Isaia 33:1-24
33 Ekölöhini ö, atre apatren ngo tha hna apatrene kö;Atre iaö, ngo tha hna iaöne kö!
E ase hë eö apatren, ke tro pena a apatrenyi ö.
E ase hë eö iaö, ke tro pena a iaö eö.
2 Iehova fe, epi tro nyipëti a utipi hun.
Nyipëti la mejiune hun.
Epi tro nyipëti a aegöcatrenyi* hun e nöjei hmakany,Eje hi, nypëti la atre amele* hun ngöne la ijine akötr.
3 Ame la kola nyi mejen, kola ikötrenyi la itre nöj.
Ame la nyipëti a mejë, kola isa ije la itre nöj.
4 Tro ha xawane la itre mo hna thapa, tune la kola itronyi la hnënge sipa ka xeni menu;Tro angatr a canga sesë kowe ej tune la hnënge sipa.
5 Tro ha atrunyi Iehova,Ke nyidrëti a lapa ngöne la itre gaa draië.
Tro nyidrëti a atiqanyi Ziona hnene la meköt me thiina ka meköt.
6 Tro nyidrëti a acile hutine la itre drai i ö;Mele aqeany, me inamacan, me wangatrehmekun me xou IehovaCelë hi la trengamo* i nyidrë.
7 Goeën! Kola sue e kuhu gojeny la itre ka catr thei angatr;Kola treije hleuhleu la itre ka tro fë maca ne tingeting.
8 Pëhë atrene la itre gojenyi ka tru;Pëhë ka trongëne la itre hmene gojeny.
Hnei angeic* hna thë la isisinyikeu;Hnei angeic hna nuetrije la itre traon;Pëkö ihnimi angeic kowe la itre atr.
9 Kola treije* la nöj, nge ej a qaqacil.
Hmahma ha Lebanona, nge hnyiqetre hë.
Sarona a tune la hnapapa,Nge kola malamala la itre drön e Basana me Karemela.
10 Öni Iehova: “Enehila, tro hë ni a cil,Enehila, tro hë ni a atrunyi ni;Enehila, tro hë ni a adraië ni.
11 Epuni a upunene la haö ka qaqacil, me hnahon la jez.
Tune la eë, tro ha dreuthi epun hnene la itre mekuna i epun.
12 Nge tro la itre nöj a tune la xaca hna dreuth.
Tro ha dreuthetriji angatr hnei eë, tune la itre ka ithiny hna sa.
13 Epun itre ka lapa gaa nany, drenge ju la hnenge hna troa kuca!
Nge epun itre ka lapa easeny, atrehmekune ju la meneng!
14 Ame e Ziona, xou hë la itre atr ka kuca la ngazo;Traqa ha la hmengöhmengön thene la itre ka icilekeu:*
‘Drei the së la ka atreine lapa ezin la eë ka catrehnin?
Drei the së la ka atreine lapa easenyine la itre ukahlokine eë ka tha ae kö?’
15 Ene la atr ka trongëne la meköt o drai,Me qaja la ewekë ka meköt,Me thipëne la huliwa thoi me qenatrekënö,Lo atr ka tha huliwa kö koi thupen,Ka thinge la lue hnangenyë i angeic, wanga drenge jë la kola qeje ihumuth,Nge ka thinge la luemeke i angeic wanga öhne jë la ngazo
16 Tro hë angeic a lapane la itre gaa draië;Itre hugit ka catr la hunapo i angeic,Tro ha thue falawa i angeic,Nge tro pala hi angeic a hetre tim.”
17 Tro la luemeke i ö a goeëne la joxu ngöne la lolo i nyidrë;Tro lu ej a öhne la nöje gaa nany.
18 Tro la hni i ö a mekune* hmaca la xou, me hape:
“Ekaa ha lo sekreter?
Ekaa ha la atre tuluthe la hotr?
Ekaa ha la atre e la itre ita ne thup?”
19 Tha tro hmaca kö eö a öhne la nöje ce ka catre që,Lo nöj ka qaja la itre trengewekë ka jidr* nge ka jole troa trotrohnin,Lo nöj ka tretre që hnei ö hna tha trotrohnin.
20 Goeë Ziona jë, lo traon ne la itre feete së!
Tro la luemeke i ö a öhnyi Ierusalema, la götrane gaa tingeting,Lo itat ka cile hut.
Tha tro jë kö a fejetrij la itre faon ej,Nge pëkö enon ej ka troa xeci.
21 Ngo e cili, tro la Ka Sisitria, ene Iehova,A tune la nöj gaa hetre hneopegejë koi së me itre jë i tim ka isaisa,Pëkö he ka troa galu e ciliNge pëkö he atraqatr ka troa cili thenge.
22 Ke Iehova la Atre Ameköti së,Iehova la Atre Acili Wathebo së,Iehova la Joxu së;Nyidrëti la ka troa amele së.
23 Tro ha nunu la itre eno;Tha tro kö a catr la ima,* nge tha tro kö a seluthe la itre sihnyeu.
Ngöne la drai cili, tro ha thawa la trengamo hna thapa;Tro fe la itre ka peje ca a hane xomi edrö ka nyimutre.
24 Nge pë hmaca kö atrene la nöj ka troa qaja ka hape: “Eni a wezipo.”
Tro ha nue la ngazo ne la itre ka lapan ej.
Itre mekun ecahu fen
^ Heb., “im.”
^ Wange ju la HQP.
^ Maine jë, “trengamo qaathei nyidrë.”
^ Ene, la ithupëjia.
^ Maine jë, “qaqacil.”
^ Maine, “ka iamenumenu.”
^ Maine, “lapa mekun.”
^ Maine, “singhödr.”
^ Maine, “qana ne he.”
