Levitiko 11:1-47
11 Thupene lai, öni Iehova jë hi koi Mose me Arona:
2 “Hape jë kowe la angetre Isaraela: ‘Hane hi la itre öni ka mel hune la ihnadro* nyine tro epuni a öni:
3 Itre öni ka hetre itine wanakoca hna kui,* nge ka hutre hmaca la hna xen, ke ijije hi troa öni.
4 “‘Nge qa ngöne la itre öni ka hutre hmaca la hna xen, maine itre öni ka hetre itine wanakoca hna kuie, hane hi la itre öni nyine tha tro kö epuni a öni, ene la kamela ka hutre hmaca la hna xen, ngo tha hna kuie kö la itine wanakoca. Tro hë ej a pui ngazo koi epun.
5 Memine la shefani,* ke ej a hutre hmaca la hna xen, ngo tha hna kuie kö la itine wanakoca. Nge tro hë ej a pui ngazo koi epun.
6 Memine la lapë, ke ej a hutre hmaca la hna xen, ngo tha hna kuie kö la itine wanakoca. Nge tro hë ej a pui ngazo koi epun.
7 Memine la puaka, ke hna kuie hnyawane la itine wanakocan ej, ngo tha ka hutre hmaca la hna xen. Nge tro hë ej a pui ngazo koi epun.
8 Tha tro kö epuni a öni la ijön* ne la itre öni cili, me ketr la öni ka mec. Nge tro hë itre ej a pui ngazo koi epun.
9 “‘Hane hi la itre öni ka mel ngöne la itre tim nyine tro epuni a öni, ene la nöjei öni ka hetre fëthin me enienin, ngöne la itre hnagejë me itre hneopegejë, ijiji epuni hi troa öni.
10 Ngo ame la itre öni ka pë fëthin me enienin, ngöne la itre hnagejë me ngöne la itre hneopegejë, me itre neköi öni ka nyimutre, memine la itre xaa öni ka mel ngöne la itre tim, tro hë itre ej a sis koi epun.
11 Eje hi, tro hë itre ej a sis koi epun. Nge tha tro kö epuni a öni la ijön itre ej, nge tro epuni a sisine la ngönetrei ne la öni ka mec.
12 Nge ame la nöjei öni ka mel ngöne la itre tim, nge ka pë fëthin me enienin, ke tro hë itre ej a sis koi epun.
13 “‘Hane hi la itre öni ka hetre iapen* nyine tro epuni a sisin; tha tro kö epuni a öni ke ka pui ngazo itre ej, ene la aeto, me perese, me votur ka wetrewetr,
14 memine la daa ka madra, me nöjei pengöne daa ka wetrewetr,
15 me nöjei pengöne halo,
16 memine la iaena,* me men, me muet, me nöjei pengöne huzu,
17 memine la neköi men, me salak, me men ne hnagejë,
18 memine la siny, me kati, me votur,
19 memine la sigony, me nöjei pengöne hero, memine la dukifath, me xeti iap.
20 Nge ame la nöjei öni* ka nyimutre nge ka hetre iapen, nge ka 4 lao wacan, ke tro hë itre ej a sisi koi epun.
21 Qa ngöne la itre öni ka nyimutre nge ka hetre iap, nge ka 4 lao wacan, ijiji epuni troa öni la itre öni ka qea la lue ca, nge ka sesësesë.
22 Hane hi la itre öni nyine tro epuni a öni, ene la nöjei pengöne sipa ka sesë, me itre sipa nyine öni, me nöjei pengöne haregol me sipa.
23 Nge tro epun a sisin la nöjei öni ka nyimutre nge ka hetre iap, nge ka 4 lao wacan.
24 Nge tro hë epuni a pui ngazo hnene itre la öni cili. Nge ame la atre ketr la itre öni cili ka mec, tro hë angeic a pui ngazo uti hë e hej.
25 Nge ame la atre hleme la öni cili ka mec, ke tro angeic a wasine la itre iheetre i angeic, nge tro hë angeic a pui ngazo uti hë e hej.
26 “‘Ame la nöjei öni ka hetre itine wanakoca hna kuie, ngo tha hna kuie asë kö, nge tha ka hutre hmaca kö la hna xen, tro hë itre ej a sis koi epun. Nge ame la atre ketr itre ej, tro hë angeic a pui ngazo.
27 Nge thene la itre öni ka 4 lao wacan nge ka tro, ame la nöjei öni ka tro hnene la 4 lao wacan,* tro hë itre ej a pui ngazo koi epun. Nge tro ha pui ngazo uti hë e hej la atr ketr la itre öni cili ka mec.
28 Nge ame la atr ka troa kapa la öni ka mec cili, ke tro angeic a wasine la itre iheetre i angeic, nge tro hë angeic a pui ngazo uti hë e hej, me pui ngazo koi epun.
29 “‘Hane hi la itre öni ne hnadro ka nyimutre nge ka pui ngazo koi epun, ene la holed, me aji, me nöjei pengöne thu,
30 ene la thu atraqatr, memine la thu ne hnangöni, me othing, me hometa, me tinesemeth.
31 Ame la itre öni cili ka nyimutre, tro itre ej a pui ngazo koi epun. Nge ame la atre ketr la itre öni cili ka mec, tro hë angeic a pui ngazo uti hë e hej.
32 “‘Nge e tro la ketre öni cili ka mec a mala hune la ketre ewekë, maine sinöe, maine iheetr, maine ikupeine öni, maine ibëek ka tru thenyin, maine ketre ewekë kö hna huliwan, tro ha trapin ej ngöne la tim, nge tro hë ej a pui ngazo uti hë e hej. Thupene lai, tro hmaca ej a pui loi.
33 Maine tro itre ej a mala hnine la ketre trengen hna xup hnei dro ka fedr, tro hë epuni a thëtrij, nge tro ha pui ngazo la alien ej.
34 Nge tro ha pui ngazo, la nöjei xen hna fii hnene la tim hna xom qa ngöne la trengene cili. Nge ame asë hi la itre nyine ij hna qatreng ngöne la trengene cili, tro ha pui ngazo.
35 Nge tro ha pui ngazo la nöjei ewekë hna mala tran hnene la itre öni cili ka mec, ngacama ifur ju hë, maine hnë öl, ngo tro ha thëtrij ke pui ngazo hë, nge tro pala hi ej a pui ngazo koi epun.
36 Ngo ame la qeqe ne tim memine la sima, tro kö lue ej a pui loi. Ngo ame la atr ka troa xometrije la öni ka mec qa cili, tro hë angeic a pui ngazo.
37 Nge maine tro la öni ka mec a mala hune la ketre wene feja nyine tran, tro kö ej a pui loi.
38 Nge maine hna fii la wene feja hnei tim, nge kola mala la ketre sine la ngönetrei ne la öni ka mec hune la wene feja, tro hë ej a pui ngazo koi epun.
39 “‘Nge maine kola mec la ketre öni hna aijijë epuni troa öni, tro la atr ka ketr la ngönetrei ne la öni cili a pui ngazo uti hë e hej.
40 Nge ame la atr ka troa öni la öni ka mec, tro angeic a wasine la itre iheetre i angeic, nge tro hë angeic a pui ngazo uti hë e hej. Nge ame la atr ka troa kapa la öni cili ka mec, ke tro angeic a wasine la itre iheetre i angeic, nge tro hë angeic a pui ngazo uti hë e hej.
41 Nge ame la nöjei öni ne hnadro ka nyimutre, ke ka sisi lai koi epun. Nge tha tro kö epuni a öni itre ej.
42 Tha tro kö epuni a öni la itre öni ka wewë, nge ka 4 lao wacan, me itre öni ne hnadro ka nyimutre nge ka nyimu wacan, ke itre öni lai ka sis koi epun.
43 The tro kö epuni a pui ngazo hnene la itre öni ka nyimutre, nge the adronyi epuni kö, nge the apuingazonyi epuni kö hnen itre ej,
44 ke Iehova ni Akötresi epun. Ahmitrötrë epuni jë, nge tro hë epuni a hmitrötr, ke hmitrötre ni. The tro kö epuni a pui ngazo hnene la itre öni ne hnadro ka nyimutre.
45 Ke Iehova ni, atre xomi epun qa Aigupito, matre amamane koi epun laka, Akötresieti ni. Loi e tro epuni a hmitrötr, ke hmitrötre ni.
46 “‘Celë hi wathebo göne la itre öni ka 4 lao wacan, me itre öni ka hetre iapen, me nöjei öni ka mel ngöne tim, me nöjei öni ne hnadro ka nyimutre,
47 matre isa amamane la ewekë ka pui ngazo me ka pui loi, me itre öni nyine öni, me itre öni nyine tha tro kö a öni.’”
Itre mekun ecahu fen
^ Maine, “zi ne la itre öni.”
^ Maine, “hna thawaluën.”
^ Ketre öni ka ceitu memine la lapë nge ka mel ngöne la itre git.
^ Maine, “mitr.”
^ Ene la itre öni ka sesë e koho hnengodrai.
^ Maine, “otiric.” Ketre waco atraqatr ka thatreine sesë.
^ Maine, “itre ha neköi öni.”
^ Ene la itre öni ka pë itine wanakoca hna kuie.
