Thenge La Hna Qaja Hnei Mataio 19:1-30
19 Thupene la Iesu a ase ithanatane la itre ewekë cili, nyidrëti a ea pi ngöne la götrane ngönegejë ne Ioridrano qa Galilaia, me tro thenge la öline* ne Iudra.
2 Nge e cili, hnene la ka ala nyimu hna xötrethenge nyidrë, ame hnei nyidrëti hna aloinyi angatre ju.
3 Nge traqa pi hi la itre Faresaio troa tupathi Iesu, me hnyinge ka hape: “Hapeu, meköti kö tro la trahmanyi a sei hna cil me föe hmunë pine la nöjei kepin asë?”
4 Sa jë hi Iesu ka hape: “Ke hnauën, tha hane kö nyipunieti e ka hape, ame ngöne lo qaan, hnene la atre xup hna isa xupi nyidro, trahmanyi me föe
5 me hape: ‘Celë hi matre, tro la trahmanyi a nue la keme me thine i angeic, me fedre kowe la föi angeic, nge tro nyidroti a ca ngönetrei’?
6 Matre tha ala lue hmaca kö, ngo ca ngönetrei hë nyidro. Haawe, ame la hnei Akötresieti hna isilekeun, tha tro kö a senge hnei ketre.”
7 Matre öni angatre jë hi: “Nga hnauëne kö laka, hnei Mose lo hna aijijëne troa hetre tusi ne triji föe?”
8 Sa jë hi Iesu ka hape: “Ke hnene laka catre la itre hni nyipunie, matre hnei Mose hna aijijë nyipunie troa triji föe, ngo tha ewekë kö lai hna amekötin ngöne la qaan.”
9 Eni hi la a qaja hnyawa koi nyipunie laka, ame la atre sei hna cil me föe hmunë, ngo tha hna kuci ngazo kö,* me xome hmaca la ketre föe, angeice hi lai a nyixetë.
10 Önine jë hi la itretre dreng: “Maine pengöne hi la lue trefëne lai, nyine ue la troa faipoipo?”
11 Öni Iesu hmaca jë: “Ngo ame pe, tha nöjei atr asë kö la ka atreine kapa la mekune cili, ngo kolo hmekuje hi lo itre hnei Akötresieti hna aijijën.
12 Hetre itre xan laka, tha* faipoipo kö angatr ke hetre engazone la ngönetrei angatr lo kola hnahon, nge ame itre xan, hna traqa tun ke hnei atr, nge ame pena itre xan, angatr a lapa pë fö, pine la Baselaia ne hnengödrai. Matre ame la ka atreine kapa lai, kapa ju.”
13 Ame hna tro fë pi koi Iesu la itre nekönatr, matre tro nyidrëti a ati ime hui nyudreni me thith, ngo hnene la itretre dreng hna wesitrëne la itre keme me thin.
14 Ene pe, Iesu a qaja ju koi angatre ka hape: “Nue nyudreni pi, the sewe nyudreni kö troa tro koi ni, ke thatraqane la itre ka tui nyudreni la Baselaia ne hnengödrai.”
15 Nyidrëti a ati ime ju hui nyudreni me tro qa lai.
16 Nge hanawang! Xulu pi hi la ketre thupëtresij a qaja koi nyidrë ka hape: “Atre Ini fe, nemene la ewekë ka lolo nyine tro ni a kuca matre hetrenyi ni la mele ka pë pun?”
17 Öni Iesu jë hi ka hape: “Hnauëne la eö a hnyinge koi ni ka hape, nemene la ka lolo? Casi hi la ka lolo, a Akötresie hmekuje hi. Ngo maine eö a ajane troa mel, catre pi eö trongëne la itre wathebo.”
18 Matre hnyinge jë hi angeice ka hape: “Nemene wathebo?” Öni Iesu jë hi: “The ihumuthi kö, the nyixetë kö, the atrekënö kö, nge the silitrengathoi ketre kö,
19 metrötrëne ju la keme me thine i eö, nge qa i eö troa hnime la atre lapa easenyi eö tui eö hi.”
20 Önine jë hi lai thupëtresij koi Iesu ka hape: “Ka trongëne hë ni la nöjei ewekë cili, matre nemene pe kö la nyine tro ni a kuca?”
21 Sa jë hi Iesu ka hape: “Ca ewekë pe hi matre pexeje pi eö, tro jë, nge salemëne pi la itre ewekë i eö, nge hamëne pi kowe la itre ka pë ewekë. Tro hë eö lai a hetre mo e hnengödrai, nge jë fe, xötrethenge ni jë.”
22 Ngazo pe, ame hë la angeic a drenge lai, hace pi hi la hni angeic, ke tru catr hnei mo i angeic.
23 Thupene lai, Iesu a qaja jë kowe la itretre dreng ka hape: “Eni a qaja hnyawa koi nyipunie laka, ka jole catr kowe la trenamo troa lö kowe la Baselaia ne hnengödrai.
24 Eni hmaca a qaja, hmaloi kö kowe la kamela troa lö qa ngöne la gaa xulu* ne nilan, hune la trenamo troa lö kowe la Baselaia i Akötresie.”
25 Drenge ju hi lai hnene la itretre dreng, nge isa öni angatre jë hi: “Nga drei hö la hna troa amelen?”
26 Iesu a goeë angatre hnyawa ju me hape: “Thatreine kö la atr troa iamele, ngo ame Akötresie, pëkö hnei nyidrëti hna thatrein.”
27 Ame hnei Peteru hna sa ka hape: “Hanawang! Ase hë huni nu asë troa xötrethenge nyipë, matre tro ju hë huni a kepe nemen?”
28 Matre sa jë hi Iesu koi angatre ka hape: “Eni a qaja hnyawa koi nyipunie laka, ame ngöne la ijine troa ahnyipixene asë, lo ijine tro la Nekö i Atr a lapa hune la therone ka lolo i angeic, tro fe nyipunie, itretre xötrethenge ni a hane lapane la 12 lao theron, me amekötine la 12 lao tribu ne Isaraela.
29 Nge ame la atre nue uma, me trejin, me xa, me kem, me thin, me ha nekönatr, me nöj pine la ëjeng, tro ha ca hadredre lao kapa hnei angeic la itre ewekë cili, nge tro fe angeic a kapa la mele ka pë pun.
30 Ngo ame lo itre ka tro pa, tro pena ha a tro pi, nge ame ange ka tro pi, tro pena ha a tro pa.
