Isaia 51:1-23
51 “Drei ni ju hnei epun, itre ka xötrethenge la meköt,Epun itre ka thele Iehova.
Goeëne jë la git lo hna thi epuni qa ngönMemine la hnaop* hna jeli epuni qa ngön.
2 Goeëne jë la keme i epun, AberahamaNge xei jë koi Sara, lo atre hnaho epun.
Ke angeice casi hi lo eni a hë angeic,Nge hnenge hna amanathithi angeic me atiqane la itre matra i angeic.
3 Ke tro Iehova a aupunyi Ziona.
Tro nyidrëti a aupune asë la itre itraetë e cili,Nge tro nyidrëti a kuca la hnapapan ej, matre tun e EdrenaNge tro la gaa paapa a tune la ketre hlapa i Iehova.
Tro ha öhn e cili la madrine me madrin atraqatr,Me thithi ne ole, me mejene nyima.
4 Nöjenge fe, drenge hnyawane ju,Nge hnangenyëne ju la hnenge hna troa qaja koi ö, nöjeng.
Ke tro ha tro pi qaathenge la ketre wathebo,Nge tro ni a acile la meköting nyine lai kowe la itre nöj.
5 Calemi hë la meköting.
Tro ha xulu qaathenge la iamele* i epun,Nge tro la lue imeng a amekötine la itre nöj.
Tro la itre hnapet a mejiune koi ni,Me lapa treqene la imeng.*
6 Gala jë e koho hnengödrai,Nge goeëne jë fe la fene hnengödrai.
Ke tro ha isa ije la hnengödrai tune la haj;Tro ha hnyeqetr la fene hnengödrai tune la ketre iheetr,Nge tro la itre ka lapan ej a mec tune la itre neng.*
Ngo ame la iamele hnenge hna troa traqa fë, ke ka epine palua,Nge thatreine kö troa ngaan* la meköting.
7 Drei ni ju hnei epun, itre ka atre la meköt,Me eö nöjenge fe, ka hetrenyi la wathebong* e kuhu hni i ö.
The xouene kö la icilekeu ne la itre atr,Nge the hmengöhmengöne kö pine la itre trenge iqaqa i angatr.
8 Ke tro la itre neköi öni a xuji angatr kösë iheetr;Tro la itre ixelek* a xen la ngönetrei angatr kösë pene mamoe.
Ngo tro ha epine palua la meköting,Nge tro la iameleng a ketr la nöjei xötr asë.”
9 Hlë jë! Hlë jë! Ime i Iehova fe,Xetrëne jë la mene i nyipë!
Hlë jë tune lo itre drai ekö, me tune lo ijin ne la itre xötrapan.
Hapeu, tha nyipëti kö la ka lepi Rahaba,*Me jaqa la öni atraqatr e kuhu hnagejë?
10 Hapeu, tha nyipëti kö la ka aqaqacilëne la hnagejë, memine la itre gaa jui atraqatr?
Tha nyipëti kö la ka saze la itre trepene ej nyine gojeny, matre trongëne hnene la itre hna itön?
11 Tro la itre hna itön hnei Iehova a bëeke hmaca.
Me sue madrin ngöne la angatr a lö e Ziona,Nge tro ha thaipine la he i angatr hnene la madrine ka epine palua.
Tro ha lapane la hni i angatr hnei madrin me madrin atraqatr,Nge tro ha patre la hleuhleu me awe.
12 “Ame eni, eni hi la atre aupunyi epun.
Nga hnauëne laka, eö a xouene la atr ka troa mecMemine la nekö i atr ka troa fitr tune la haö?
13 Hnauëne laka, eö a thëthëhmi Iehova, lo Atre xupi ö,Lo Atre seluthe la hnengödrai me ami trepene la fen?
Nge o drai, eö pala hi a xouen la itre ithupëjia,*Kösë atreine hi angeice humuthi ö.
Ame enehila, ekaa la elëhni ne la ithupëjia?
14 Calehmi hë la ijine troa senge la hna ceinën;Tha tro kö angeic a mec me uti kowe la hnaop,Nge tha tro kö a pë falawa i angeic.
15 Iehova ni, Akötresi ö,Lo atre kapa draiëne la hnagejë me jume la itre hoke ne gejëIehova joxu ne la itre trongene isi e hnengödrai la ëjeng.
16 Tro ni a amë la itre trengewekëng ngöne la që i ö,Nge tro ni a petrë eö hnene la ahnuene la imeng,Matre acatrene la hnengödrai, me nyitrepene la fenMe qaja koi Ziona ka hape: ‘Eö la nöjeng.’
17 Hlë jë! Hlë jë! Cile jë Ierusalema,Atre iji la trepe elëhni i Iehova, lo hnei nyidrë hna liine koi ö.
Hnei eö hna ije la trepe waina;Me iji apën la ver ka iazimozimo.
18 Ame asë hi la itre nekönatr hnei eahlo hna xep, pëkö ala cas ka eatrongë eahlo,Nge ame la itre nekönatr hnei eahlo hna hian, pëkö ala cas ka ea la ime i eahlo.
19 Hna traqa la lue ewekë celë koi nyipo.
Drei la ka troa utipi nyipo?
Troa apatren, me thëtrij, me mecijin, me lepe hnei taua!
Drei la ka troa aupunyi nyipo?
20 Hna enuenu me kei la itre nekö i nyipo.
Angatr a imekölenyi ngöne la itre hna ijejea*Tune la mamoe wael ka jol ngöne la ketre theth.
Angatr a hmo hnene la elëhni i Iehova, memine la ihaji ne la Akötresi nyipo.”
21 Haawe, pane drenge ju la,Föe hna akötrën nge ka hnaitö, ngo tha hnei waina kö.
22 Hane hi la hna qaja hnei Iehova Joxu, Akötresi nyipo lo atre isigöline la nöje i nyidrë:
“Goeën! Tro ni a xome qa ngöne la ime i nyipo la nyine ij ka azimozimon,Ene la verë waina, lo trepe elëhni i nyidrë;Tha tro hmaca kö nyipoti a iji qa ngön.
23 Tro pe ni a amë lai ngöne la iwanakoimen ne la itre ka axösisi nyipo,Lo itre ka qaja koi nyipo ka hape: ‘Thili ju matre tro huni a tro hui nyipo!’
Matre hnei nyipo hna saathe la ju i nyipo tune la ihnadro,Me tune la itre gojenyi matre tro angatr a trongën.”
Itre mekun ecahu fen
^ Maine, “hna sa etë.”
^ Wange ju la HQP.
^ Maine, “trengecatreng.”
^ Maine, “tresitr.”
^ Maine, “tha tro kö a thë.”
^ Maine, “ini.”
^ Maine jë, “itre wanak.”
^ Wange ju la HQP.
^ Maine, “ka lapa xötreithi ö.”
^ Heb., “itre kona ne la itre gojeny.”
