Isaia 40:1-31
40 “Aupune jë, aupune jë la nöjeng,” önine la Akötresi epun.
2 “Akeukawanyi Ierusalema jë,Nge qaja jë koi angeic ka hape, fenesi hë la ijine folosa angeic,Ase hë angeice nyithupene la ngazo i angeic.
Ase hë angeic kapa qaathei Iehova la thupene ka pexej* kowe la nöjei ngazo i angeic.”
3 Kola ewekë catre la ketre atr ngöne la hnapapa me hape:
“Hnëkëne jë la jë i Iehova!
Kuca jë ngöne la hnapapa la ketre gojeny ka tru me meköt kowe la Akötresi së.
4 Epi troa adraiëne la nöjei hnathup asë,Nge epi troa aipiëne la nöjei wetr me sasala asë.
Tro la ihnadro ka xozaxoza* a jijia,Nge tro la itre götran ka jol troa trongën a papa.
5 Tro ha mama la lolo i Iehova,Nge tro ha öhn hnene la nöjei atr asë,Ke ase hë Iehova qaja.”
6 Dreng! Önine la ketre: “Sue jë!”
Ketre a hnying ka hape: “Nemene la nyine tro ni a suen?”
“Ceitu me haö la nöjei atr* asë.
Ceitu me iengene hnitr la aqane mele nyipici* i angatr.
7 Kola qaqacil la haö,Kola fitr la iengen,Ke kola traqa koi itre ej la hnamano* i Iehova.
Eje hi, ceitu me haö la nöjei atr asë.
8 Kola qaqacil la haö,Kola fitr la iengen,Ngo ka epine palua la trengewekë ne la Akötresi së.”
9 Elë jë hune la wetr ka draië,Eö, atre tro fë maca ka lolo koi Ziona.
Ewekë catre jë eö,Atre tro fë maca ka lolo koi Ierusalema.
The xou kö, ngo ewekë catre jë.
Qaja jë kowe la itre traon ne Iudra ka hape: “Hane hi la Akötresi epun.”
10 Goeën! Tro Iehova Joxu Ka Sisitria a traqa memine la men atraqatr,Nge tro la ime i nyidrë a mus thatraqai nyidrëti kö.
Goeën! Eje thei nyidrë la thupen,Nge eje qëmekei nyidrë la thupene huliwa.
11 Tune la atre thupë mamoe, tro nyidrëti a kuca hnyawan* la hnënge mamoe i nyidrë.
Tro nyidrëti a acasine la itre neköi mamoe hnene la ime i nyidrë,Me xepi nyudren ngöne la imano i nyidrë.
Tro nyidrëti a engëne hmidrane la itre mamoe ka iji thin la itre nekön.
12 Drei la ka tuluthe la itre tim ngöne la hnatrapaime i nyidrëMe tuluth* la hnengödrai me ca iwanakoim?*
Drei la ka atreine xawan ngöne la itulu, la xaxau ne la fen hnengödrai asë?Maine tuluth la ehacene la itre wetr me itre sasalaNgöne la ketre itulu?
13 Drei la ka tuluthe* la itre mekuna i Iehova?Nge drei la ka atreine eamo nyidrë me ini nyidrë?
14 Drei la hnei nyidrëti hna ithanata memin matre trotrohnin?Drei la ka ini nyidrë la jë ne la meköt,Maine ini nyidrë la atrehmekun,Maine amamai nyidrë pena la gojeny ne la nyipi inamacan?
15 Goeën! Ceitune la nöjei nöj me wene xöla ka mala qa ngöne la baketr.Nge ceitu i angatr memine la so ne dro hune la itulu,
Goeën! Nyidrëti a kapa draiëne la itre hnapet tune la wanamamik.
16 Goi tha ijije fe la Lebanona troa nyi eene la eë,
Nge ketre, tha ijije kö la itre öni wael troa nyi huuj ne dreuth asë.
17 Ame koi nyidrë, kösë pëkö la nöjei nöj asë;
Ame koi nyidrë, kösë ka pë alien asë itre ej tune la eny.
18 Tro epuni a aceitunë Akötresieti me drei?
Ame koi epun, ceitu i nyidrëti me nemen?
19 Kola xupi idrola* hnene la atre xup ej,Kola pele goolën hnene la atre xupi gool,Me xupe la itre eno sileva.
20 Hnene la ketre trahmany hna iën la ketre sinöe,Ka tha hnyiqetre kö matre nyine huuje i angeic.
Angeic a thele la ketre atr ka tratrau idrolaMatre kuca la ketre idrola ka tha tro kö a kei.
21 Hapeu, thatre kö epun?
Tha drenge kö epun?
Tha hna thuemacanyi epuni kö ngöne lo qaan?
Tha trotrohnine kö epun qaane lo kola ami trepene la fene hnengödrai?
22 Akötresie a lapa e koho hune la ihnadro ka raon,Nge ceitu me itre sipa la itre ka lapan ej.
Nyidrëti a seluth la hnengödrai tune la imaano ka hmelele,Nge nyidrëti a seluth ej tune la imaano ne la itat nyine lapan.
23 Nyidrëti a apatren la itre ka hlemuMe kuca matre ceitu me eny la itretre amekötine* la fen.
24 Kolo petre hi a ase traan,Kolo petre hi a ase jum,Kolo petre hi a cia waan,Nge kola ha qaqacil hnene la eny,Me ufetrij tune la jez.
25 Önine la Atre Ka Hmitrötr: “Epuni a aceitunë ni me drei? Drei la ka ihmeku me eni?”
26 “Gala jë draië nge goeëne jë.
Drei la ka xupi angatr?
Kolo atre iuji angatr tune la ketre trongene isi;Thenge la isa numera i angatr.
Nyidrëti a hë angatr asë thenge la isa ëje i angatr,Hnene la ecatrene la mene i nyidrë, memine la trengecatre i nyidrë nyine hain, pëkö ca ka patr.
27 Iakobo fe, hnauëne la eö a ewekë? Nge Isaraela fe, hnauëne laka, qaja jë eö ka hape:‘Tha öhne kö Iehova la ewekë ka traqa koi ni,Nge tha isigöli ni kö hnei Iehova’?
28 Hapeu, thatre kö eö? Nge tha drenge kö eö?
Iehova Atre Xupe la ihnadro, qaan la ketre can uti hë la ketre can, la Akötresie ka epine palua.
Tha ka hane fe kö nyidrë kucakuca me hmanono.
Ka thatre hmekun* la inamacane i nyidrë.
29 Nyidrëti a hamë trengecatr kowe la ka kucakucaNge nyidrëti a aegöcatrene la itre ka pë trengecatr.
30 Tro la itre nekönatr trahmany a kucakuca me pë trengecatr,Nge tro la itre nekö trahmany a kei me thixötr,
31 Ngo tro la itre ka mejiun koi Iehova a xomi trengecatr.
Tro angatr a sesë draië kösë hetre iape i angatr, tune la itre aeto.
Tro angatr a nyinyiap, ngo tha tro kö angatr a hmanono;Tro angatr a tro, ngo tha tro kö angatr a kucakuca.”
Itre mekun ecahu fen
^ Maine, “hna nyixan.”
^ Maine, “ka tutup.”
^ Heb., “ijön.”
^ Maine, “ihnimi nyipici angatr.”
^ Maine, “ua.”
^ Maine, “ithuan.”
^ Maine, “etrun.”
^ Eisaisan qa ngöne la wanakoxumuono uti hë la hene wanakoim ka co. Wange ju la Xa Ith. B14.
^ Maine jë, “trotrohnin.”
^ Maine, “fao hna ahmun.”
^ Maine, “itre tan.”
^ Maine, “thatre pengön.”
