Itre Huliwa Ne La Itre Aposetolo 9:1-43
9 Nge pine laka, Saulo pala hi a qanangazone la itretre drei Joxu me catre thele troa humuthi angatr, angeic a tro ju kowe la atre huuje ka sisitria,
2 me sipone la itre tus thatraqane la itre sunago ne Damaseko nyine aijijë angeice troa othe me tro fë Ierusalema eë la itre trahmanyi me föe ka sine la hmi hna hape, Gojeny.
3 Nge ame la angeic a tro me easenyin e Damaseko, fetra pi hi la lai qa hnengödrai a hudrume xötreithi angeic.
4 Ame hnei angeic hna kei pi hnadro eë me drenge la aqane ewekë, kola hape: “Saulo, Saulo, hnauëne la eö a akötrë ni?”
5 Sa jë hi Saulo ka hape: “Drei nyipë Joxu?” Öni nyidrëti jë hi: “Eni Iesu, lo hnei eö hna axösisin.
6 Ngo mejë jë, nge tro jë kowe la traon, nge tro pë hë a qaja koi eö la nyine kuca.”
7 E cili, sesëkötre ju hi la itre sinetronge i angeic nge pëkö trene mej. Ketre, drenge hi angatr la aqane ewekë, ngo pëkö hna öhn.
8 Ame hna mejë hmaca hnei Saulo, ngo ti hë la luemeke i angeic, ngacama ka goe hi. Matre angatr a ce eatrongë angeice ju a tro Damaseko.
9 Nge köni drai ne tha goe angeic, me tha xen me ij.
10 Nge e Damaseko fe la ketre atre dreng, Anania la ëjen, nge önine la Joxu koi angeic ngöne la hna meköle goeëne ka hape: “Anania!” Sa jë hi angeic ka hape: “Eni hi la Joxu.”
11 Önine jë hi la Joxu ka hape: “Mejë jë, nge tro jë kowe la hmene gojenyi hna hape, Meköt, nge hnine la hnalapa i Iudra, thele jë la ketre trahmany, Saulo la ëjen, atre Taraso. Ke hanawang! angeic a thith,
12 nge hnei angeic hna meköle goeëne la ketre atr, Anania, a kola traqa me ati ime hui angeic matre goe hmaca pi angeic.”
13 Ngo sa jë hi Anania ka hape: “Joxu, anyimua drei mejene hë ni la atre cili, me aqane axösisin angeice la itre atre i nyipë ka hmitrötr e Ierusalema.
14 Nge enehila, hna nue angeic hnene la itre tane i angetre huuje troa othe la itre ka hëne la ëje i nyipë.”
15 Ngo önine la Joxu koi angeic: “Tro jë, ke hnenge hna iëne la atre cili troa tro fë trongëne la ëjeng kowe la itre nöj, me itre joxu, me itre nekö i Isaraela.
16 Nge tro ni a amamane hnyawa koi angeic la nöjei akötr hnei angeic hna troa melën pine la ëjeng.”
17 Ame hnei Anania hna tro pi me lö hnine la uma, me ati ime hui Saulo, me hape: “Saulo, trejin, hnene la Joxu Iesu ka mama koi eö ngöne lo eö pala kö ngöne la gojeny, hna upi ni matre goe hmaca jë eö, nge matre tiqa pi eö hnei uati hmitrötr.”
18 Nge e cili, mala pi hi qa ngöne la lue meke i angeic la itre ewekë kösë enieni ne i, ame hnei angeice hna goe hmaca pi. Qa ngöne lai, mejë jë hi angeic me bapataiso.
19 Matre angeic a xeni ju nge egöcatre hmaca ha.
Nyimu drai ne lapa angeice memine la itretre dreng e Damaseko.
20 Qane ju hi lai, angeic a canga qeje Iesu jë hnine la itre sunago me hape, Iesu hi la Nekö i Akötresie.
21 Nge kola hai hnene la nöjei atr ka drei angeic me ihnyingënekeune ka hape: “Tha angeice kö lo ka axösisine la itre ka qaja la ëje cili e Ierusalema? Nge tha tronge i angeice kö lo troa othi angatr, me uti sai angatr kowe la itre tane i angetre huuj?”
22 Nge Saulo pala hi a maca trotro ngöne la huliwa ne cainöj, matre pë ju hi hna atreine sa hnene la angetre Iudra ka mel e Damaseko, ke angeic a amamane hnyawa laka, Iesu hi la Keriso.
23 Nge thupene la itre drai, hnene la angetre Iudra hna ce thele troa humuthi angeic,
24 ngo atre hë Saulo. Matre hnei angatre hna thupëne la qëhnelö e lai me jidr göi troa humuthi angeic.
25 Ame hnene la itretre drei i angeic hna xomi angeic e jidr, me ami angeic ngöne itrengen, me autinyi angeice qa ngöne la ketre mamala ne la itra etë ne la traon.
26 Matre ame ju hi la angeic a traqa e Ierusalema, hnei angeic hna isine troa iöhnyi me itretre dreng, ngo xou i angatre pe, ke tha mejiune kö angatre laka, ketre atre drenge fe hë angeic.
27 Ame hna xatua angeic hnei Banaba, me troxomi angeic kowe la itre aposetolo. Angeic a qaja jë koi angatr la aqane öhnyi Joxu hnei angeic ngöne la gojeny, memine la hna qaja hnei Joxu, me aqane catre angeic tro fë trongën e Damaseko la ëje i Iesu.
28 Matre angeic a pane lapa ju me angatr, me tro amamanyi* e Ierusalema, me qaja catrëne la ëje i Joxu.
29 Nge angeic a ithanata me isi ithanata memine la angetre Iudra ka qene Geres, ngo angatre pe a thele troa humuthi angeic.
30 Matre ame hë la kola öhne lai hnene la itre trejin, angatr a xomi angeice jë a tro Kaisaria, me upi angeice Taraso eë.
31 Ame hna tingetinge pi la itre ekalesia e Iudra, me Galilaia, me Samaria; nge itre ej a kökötr, nge kolo pala hi a elë la etrune la itretre dreng, ke angatr a xoue Iehova,* me mele thenge la mene ne la uati hmitrötr.
32 Ame ngöne la Peteru a trongëne la nöj asë, traqa ju hi angeic e Lida, götran hna mele ngön hnene la itre xa atre ka hmitrötr.
33 Nge e cili fe la ketre trahmany, Ainea la ëjen, nge eitre hë lao macatre ne angeic a meköle ili, ke ka genyi la ngönetrei angeic.
34 Öni Peteru jë hi koi angeic: “Ainea, Iesu Keriso a aloinyi eö. Mejë jë nge nyihnyawane pi la ili eö.” Ame hnei angeic hna canga mejë jë.
35 Matre ame hë la kola öhnyi Ainea hnene la itre ka lapa e Lida me e Sarona, mejiune jë hi angatr koi Joxu.
36 Nge e Iopa la ketre atre dreng, Tabitha la ëjen, nge e tro sa ujën kola hape, Doreka.* Ka majemine catre angeic hamëne la itre ahnahna ne utipin hnei angeice hna kuca.
37 Ngo ngöne la ijine cili, wezipo ju hi angeic me mec, matre angatr a sië angeice jë me ami angeic ngöne la hnahag ka he hun.
38 Nge pine laka, tha nanyi kö Lida qaa Iopa, ame la kola atre hnene la itretre dreng laka, Peteru e cili, angatr a upe pi la lue atr koi angeic matre troa qaja ka hape: “Canga traqa pi koi hun.”
39 Haawe, mejë jë hi Peteru me xötrethenge nyidro. Nge ame ju hi la angeic a traqa, angatr a elë sai angeice jë kowe la hnahag; nge itre sine föe a treij, me isa qeje pengö i angatr, me amamane la itre iheetr* hnei Doreka hna ce cane me angatr.
40 Ame hnei Peteru hna upi angatr asë qa hnine la hnahag, me sa iwatingöne ca, me thith. Thupene lai angeic a ujë jë kowe la wezipo me hape: “Tabitha, mejë jë.” Haawe, goe pi hi angeic, matre ame ju hi la angeic a öhnyi Peteru, mejë jë hi angeic.
41 Peteru a li ime pi koi angeic, me amejë angeic, me hëne la itre ka hmitrötr, me itre sine föe, me amamane koi angatr laka, mele hmaca ha Tabitha.
42 Ame hna hlemu ngöne la nöje Iopa asë la ewekë cili, matre ala nyimu la itre ka hane mejiune kowe la Joxu.
43 Nge Peteru a pane lapa ju e Iopa thene la ketre atre ka huliwa kupeine öni, Simona la ëjen.
Itre mekun ecahu fen
^ Ger., “tro ngöne Ierusalema me tro e trön.”
^ Ame lai qene Geres, Doreka, memine la qene Arama, Tabitha, tre kola hape, Drube.
^ Maine, “iheetre ka qea.”
