Isaia 21:1-17
21 Trengewekë kowe la hnapapa ne la hnagejë:*
Tune la itre udreli ka uf e kolojë,Kola xulu la akötr qa ngöne la hnapapa, qa ngöne la nöj hna xouen.
2 Hnenge hna meköle goeën la ketre ewekë hna xouen:
Kola iaö hnene la atre mele thoi,Nge kola thë hnene la atre thëtrij.
Elama fe, elë jë! Nge Madai fe, lepe jë!
Tro ni a aupune la itre akötr hnei angeic* hna axulun.
3 Celë hi matre tru catre la xoung.*
Eni lo a thë hnei akötr,Tune la föe ka hnaho.
Jole koi ni troa dreng;Tha ka hmaloi kö koi ni troa goeën.
4 Kola kucakuca la hning, nge kola ngongo la ngönetreing hnei xou.
Ame ekö, pi tro catre ni a goeëne la kola lö la jö, ngo enehila, eje pena a axouenyi ni.
5 Ati peleitre jë, nge amë jë la itre icea!
Xeni jë, nge iji jë!
Itre tane fe, ange cile jë! Nge nenge pi la oel* hune la itre petr!
6 Ke hane hi la hna qaja koi ni hnei Iehova:
“Tro jë, nge acile jë la ketre atre thup, matre tro angeic a qaja la hnei angeic hna öhn.”
7 Nge hnei angeic hna öhne la ikaatr hna hul hnei itre hos,Ca ikaatr me itre boliko,Me ca ikaatr me itre kamela.
Hnei angeic hna goeëne hnyawan me alamekën hnyawan.
8 Hnei angeic hna ho tune la liona me hape:
“Iehova fe, eni a cil o drai hune la ita ne thup,Nge e nöjei jidr, eni a thupën la götrane qang.
9 Goeën la ewekë ka traqa:
Cahmijë hë la itre trahmany hune la ikatr hna hul hnei itre hos!”
Ame hnei nyidrëti hna qaja catrën ka hape:
“Kei hë angeic, kei hë Babulona!
Kei asë hë la itre idrola ne la itre haze i angeic, nge nyilanyila ha itre ej!”
10 Ame eö nöjenge fe, lo hna lep tune la qitr,Lo wenen* ne la hnë lepe qitreng,Ase hë ni qaja koi ö la hna ahnith hnei Iehova joxu ne la itre trongene isi e hnengödrai, lo Akötresi Isaraela.
11 Trengewekë koi Duma:*
Kola hë ni qa Seira:
“Atre thupe fe, ije hawa pe hi matre hmakanyi pi?
Atre thupe fe, ije hawa pe hi matre hmakanyi pi?”
12 Ame hna sa hnene la atre thup ka hape:
“Easenyi hë matre hmakanyi pi, me jidri fe.
Maine epuni a pi hnying, hnyingëne jë.
Bëeke hmaca jë!”
13 Itre trengewekë göne la hnapapa:
Itretre ti hos ne Dedana fe,
Tro epuni a meköle la jidr ngöne la hnaxulu me ngöne la hnapapa.
14 Angetre lapan la nöje Tema,Tro jë kowe la atre pi ij, nge thue timi angeice jë,Thuane jë la atr ka kötr.
15 Ke hnei angatr hna kötr qëmekene la itre taua, qëmekene la taua hna uth,Me qëmekene la pehna hna huj, me qëmekene la akötrene la isi.
16 Ke öni Iehova koi ni ka hape: “Ame ngöne la ca macatre, tune la aqane e la itre macatre ne la atre huliwa,* tro ha patr asë la lolo i Kedara.
17 Nge xalaithe pe hi la itretre huji pehna qa ngöne la itre atre isi ne Kedara, ke ase hë Iehova lo Akötresi Isaraela qaja.”
Itre mekun ecahu fen
^ Ma kola qaja la nöje Babulona ekö.
^ Ma kola qeje Babulona.
^ Heb., “Kola akötr la itrepëng.”
^ Maine, “iën.” Heb., “siën.”
^ Heb., “nekön.”
^ Kola hape, “pë mej.” Ëj hna perofetan göi Edroma.
^ Maine, “troa e hnyawa la itre drai tune la aqane e ne la atre huliwa i maseta” kola qaja la ca macatre.
