Ieremia 7:1-34
7 Hane hi la itre trengewekë hnei Iehova hna qaja koi Ieremia:
2 “Cile jë ngöne la qëhnelö ne la uma i Iehova, nge e cili, qaja jë ka hape: ‘Drenge ju la trengewekë i Iehova, epuni asë, angetre Iudra ka lö qa ngöne la qëhnelö celë, matre atrunyi Iehova!
3 Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: “Saze pi la itre aqane ujë me itre thiina i epun, nge tro hë ni a aijijë epun troa lapa ngöne la nöje ce.
4 The mejiune kö kowe la itre trengewekë ka iaö, nge the qaja kö ka hape: ‘Uma ne hmi i Iehova la,* uma ne hmi i Iehova la, uma ne hmi i Iehova la!’
5 Saze hnyawa pi la itre aqane ujë, me itre thiina i epun. Isigöline jë la meköt ngöne la kola ikootrë la lue atr.
6 The qanangazone kö la itre trenyiwa, me itre nekön hna mecitrij hnei kem, me itre sine föe. The anenine kö la madra ne la itre atr ka pë engazon ngöne la nöje ce. The thele hnëjine kö, qa ngöne la hna drengethenge la itre xaa haze.
7 E tro epuni a kuca lai, tro hë ni a nue epun troa lapane la nöje ce, nöj hnenge hna hamëne paluan kowe la itre qaaqaa i epun.”’”
8 “Ngo epuni kö a pi drenge la itre trengewekë ka iaö; pëkö ca thangane lai.
9 Epuni a atrekënö, me humu atr, me nyixetë, me sisinyi thoi, me huuje* koi Baala, nge epuni a drengethenge la itre haze hnei epuni hna thatre.
10 Hapeu, tro kö epuni a kuca la itre ngazo cili, me cile qëmekeng ngöne la uma ka xome la ëjeng, me hape: ‘Tro ha amele hun’?
11 Epuni kö a xome ceitune la uma ka xome la ëjeng, me uma i itre atrekënö? Ngazo pe, celë hi la hnenge hna öhn,” öni Iehova.
12 “‘Ngo tro jë kowe la umang ka hmitrötr e Silo, lo hnenge hna amë la ëjenge ekö, nge goeëne jë la hnenge hna kuca kowe ej, pine la aqane iakötrë i Isaraela nöjeng.
13 Ame pe, hnei epuni pala hi hna kuca la itre ewekë cili,’ öni Iehova. ‘Hnenge pala hi hna ewekë koi epun,* ngo tha drenge pe epun. Hnenge pala hi hna hë epun, ngo tha sa pi kö epun.
14 Celë hi matre, ame la hnenge hna kuca koi Silo, ke tro fe ni a kuca kowe la uma ka xome la ëjeng, lo uma hnei epun hna mejiune kow, me kowe la götrane ce hnenge hna hamë epun me itre qaaqaa i epun.
15 Tro ni a helë epun qëmekeng, tune lo aqane helëne ni lo itre trejin me epun, itre matra i Eferaima.’
16 “Ngo ame eö, the thithi kö thatraqane la nöje ce. The sipo ixatua hmaca kö koi ni, me thith, me xëwe thatraqai angatr, ke tha tro kö ni a drei ö.
17 Tha öhne kö eö la hnei angatre hna kuca ngöne la itre traon e Iudra, me itre gojenyi e Ierusalema?
18 Itre nekön a nyi sinöe, itre kem a athi eë, nge itre föe a lepe farin nyine sa gato matre huujëne kowe la Joxu föe ne hnengödrai.* Nge angatr a nenge la waina nyine fii huuj kowe la itre xaa haze, matre akötrë ni.
19 ‘Ngo hapeu, eni kö la hnei angatre hna akötrën?’ öni Iehova. ‘Waea, angatre kö. Nge angatre kö a sipu ahmahmanyi angatr.’
20 Matre hane hi la hna qaja hnei Iehova Joxu Ka Sisitria: ‘Dreng! Tro ha nenge la elëhning me trenge hning hune la nöje ce, hune la itre atr me itre öni, hune la itre sinöe ne la hlapa, me itre xeni ne la dro. Tro ha palulu la elëhning, nge tha tro kö ej a pi.’
21 “Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: ‘Tro jë! Nyixane ju la itre huuje i epun hnene la itre huuje ne dreuth asë, nge öni jë la mitr.
22 Ke ame lo ijine eni a amelene la itre qaaqaa i epuni qa Aigupito, ke pëkö hnenge hna qaja me ahnith göne la itre huuje ne dreuth asë me itre xaa huuj.
23 Ame pe, hnenge hna ahnithe koi angatr ka hape: “Drengethenge ni ju, nge tro ni a Akötresi epun, nge tro epuni a nöjeng. Tro epuni a trongëne hnyawa la gojeny hnenge hna amaman nyine loi koi epun.”’
24 Ngo tha hnei angatre kö hna dreng me hnangenyën hnyawa. Hnei angatre pe hna trongëne la itre sipu mekuna i angatr ka ngazo.* Hnei angatre hna catre fë mekun me xötrethenge la itre aja i angatr ka ngazo,* matre luzi pë hë angatr nge pëkö ca eloi angatr.
25 Celë hi aqane ujë i angatr, qaane lo kola amelene la itre qaaqaa i epun qaa Aigupito uti hë enehila. Matre tha mano kö ni upe koi angatr la itre hlueng, itre perofeta; hnenge pala hi hna upi angatr o drai.*
26 Ngo xele kö la itre atren la nöje ce troa drei ni me hnangenyën. Hnei angatre pe hna catre fë mekun,* nge tru catre kö la ngazo i angatr hune lo itre qaaqaa i angatr!
27 “Tro eö a qaja la nöjei trengewekë celë koi angatr, ngo tha tro kö angatr a drei ö; tro eö a hë angatr, ngo tha tro kö angatr a sa koi ö.
28 Nge tro eö a qaja koi angatr ka hape: ‘Hane hi la nöje ka tha drei Iehova Akötresi angatr, nge ka xele ma kapa la ihaji. Pëhë mele nyipici, nge goi tha ithanatanekeune hmaca kö angatre lai.’*
29 “Xöje pi la ipene he i ö ka qea,* nge trije pi. Elë jë hune la itre sasala ka papa, nge thinge jë la nyima ne kele wezipo. Ke ase hë Iehova thipetrije la xötre atre celë, ka jele la trengehni i nyidrë, nge tro nyidrëti a nuetriji angatr.
30 ‘Ke hnene la nöje Iudra hna kuca la ngazo qëmekeng,’ öni Iehova. ‘Hnei angatre hna amë la itre idrola ka sis hnine la uma ka xom la ëjeng, matre troa apuingazon.
31 Hnei angatr hna xupe la itre hnë hmi gaa hmitrötr i Tofet ngöne la Hnathupe Ne La Nekö i Hinom,* matre troa dreuthe la itre nekö i angatre trahmanyi me jajiny. Ngo tha hnenge kö hna upi angatre troa kuca lai, nge goi tha mekune fe ni lai.’*
32 “Celë hi matre öni Iehova: ‘Dreng! Tro ha traqa la ijin tha tro hmaca kö a hëne ka hape, Tofet me Hnathupe Ne La Nekö i Hinom,* ngo Hnathupe Ne Ihumuth. Tro ha kelem la itre ka mec e Tofet uti hë la troa pë göhnë.
33 Nge tro la itre waco me itre öni wael a öni la itre ka mec ne la nöje ce, nge pëkö ka troa axouenyi nyudren.
34 Tro ni a apatren la aqane sue madrin, me aqane elitrauj hnei madrin ngöne la itre traon e Iudra, me ngöne la itre gojenyi ne Ierusalema. Tha tro hmaca kö a drenge la nin ne la trahmany ka faipoipo me föi angeic, ke tro ha apatrene la nöj.’”
Itre mekun ecahu fen
^ Heb., “celë hi itre.” Kola qaja la nöjei uma ne la uma ne hmi.
^ Maine, “huhajine la itre huuj.”
^ Heb., “Hnenge hna canga ihlë me ithanata.”
^ Ëje ne la ketre haze ne la angetre Isaraela ka iamenumenu. Maine jë, ketre haze ne hnaho.
^ Maine, “itre eamo i angatr.”
^ Heb., “itre hni i angatr ka ngazo.”
^ Heb., “hnenge hna canga ihlë o drai me upi angatr.”
^ Heb., “acatrene la nyinawa i angatr.”
^ Heb., “hna apatren qa ngöne la që i angatr.”
^ Maine, “pene he hna tha hane kö xöj ke hna sisiny.”
^ Wange ju la HQP.
^ Heb., “elë kowe la hni.”
^ Wange ju la HQP.
