Levitiko 6:1-30
6 Nge öni Iehova hmaca koi Mose, ka hape:
2 Maine tro la ketre atr a kuca la ngazo, me tha mele nyipici koi Iehova ngöne la angeic a iaöne la atre lapa easenyi angeic, göne la ketre ewekë hna ahnithe koi angeic, nge maine tro angeic a atrekënö maine kötre fë la itre ewekë ne la atre lapa easenyi angeic,
3 nge maine tro angeic a öhne la ketre ewekë ka patr me thoi göne lai, nge maine tro angeic a kuca la ketre ngazo cili me sisinyi thoi, hane hi la nyine tro angeic a kuca:
4 Maine tro angeic a kuca la ngazo, nge angeic la atrekë zön, loi e tro angeic a bëeke fë la ewekë hnei angeic hna atrekënö, maine hna kötre fë, maine ketre ewekë hna ahnithe koi angeic, maine hnei angeice hna öhn,
5 maine nöjei ewekë hnei angeic hna sisinyi thoi fë. Qa i angeic troa të hmaca me nyixane hnene la sin* ne la thupene la ewekë cili. Nge tro angeic a hamën itre ej kowe la atrekë ewekën ngöne la drai ne kola qaja amamane la ngazo i angeic.
6 Nge qa i angeic troa tro fë kowe la atre huuj, la huuj ne ialoinekeun koi Iehova, ene la mamoe trahmanyi ka pë engazon hna xome qa ngöne la itre öni ka co, thenge la thupene hna athip thatraqane la huuj ne ialoinekeun.
7 Nge tune la hna majemine kuca, tro la atre huuj a kuca la huuj ne ialoinekeun thatraqai angeic, qëmekei Iehova. Nge tro ha nue la nöjei ngazo i angeic.”
8 Nge öni Iehova hmaca koi Mose:
9 “Hape jë koi Arona me itre nekö i angeic: ‘Hane hi la hna amekötin göne la huuj ne dreuth asë: Tro la huuj ne dreuth asë a lapa hune la eë ne la ita ne huuj ngöne la jidr ka pexej, uti hë e hmakany. Nge tro pala hi a mel la eë hune la ita ne huuj.
10 Nge qa ne la atre huuj, troa heetrëne lo iheetr hna kuca hnei nyipi lino thatraqane la huliwa i angeic. Nge tro angeic a heetrëne la sine itrauziz hna kuca hnei lino,* matre juetrëne la ngönetrei angeic. Nge tro angeic a xometrije la hnatresij* ne la huuje ne dreuth asë, ene lo öni hna dreuth hune la ita ne huuj, nge troa amë itre ej ezine la ita ne huuj.
11 Thupene lai, tro angeic a una la itre iheetre i angeic, me heetrëne la itre xa iheetr. Nge tro angeic a tro fë la hnatresij tröne la lapa, ngöne la götrane gaa hmitrötr.
12 Nge tro pala hi a mel la eë hune la ita ne huuj, tha tro kö ej a pi. E nöjei hmakany, tro la atre huuj a amelene la itre sinöe me atë la huuj ne dreuth asë. Nge hune itre ej, tro angeic a huhajine la giris ne la itre huuj ne tingeting.
13 Tro pala hi a mel la eë hune la ita ne huuj, nge tha tro kö ej a pi.
14 “‘Hane hi la hna amekötin kowe la itre huuj ne la itre wene feja: qa ne la itre nekö i Arona troa tro fë itre ej koi Iehova qëmekene la ita ne huuj.
15 Tro la atre huuj a jeköth* hnei ca ihnatrapaime la farin ka lolo memine la sine la oel, memine asë la libanu* ka eje hune la huuje ne la itre wene feja. Nge tro angeic a huhajine itre ej hune la ita ne huuj, nyine ewekë ka pui loi koi Iehova, matre nyihatrene la huuj.
16 Thatraqai Arona pë hë me itre nekö i angeic la munëne la huuj, nge tro angatr a san la itre falawa hna tha levenën, me xen ngöne la götrane gaa hmitrötr, ene la ikur* ne la itat ne icasikeu.
17 Nge tha tro kö a nyi levenëne la itre falawa. Ke celë hi edrö hnenge hna hamë angatr, qa ngöne la itre huuj ne eë. Celë hi ewekë ka nyipi hmitrötr, tune la huuje thatraqane la ngazo, memine la huuj ne ialoinekeun.
18 Nge qa ne la itre nekö i Arona trahmanyi troa xen itre ej. Celë hi edrö i angatr me edröne la nöjei xötr thupei angatr, hna xome qa ngöne la itre huuj ne eë hna kuca koi Iehova. Nge ame la itre ka troa ketr itre ej,* ke tro ha hmitrötr.’”
19 Nge öni Iehova hmaca jë hi koi Mose:
20 “Hane hi la huuje hna troa tro fë koi Iehova hnei Arona me itre nekö i angeic, ngöne la drai ne kola troa ië* Arona: tro pala hi a tro fë la ca omera ne farin ka lolo, nyine huuj ne la itre wene feja, ca sin e hmakany, nge ca sin e hej.
21 Nge troa atron ej hnei oel ngöne falaipen. Nge tro eö a lomëne hnyawan ej memine la oel, me tro fë la huuje ne la itre wene feja hna atron, me thupathupa, nyine huuje ka pui loi koi Iehova.
22 Nge ame la atre huuj hna troa iën qa ngöne la itre nekö i Arona troa nyihna i nyidrë, ke tro fe angeic a hane kuca tun. Celë hi wathebo ka epine palua, ene la troa huhajin ej koi Iehova nyine huuj ka pexej.
23 Nge ame la itre huuj ne la itre wene feja hna kuca thatraqane la itre atre huuj, ke itre huuje lai ka pexej. Nge tha tro kö a xen itre ej.”
24 Nge öni Iehova hmaca koi Mose:
25 “Hape jë koi Arona me itre nekö i angeic: ‘Hane hi la hna amekötin göne la huuje ne ngazo. Troa humuth qëmekei Iehova la öni nyine huuje ne ngazo, ngöne la götran hna humuth la huuj ne dreuth asë. Celë hi ewekë ka nyipi hmitrötr.
26 Nge ame la atre huuj ka troa tro fë la huuje ne ngazo, tro angeic a öni la götrane mitr hna hnëkën koi angeic. Tro angeic a öni la mitr cili, ngöne la götrane gaa hmitrötr, ene la ikur ne la itat ne icasikeu.
27 “‘Nge ame la itre ka ketr la öni hna huujën, ke tro ha hmitrötr. Nge maine tro la madra ne la huuj a thuthu kowe la iheetre i angeic, loi e tro angeic a wasine ngöne la ketre götrane gaa hmitrötr, la nöjei ewekë hna thuthun hnene la madra.
28 Nge maine hna atrone la huuj ngöne la trengen hna xup hnei dro, ke tro ha thëtrij. Ngo maine hna atron ngöne la trengen hna xup hnei kopa, ke loi e troa wasine hnyawan ej me hnea ngöne tim.
29 Nge ame asë hi la nöjei trahmanyi ka xome la hnëqa ne atre huuj, tro angatr a isa öni la itre götrane mitr hna hnëkën koi angatr. Celë hi ewekë ka nyipi hmitrötr.
30 Ngo tha tro kö a öni la huuj ne ngazo, e hna tro fë la ketre sine la madran ej ngöne la itate ne icasikeu, matre nyine huuj ne ialoinekeun tune lo hna majemine kuca, ngöne la götrane gaa hmitrötr. Nge tro ha dreuth itre ej.
Itre mekun ecahu fen
^ Ene, “la 1/5 ne la thupene la ewekë.”
^ Maine, “iheetr ka hnin.”
^ Maine, “hnatresij ka si giris.” Ene lo girisine la itre huuj.
^ Maine, “jöe.”
^ Wange ju la HQP.
^ Maine, “e kuhu qëhnelö.”
^ Maine, “la itre huuj.”
^ Heb., “sië.”