Nehemia 12:1-47
12 Hane hi la itre atre huuj me angetre Levi ka ce bëeke me Zerubabela, itre nekö* i Sealetiela me Iesua: Seraia, me Ieremia, me Ezera,
2 me Amaria, me Maluka, me Hatusa,
3 me Sekania, me Rehum, me Meremoth,
4 me Ido, me Ginetho, me Abia,
5 me Miamin, me Maadai, me Bilega,
6 me Semaia, me Ioiarib, me Iedaia,
7 me Salu, me Amok, me Hilekia, me Iedaia. Itre tane lai thene la itre atre huuj, me itre trejin me angatr, ngöne la ijine i Iesua.
8 Hane hi la angetre Levi: Iesua, me Binui, me Kademiel, me Serebia, me Iudra, me Matania. Matania la tane nyima kowe la itre nyima ne ole, me itre trejin me angeic.
9 Nge ame Bakebukia me Uni, lo lue trejine me angatr, nyidroti a cile qëmeke i angatr troa thup.*
10 Nge Iesua la keme i Ioiakim, nge Ioiakim la keme i Eliasiba, nge Eliasiba la keme i Iehoiada,
11 Iehoiada la keme i Ionathana, nge Ionathana la keme i Iadua.
12 Hane hi la itre tixe ne lapa thene la itre atre huuj ngöne la ijine i Ioiakim: Qaathei Seraia, Meraia, qaathei Ieremia, Hanania,
13 qaathei Ezera, Mesulama, qaathei Amaria, Iohanana,
14 qaathei Meliko, Ionathana, qaathei Sebania, Iosefa,
15 qaathei Harim, Adena, qaathei Meraioth, Helekia,
16 qaathei Ido, Zakaria, qaathei Ginethon, Mesulama,
17 qaathei Abia, Zikeri, qaathei Miamin, . . .,* qaathei Moadia, Piletai,
18 qaathei Bilega, Samua, qaathei Semaia, Ionathana,
19 qaathei Ioiarib, Matenai, qaathei Iedaia, Uzi,
20 qaathei Salai, Kalai, qaathei Amok, Heberu,
21 qaathei Hilekia, Hasabia, qaathei Iedaia, Nathaniela.
22 Hna sija la itre tixe ne lapa thene la angetre Levi me itre atre huuj, hmekune la ijine i Eliasiba, me Iehoiada, me Iohanana, me Iadua, uti hë la ijine mus i Dariu atre Peresi.*
23 Ame la itre tixe ne lapa thene la angetre Levi, hna siji ëje i angatr ngöne la tusi ne aqane mele ne la nöj, uti hë la ijine i Iohanana nekö i Eliasiba.
24 Hane hi la itre tan la angetre Levi: Hasabia, me Serebia, me Iesua nekö i Kademiel. Itre trejine me angatr a cile qëmeke i angatr troa atrun, me olene koi Akötresie, thenge lo hna amekötin hnei Dravita, atre ne la nyipi Akötresie. Nge kola cile la ketre gurup ne thup, ezine la ketre.
25 Matania, me Bakebukia, me Obadia, me Mesulama, me Talemon, me Akub a thupë qëhnelö. Angatr a thupëne la itre hnahage ne ami mo, ezine la itre qëhnelö ne la uma ne hmi.
26 Angatr a huliwa ngöne la ijine i Ioiakim nekö i Iesua, nekö i Iozadaka, me ngöne la ijine i Nehemia gavena, me Ezera atre huuj me atre feja itus.
27 Ame ngöne la ijine kola xötrei fe la ihag ne Ierusalema, hna thele la angetre Levi ngöne la nöjei götran hnei angatr hna lapan, nge hna xomi angatr a tro Ierusalema, matre troa feetëne madrine la ijine löthe la ihag, me nyimane la itre nyima ne ole, me elone la itre sëbal, me itre nyine elo miuzik ka hetre filen, me itre arp.
28 Ame hnene la itre neköne la itre ka nyima* hna icasikeu, hnei angatr hna traqa qa ngöne la itre götrane gaa papa* xötreithi Ierusalema, me itre hunahmi ne la angetre Netofa,
29 me qa Bethe-gilegala, me itre hlapa e Geba me Azemaveth, ke hnene la itre ka nyima hna xupi hunahmi xötreithi Ierusalema.
30 Hnene la itre atre huuj me angetre Levi hna ahmitrötrë angatr, nge angatr a ahmitrötrëne ju fe la nöj, me itre qëhnelö, memine la ihag.
31 Ame hnenge hna upe la itre he ne nöj ne Iudra troa elë hune la ihag, nge hnenge hna thawa la lue gurup ka nyima, matre nyimane la itre nyima ne ole. Nge hetre itre atr ka xötrethenge la lue gurup ne nyima. Hnene la ketre gurup ka nyima hna tro ngöne la götrane maca ne la ihag, uti hë la Qëhnelö Ne La Itre Ita Hnatresij.
32 Nge kola xötrethenge angatr hnei Hosaia, memine la sine la itre he ne nöj ne Iudra,
33 me Azaria, me Ezera, me Mesulama,
34 me Iudra, me Beniamina, me Semaia, me Ieremia.
35 Ce angatr me itre xa neköne la itre atre huuj ka xomi trutru, ene Zakaria, nekö i Ionathana, nekö i Semaia, nekö i Matania, nekö i Mikaia, nekö i Zakuri, nekö i Asafa,
36 me itre trejin me angeic, ene Semaia, me Azareela, me Milalai, me Gilalai, me Maai, me Nathaniela, me Iudra, me Hanani, memine la itre nyine elo miuzik i Dravita, lo atre ne la nyipi Akötresie. Nge Ezera atre feja itus, la ka wejemekene la tronge i angatr.
37 Nge ngöne la Qëhnelö Ne La Qeqe ne Tim, hnei angatr hna tro meköt me elëne la eskalie ne la Traone i Dravita, me elëne la hna elë kowe la ihag e koho hune la hnalapa i Dravita, uti hë la Qëhnelö Ne La Tim e koië.
38 Nge hnene la ketre gurup ka nyimane la itre nyima ne ole, hna tro kowe la ketre götran.* Hnenge pë hë hna xötrethenge angatr memine la ketre sine la ka ala nyium. Hne huni hna tro hune la ihag, me hune la Ita Ne Thup Ne La Hnë Sa Falawa, uti hë la Ihag Ka Isaisa.
39 Nge hne huni hna tro hune la Qëhnelö Ne Eferaima, uti hë la Qëhnelö Ne La Traone Hnapan, memine la Qëhnelö Ne La Itre i, uti hë la Ita Ne Thup i Hananel, memine la Ita Ne Thup i Mea, memine la Qëhnelö Ne La Itre Mamoe. Nge hne huni hna hmekune la Qëhnelö Ne La Itre Ka Thup.
40 Ame hnene la lue gurup ka nyimane la itre nyima ne ole, hna cil qëmekene la uma ne hmi ne la nyipi Akötresie. Nge hne huni fe hna cil, eni memine la sine la itre ka isenyin,
41 me itre atre huuj, Eliakima me Maseia, me Miamin, me Mikaia, me Elioenai, me Zakaria, me Hanania, lo itre ka xomi trutru,
42 me Maseia, me Semaia, me Eleazara, me Uzi, me Iohanana, me Malekia, me Elama, me Ezera. Nge ame la itre ka nyima, angatr a nyima catr, nge Iezeraia la ka iuji angatr.
43 Ngöne la drai cili, hnei angatr hna tro fë atrune la itre huuj, me madrin, ke hnene la nyipi Akötresie hna thue madrine ka tru koi angatr. Itre föe me itre nekönatre fe a hane madrin, matre kola drenge qaa gaa nanyi la trenge madrine i Ierusalema.
44 Ngöne la drai cili, hna acile la itre trahmanyi troa thupëne la itre hnahag ne ami ahnahna, me itre pane wene hna menuën, memine la sine* hna traqa fë. Qa i angatr troa kapa e cili la itre xa hna menuën,* qa ngöne la itre hlapa xötreithe la itre traon, ene lo hna amekötin hnene la wathebo, thatraqane la itre atre huuj me angetre Levi. Eje hi, angetre Iudra a madrin, ke itre atre huuj me angetre Levi a kuca la huliwa i angatr.
45 Hnei angatre hna nyiqaane kuca la itre xa huliwa i angatr koi Akötresie, me itre aqane iahmitrötrë. Nge hna tune fe hnei itre ka nyima me itre ka thupë qëhnelö, thenge lo hna amekötin hnei Dravita, me Solomona nekö i nyidrë.
46 Ke ame ekö, lo mele pala kö Dravita me Asafa, hetre tane nyima. Nge hnëqa i angatr troa wange la itre ka nyima, me itre nyima ne iatruny, me itre nyima ne ole koi Akötresie.
47 Nge ame ngöne la ijine i Zerubabela me Nehemia, angetre Isaraela asë a hamëne kowe la itre ka nyima me itre ka thupë qëhnelö, la itre ahnahna hna hnëkën koi angatr, thenge la ka ijij kowe la drai. Hna amë acone fe la itre ahnahna thatraqai angetre Levi, nge angetre Levi a amë acone la itre ahnahna thatraqane la itre matra i Arona.
Itre mekun ecahu fen
^ Maine jë, “la kola thup.”
^ Ma patre kö la ketre ëj ngöne la hna cinyihan qene heberu.
^ Ma Dariu 2.
^ Maine, “itre ka maca troa nyima.”
^ Götrane ka tro qa ngöne la gaa ipië ne la hnathup ne Ioridrano uti hë e Zoar. Heb., “distrik.”
^ Maine, “qëmeken.”
^ Maine, 1/10. Wange ju la HQP
^ Maine, “pane wen.” Wange ju la HQP.
