Isaia 22:1-25
22 Trengewekë göne la Hnathup hna meköle goeën:*
Nemene la ewekë ka traqa koi ö? Hnauëne laka, elë asë hë la itre atre i ö hune la itre uma?
2 Ke eö lo a nyi mejen,Traon ka enienij, me hunahmi ka madrin.
Tha hna humuthe kö la itre wezipo i ö hnei taua,Nge tha meci kö angatr ngöne la isi.
3 Hnene la itre joxu ka iakötrë thei ö hna ce kötr.
Hna akalabusi angatr, ngacama pëkö ka huji pehna.
Ame asë hi la itre hna öhn, ke hna akalabusi angatr,Ngacama hnei angatr hna kötre koi gaa nany.
4 Celë hi matre öning: “The goeë ni hmaca kö,Nge nue ni pi troa treije latresi.
The thele kö troa aupunyi niPine la hna apatrene la nekö jajinyi* ne la nöjeng.
5 Ke ketre drai ne iamenu, me iwajahuj, me nyinyape hmohmo,Hna axulun hnei Iehova, joxu ne la itre trongene isi e hnengödrai,Ngöne la Hnathup hna meköle goeën.
Kola thëtrij la itre hna xupi hagNge kola sue draië kowe la itre wetr.
6 Elama a xome la trenge pehnaMemine la itre ikatr me itre hos,*Kira a xejë* la petr.
7 Tro ha tiqa la itre hnathupe i ö ka loloHnene la itre ikatr,Nge tro la itre hos* a cilën la itre qëhnelö,
8 Tro ha huletrij la hna ekögölithi* Iudra.
“Ngöne la drai cili, tro epuni a goeën la itre nyine isi ngöne la Uma Ne La Hnaxulu.
9 Tro epuni a öhne la itre gaa kaqa ngöne la ihag atraqatr ne la Traone i Dravita. Nge tro epuni a thiane la tim ngöne la pisin ka ej e kuhu fen.
10 Tro epuni a e la itre uma ne Ierusalema, me thëtrij la itre xaa uma, matre acatrene la ihag.
11 Nge tro epuni a xupi basë* nyipine la lue ngöne uma thatraqane la timi ne lo pisin hnapan. Ngo tha tro kö epuni a goeëne la Atre Xup Ka Sisitria, nge tha tro kö epuni a öhne la Atre kuca lai ekö.
12 Ame ngöne la drai cili, tro la Joxu Ka Sisitria, ene Iehova joxu ne la itre trongene isi e hnengödrai,A upi së troa treije latresi me hnëmec,Me cin apane la he së me heetrëne la ibëek ka tru thenyin.
13 Ngo tro pe sa feet me madrin,Me humuthe la itre kau me lep humuth la itre mamoe,Me öni mitr me iji waina.
‘Xeni jë nge iji jë, ke ame elany tro sa mec.’”
14 Matre hnei Iehova hna qaja amaman koi ni la ewekë ce: “‘Tha tro kö a nue la ngazo i epun uti hë la tro epuni a mec,’ önine la Joxu Ka Sisitria, ene Iehova joxu ne la itre trongene isi.”
15 Hane hi la hna qaja hnene la Joxu Ka Sisitria, ene Iehova joxu ne la itre trongene isi e hnengödrai: “Tro jë koi Sebena, lo atresi ka musinëne la hnalapa i joxu, nge qaja jë koi angeic ka hape:
16 ‘Nemene la hnei ö hna hetrenyi e ce? Drei la fami i ö e ce, matre tro eö a ketre sin la hua i ö e celë?’ Angeic a sin la hua i angeic hune la gaa draië, me ngöne la git. Angeic a sin thatraqai angeic la ketre hnë mano.
17 ‘Ngo goeën, tro Iehova a kuiënetriji ö e kuhu hnadro, me ea catrë eö!
18 Eje hi, tro nyidrëti a ewathi ö, me hnatriji ö tune la kola hna la wene balo ngöne la ketre nöj atraqatr. Tro eö a meci e cili, nge tro fe a lapa e cili la itre ikatr atraqatre i ö, ketre nyine hmahmane lai kowe la hnalapa ne la maseta i ö.
19 Eje hi, tro ni a xome la hnëqa i ö, me helë eö qa ngöne la göhnë i ö.
20 “‘Ngöne la drai cili, tro ni a hëne la hlueng, ene Eliakima nekö i Hilekia.
21 Tro ni a heetrë angeic hnene la iheetre ka qea i ö, me sile catrën hui angeic la isole i ö, nge tro ni a nue la musi ö kowe la ime i angeic. Tro hë angeic a nyi kem kowe la angetre Ierusalema asë, me kowe la itre matra i Iudra.
22 Nge tro ni a amë la ki ne la hnalapa i Dravita hune la hnaiape i angeic. Tro angeic a fe, nge pëkö ka troa thing. Tro angeic a thing, nge pëkö ka troa fe.
23 Tro ni jeng acatrenyi angeic tune la kola jei fao ngöne la gaa catr. Tro hë angeic a tune la therone ka lolo kowe la fami* i angeic.
24 Nge tro ha athip hui angeic la lolo* ne la fami* i angeic asë, ene la itre matran, me itre nekönatr, me nöjei trengen ka co, me itre trengen ka tune la kap, memine la nöjei trengen ka tru.
25 “‘Ngöne la ijine cili,’ öni Iehova joxu ne la itre trongene isi e hnengödrai, ‘tro ha fejetrije la fao hna jeng acatren ngöne la gaa catr, nge tro ha thupa me amalan ej. Nge ame la ehnef hnen ej hna thu, ke tro ha kei me kaqa, ke ase hë Iehova sipu qaja.’”
Itre mekun ecahu fen
^ Ma kola qeje Ierusalema.
^ Kola aceitunëne la traon memine la ketre jajiny. Maine jë kola qaja la troa hetre utipin me ihnim.
^ Maine, “itretre ti hos.”
^ Maine, “hnëkën.”
^ Maine, “itretre ti hos.”
^ Maine, “la ka heetrë.”
^ Maine, “sima.”
^ Heb., “hnalapa ne la keme i angeic.”
^ Heb., “ehacen.”
^ Heb., “hnalapa ne la keme i angeic.”
