Isaia 11:1-16
11 Tro ha xöl la ketre picin qa ngöne la sinöe i Iese hna sa,Nge tro ha wa wen la ketre zin ka fetra qa ngöne la iwaane i angeic.
2 Nge tro ha të hui angeic* la ua i Iehova,Ene la ua ne inamacan me trotrohnin,Ua ne eamo me trengecatr,Ua ne atrehmekun me xoue Iehova.
3 Nge tro angeic a madrin troa xoue Iehova.
Tha tro kö angeic a amekötin thenge la ka mama hi,Me hajin* thenge la hna dreng.
4 Tro angeic a amekötin la itre hna wangacon cememine la meköt,Me hajin cememine la thiina ka meköt, nyine loi kowe la itre ka ipië e celë fen.
Tro angeic a lep la ihnadro hnene la sine tö ne la ukeineqë i angeicMe humuth la atr ka ngazo hnene la hnamano* ne la që i angeic.
5 Tro la meköt a nyi otrene* hni i angeic,Nge tro la aqane mele nyipici a nyi otrene* gö i angeic.
6 Tro la luko a ce lapa memine la neköi mamoe,Nge tro la leopar a ce meköl memine la neköi nani,Nge tro la neköi kau memine la liona, a ce lapa memine la öni ka giris;*Tro la nekönatr a eatrongë angatr.
7 Tro la kau a ce xen memine la bea,Nge tro la itre nekö i nyidro a ce meköl.
Tro la liona a xeni la haö tune la kau.
8 Tro la medreng a elo ngöne la hnaop ne la asip,Nge tro la nekönatr hna thepe thin, a amë la ime nyën ngöne la hnaop ne la un hna mecin.
9 Tha tro kö a hetre iakötrëMe iangazo ngöne la wetreng ka hmitrötr,Ke tro ha tiqa la ihnadro hnene la atrehmekune i IehovaTune la kola heetrën la trepene hnagejë hnei tim.
10 Ngöne la drai cili, tro la waane i Iese a cil tune la ketre hatren thatraqane la itre nöj.
Tro la itre nöj a thele angeic matre xomiuji angatr,Nge tro ha lolo la hnë mano i angeic.
11 Ngöne la drai cili, tro Iehova a amamane hmaca* la mene i nyidrë, matre xatuane la nöje i nyidrë ka lapa pe. Tro nyidrëti a abëekë angatr qa Asuria, me Aigupito, me Patherusi, me Kuza, me Elama, me Sinara,* me Hamath, me qa ngöne la itre hnapet.
12 Tro nyidrëti a adraiën la ketre hatren thatraqane la itre nöj. Nge tro nyidrëti a theng la angetre Isaraela hna isa ijen, memine la angetre Iudra hna isa ijen, nge tro ha acasi angatr qa ngöne la 4 lao götran ne la fene hnengödrai.
13 Tro ha patr qaathei Eferaima la izalukeu,Nge tro ha apatrene la itre ithupëjia me Iudra.
Tha tro kö Eferaima a zalu pi Iudra,Nge tha tro kö Iudra a xele ma wai Eferaima.
14 Nge tro angatr a utine la itre wetr ne la angetre Filisiti e kuë;Tro angatr a ce atrekënö la itre atre ne Koië.
Tro angatr a musinë Edroma me Moaba,Nge tro la angetre Amona a nyi jini angatr.
15 Tro Iehova a thawaluëne* la ketre götran ne la hnagejë ne AigupitoMe saathe la ime i nyidrë hune la hneopegejë.*
Tro nyidrëti a lep la 7 lao hneopegejë* hnene la hnamano* i nyidrë ka idreuth,Matre ijije hë troa trongë ihnadro.
16 Nge tro ha hetre gojenyi ka tru ka tro qa Asuria thatraqane la munëne la nöje i nyidrë,Tune la gojenyi Isaraela ngöne lo angatr a tro qa Aigupito.
Itre mekun ecahu fen
^ Ene la “picin,” memine la “zin” hna qaja ngöne la xötre 1.
^ Maine, “eamon.”
^ Maine, “uqanyin.”
^ Maine, “beletr.”
^ Maine, “beletr.”
^ Maine jë, “tro la neköi kau a ce xen memine la liona.”
^ Maine, “nyi hnaaluen amamane nyidrë.”
^ Ene, “Babulona.”
^ Maine jë, “aqaqacilën.”
^ Ene, “Euferata.”
^ Maine jë, “tro nyidrëti a lep matre axulune la 7 lao hneopegejë.”
^ Maine, “uati.”
