola ne Babulona.
Nge ase hë axouene la itre idrola* ka sis i angeic.’
3 Ke xulu hë la ketre nöj qa kolopi troa lepi angeic.
Ej a kuca matre nyine xouene la nöje celë;Pë hmaca kö ka troa lapan ej.
Kötre hë la itre atr me itre öni;Angatre hë koilo .”
4 “Ngöne la itre drai cili me ijine cili,” öni Iehova, “tro ha ce traqa hnene la nöje Isaraela me nöje Iudra. Tro angatr a treije trootro, me ce thele Iehova Akötresi angatr.
5 Tro angatr a hnyingëne la jë ne tro Ziona, me xei kowe la gojenyin me hape: ‘Jë fe, nge ce tro jë së me Iehova matre kuca la ketre isisinyikeu me nyidrë ka epine palua, nge tha nyine tro kö a thëthëhmin.’
6 Ceitu la nöjeng memine la hnënge mamoe ka tro menu. Itre ka thupë nyudren la ka amenu nyudren. Hnei angatr hna tra tro sai nyudren hune la itre wetr, me hul agö nyudren kowe la ketre wetr matre ketre sasala pena. Qa ngöne lai, thëthëhmine hë nyudren la hnë mano i nyudren.
7 Ame asë hi la itre ka öhnyi nyudren, ke hnei angatr hna öni nyudren, matre önine la itre ithupëjia: ‘Pëkö engazo i eahun, ke hnei nyudren hna kuca la ngazo qëmekei Iehova, lo atr ka meköt, lo mejiunene la itre qaaqaa i angatr, ene Iehova.’”
8 “Kötre pi qa Babulona,Tro pi qa ngön la nöje i angetre Kaledaia,Nyitipune jë la itre öni ka tro pa qëmeken la hnënge öni.
9 Ke tro ni a acasine la itre nöj ka tru qa kolopiMe upi angatr troa lepi Babulona.
Tro angatr a cile xötrë troa isi me angeicMe thepe angeic.
Ceitu la itre ane pehna i angatr me ane pehna ne la socKa thapa la itre nekön qaathei kem me thin;Ka hetre thane pala hi la itre ane pehna cili.
10 Tro la nöje Kaledaia a tune la trengamo nyine thapa.
Tro asë hi a mej la itre ka atrekënön ej,” öni Iehova.
11 “Ke hnei epuni hna madrin, eje hi, atraqatr la madrine i epunLo epuni a thapa la edröng.
Hnei epuni hna wajawaja la dro tune la hos föe ngöne la haö,Nge hnei epuni hna ho tune la itre nyipi hos.
12 Hna thaipiëne la thine i epun.
Hna ahmahmane la föe ka hnaho epun.
Goeën! Co pë hë eahlo nyipine la itre nöj,Kösë hnënge hnitr ka qaqacil, nge hnapapa.
13 Pine la elëhni i Iehova, tha tro kö a lapan ej;Tro ha pë hnyawa ca atren e cili.
Tro asë hi a xou la itre ka tro ezi BabulonaNge tro angatr a qej pine la nöjei akötr ka traqa koi angeic.
14 Cile xötrë jë nge isi jë me Babulona qa ngöne la nöjei götran,Epuni asë itre ka huji* pehna.
Huj asë pi la itre ane pehna koi angeic! Nge the amë kö la ketre,Ke hnei angeic hna ngazo koi Iehova.
15 Sue jë troa isi me angeic qa ngöne la nöjei götran.
Hnei angeic hna nue* angeice kö.
Kei hë la itre ikapa i angeic, nge ase hë thëtrije la itre ihage i angeic,Ke Iehova la ka të koi angeic.
Nyithupene jë koi angeic.
Kuca asë jë koi angeic tune lo hnei angeic hna kuca.
16 Apatrene pi* qa Babulona la atre jumi fejaMemine la atre huliwane la ifos ngöne la ijine menu.
Pine la taua ka iakötrë, tro angatr a isa bëek kowe la nöje i angatr,Me isa kötr kowe la itre zi i angatr.
17 “Angetre Isaraela la itre mamoe hna aisaijen. Hna aisaije angatr hnene la itre liona. Hna pane öni angatr hnene la joxu ne Asuria. Thupene lai, hna öni la itre june i angatr hnei Nebukaneza* joxu ne Babulona.
18 Matre hane hi la hna qaja hnei Iehova joxu ne la itre trongene isi e hnengödrai, Akötresi Isaraela: ‘Tro ni a të kowe la joxu ne Babulona me nöje i angeic, tune lo eni a të kowe la joxu ne Asuria.
19 Thupene lai, tro ni a engë Isaraela kowe la hnë axö öni i angeic. Tro angeic a xeni trootro e Karemela me Basana, nge tro angeic a xeni mej hune la itre wetr e Eferaima me Gileada.’”
20 “Ngöne la ijine cili me hneijine cili,” öni Iehova,“Tro ha thele la ngazo i Isaraela,Ngo patre hë ej,Nge tha tro kö a öhne la itre ngazo i Iudra,Ke tro ni a nue la ngazo ne la itre atr hnenge hna nuamelen.”
21 “Tro jë troa isi memine la nöje Merathaima me itre atrene Pekoda.
Lep angazo angatre jë nge apatrenyi angatre hnyawa pi!” öni Iehova.
“Kuca asë jë la hnenge hna ahnithe koi ö.
22 Hetre mejene isi ngöne la nöj,Ketre akötr atraqatr.
23 Goeëne la aqane axeciën me anyilanyilane lo hama ne lepe fao, ka lep la nöjei nöj e cailo fen!
Goeëne la pun koi Babulona: ketre ewekë hna xouene nyipine la itre nöj!
24 Ase hë ni tra thethi ö Babulona, nge jötre hë eö,Nge goi tha öhne fe eö.
Hna öhnyi ö me ee eö,Ke Iehova la hnei ö hna icilekeu memin.
25 Hnei Iehova hna fe la hnë ami jia ne isi i nyidrë,Me xome qa ngön, la itre jia ne elëhni i nyidrë.
Ke hetre huliwa i Iehova joxu ne la itre trongene isi e hnengödrai, Joxu Ka SisitriaNgöne la nöje Kaledaia.
26 Traqa pi qa gaa nany troa lepi angeic.
Fe pi la itre hnë ami xen i angeic.
Xawane jë la itre ewekë i angeic tune la hnënge wene feja,
Nge apatren asë pi.
Loi e tha tro kö a mel la ketre atre i angeic.
27 Humuth asë pi la itre neköi kau i angeic;Xomi nyudreni jë kowe la hnë humu öni.
Ekölöhini nyudren, ke ijine hë koi nyudren,Traqa ha la ijine troa ihnyingë me nyudren!
28 Kola drenge la mejene la itre ka kötr,Lo itre ka kötre mel qa Babulona,Matre qaja e Ziona ka hape, Iehova Akötresi së ha nyithupen,Nyidrëti a isi thatraqane la uma ne hmi i nyidrë.
29 Hëne jë la itre ka huji pehna troa lepi Babulona,Lo itre ka huji* tane pehna.
Lapa xötreithi angeice jë; the nue kö la ketre troa kötr.
Të jë koi angeic thenge la itre huliwa i angeic.
Kuca jë koi angeic tune lo hnei angeic hna kuca.
Ke hnei angeice hna pi tru koi Iehova,Kowe la Atr Ka Hmitrötr e Isaraela.
30 Celë hi matre, tro la itre nekö trahmany i angeic a kei ngöne la itre gaa tru atr ne la traon,Nge tro ha meci* asë la itre soc i angeic ngöne la drai cili,” öni Iehova.
31 “Dreng! Eni ha lepi ö föe ka tha idrei,” öni Iehova joxu ne la itre trongene isi e hnengödrai, Joxu Ka Sisitria,“Ke tro kö a traqa la drai hna sa koi ö, la ijine tro ni a ihnyingë me eö.
32 Eö föe ka tha idrei, tro ha hna i ö nge tro eö kei,Nge pëkö ka troa amejë eö.
Tro ni a manithe la itre traone i ö,Nge tro la eë a dreuthetrij asë xötreithi ö.”
33 Hane hi la hna qaja hnei Iehova joxu ne la itre trongene isi e hnengödrai:
“Hna axösisine la nöje Isaraela me Iudra,Nge kola cipa angatr hnene la itre ka othi angatr.
Xele kö angatre ma nue la itre hna oth.
34 Ngo catre kö la Atre Itö Mele* i angatr.
Iehova joxu ne la itre trongene isi e hnengödrai la ëje i nyidrë.
Tro kö nyidrëti a cilëgöli angatr ngöne la hnakootr,Matre troa atingetingëne la nöjMe enienijëne la itre atrene Babulona.”
35 “Tro la taua a lep la angetre Kaledaia,” öni Iehova,“Tro ej a lep la angetre Babulona, me itre nekö i joxu i angeic, me itre ka inamacan.
36 Tro la taua a lep la itre perofeta thoi,* nge tro hë angatr a qenahmo.
Tro la taua a lep la itre soc i angeic, nge tro angatr a xou.
37 Tro la taua a lep la itre hos me itre ikariota i angatr,Tro ej a lep la nöjei trenyiwa ka lapa ngöne la traon,Nge tro hë angatr a tune la itre föe.
Tro la taua a lep la itre mo i angeic, nge tro ha atrekënö itre ej.
38 Tro ha hnëjin la itre tim i angatr, nge tro itre ej a qaqacil.
Ke ketre nöje lai ka tiqa hnei idrola hna tratraun,Nge pine la itre pu i angatr ka iaxoueny, angatr a ujë tune la itre hmo.
39 Celë hi matre, tro la itre öni ne hnapapa a ce mel me itre öni ka ho,Nge tro la itre iaena* a lapa ngöne la traon.
Tha tro hmaca kö a lapan ej,Nge qane ju hi la ketre xötr uti hë la ketre, pë hmaca kö ka troa lapan ej.”
40 “Tro ha tune lo ijine Akötresieti a apatrenyi Sodroma me Gomora memine la itre traon ezin: pë hmaca kö ka troa lapa e cili me xupi uma,” öni Iehova.
41 Dreng! Kola traqa la ketre nöj qa kolopi;Tro ha xulu la ketre nöje ka tru me itre joxu ka truQa ngöne la itre götrane gaa nanyi catr ne la fen.
42 Atreine hi angatre huliwan la tane pehna me jo.
Itre ka iakötrë me ka pë utipin.
Ceitune hi la mejene la itre ka ti hos,Memine la aqane uliline la hnagejë.
Tune la atr ka cas, angatr a cile xötrë troa isi me lepi ö, nekö jajinyi ne Babulona.
43 Drenge hë la joxu ne Babulona la ka traqa koi angatr,Matre pëhë trengecatre i angeic.*
Kolo ha traqa koi angeic la hnehengazo,Me itre akötr tune la föe ka hnaho.
44 “Dreng! Tro ha traqa la ketre atr ka troa lep la itre hlapa gaa tingeting, tune la liona ka utraxulu qa ngöne la itre hnitr ka cia ezin la hneopegejë Ioridrano. Ngo aca tro hi ni a kuca, matre tro angatr* a kötrene la nöje i angatr. Nge tro ni a acile hui angeic lo atre hna iën. Ke drei la ka ceitu me eni, nge ka thele isi me eni? Drei la atre thupë mamoe ka atreine cile koi ni?
45 Celë hi matre, drenge ju la hna axeciën* hnei Iehova göi Babulona, me itre mekuna i nyidrë göi angetre Kaledaia:
Eje hi, tro ha hul a tro gaa nany la hnënge öni ka co.
Tro nyidrëti a apatrene la itre hnë axö öni, pi angatr.
46 Tro ha enienije la ihnadro pine la meje i Babulona, la angeic a kei,Nge tro ha drenge la kola isueny nyipine la itre nöj.”
Itre mekun ecahu fen
^ Maine, “sine sinöe nyine hatren.”
^ Ame la hnaewekë cili qene heberu, maine jë kola hape, “agetrin.” Kola qaja la ewekë hna sisin.
^ Heb., “waja hnei waca.”
^ Heb., “hamën la iwanakoime i angeic.”
^ Heb., “thupatrije pi.”
^ Maine, “Nebukaderezar” ketre aqane cinyanyin.
^ Heb., “waja hnei waca.”
^ Heb., “lep ahumun.”
^ Wange ju la HQP.
^ Maine, “ka ithanata menu.”
^ Maine, “otiric.” Ketre waco atraqatr ka thatreine sesë.
^ Maine, “genyi la lue ime i angeic.”
^ Ma kolo jë a qaja la itre atrene Babulona.
^ Maine, “aja.”