Numera 27:1-23
27 Ame hna traqa la itre nekö i Zelofeada jajiny, lo nekö i Hefera, nekö i Gileada, nekö i Makiri, nekö i Manase, qa ngöne la itre fami i Manase, lo nekö i Iosefa. Nge hane hi la ëjene la itre nekö i Zelofeada: Mala, me Noa, me Hogela, me Mileka, me Tireza.
2 Nge hnei angatr hna cile qëmekei Mose, me Eleazara atre huuj, me itre tan memine la nöj asë, ngöne la hnë lö ne la itat ne icasikeu. Nge öni angatr ka hape:
3 “Meci hë la keme hun ngöne la hnapapa, nge pekö nekö i nyidrëti trahmany. Ngo tha hnei nyidrëti kö hna hane sine la itre ka icilekeu me Iehova, lo itre ka ce xöl me Kora. Ngo hnei nyidrëti pe hna mec, hnene la sipu ngazo i nyidrë.
4 Matre hnauëne laka, kola apatrene la ëjene la keme hun qa ngöne la fami i nyidrë, ke pëkö nekö i nyidrëti trahmany? Ngo hamë huni pi la ketre hnepadro nyipine la itre trejin ne la keme hun.”
5 Ame hnei Mose hna tro fë la sipo i angatr koi Iehova.
6 Matre öni Iehova jë hi koi Mose:
7 “Nyipici hi la hna qaja hnene la itre nekö i Zelofeada. Qa i ö troa hamë angatr la ketre hnepadro nyipine la itre trejin ne la keme i angatr, me hamë angatr la edrö hna nue pe hnene la keme i angatr.
8 Nge qaja jë fe kowe la angetre Isaraela ka hape: “Maine tro la ketre trahmany a mec nge pëkö nekö i angeic trahmany, tro pë hë a nue la edrö i angeic kowe la nekö i angeice jajiny.
9 Ngo maine pëkö nekö i angeic jajiny, tro pë hë epuni a hamëne la edrö kowe la itre trejin me angeic.
10 Ngo maine pëkö trejin me angeic, qa i epun troa hamëne la edrö i angeic kowe la itre trejin ne la keme i angeic.
11 Nge maine pëkö trejin ne la keme i angeic, tro pë hë epuni a hamëne la edrö i angeic kowe la ketre sine la madra i angeic, nge tro pë hë la atre cili a kapa la edrö. Nge ame la wathebo celë, ke wathebo ka cile hut kowe la angetre Isaraela, tune lo hnei Iehova hna ahnithe koi Mose.”
12 Thupene lai, öni Iehova jë hi koi Mose: “Elë jë kowe la wetre celë ngöne la itre Wetr ne Abarima, nge pane goeëne jë la nöj hnenge hna troa hamën kowe la angetre Isaraela.
13 Nge e öhne hë eö la nöj, tro ha acasi ö memine la nöje i ö,* tui Arona trejin me eö.
14 Ke ame ngöne la hnapapa ne Zin, lo epuni a thele iwesitrë me ni, hnei epon hna icilekeu memine lo hnenge hna amekötin, göi troa ahmitrötrë ni qëmekei angatr, lo eni a anenine la tim e Meriba, e Kadesi, ngöne la hnapapa ne Zin.”
15 Matre öni Mose jë hi koi Iehova:
16 “Epi tro Iehova Akötresie atre hamëne la mel kowe la nöjei ewekë asë, a acile la ketre trahmany kowe la nöj
17 ka troa tro me lö qëmekei angatr, nge ka troa tro sai angatr me lö sai angatr, matre tha tro kö la nöje i Iehova a tune la itre mamoe ka pë atre thupën.”
18 Nge öni Iehova koi Mose ka hape: “Xomi Iosua jë nekö i Nuna, ketre trahmanyi ka ijij, nge atë jë la ime i ö hui angeic.
19 Acili angeice jë qëmekei Eleazara atre huuj, me qëmekene la nöj asë. Nge tro hë eö a acili angeic ngöne la hnëqa i angeic, qëmekei angatr asë.
20 Tro hë eö a hamëne la sine la musi ö, matre tro la angetre Isaraela a hane drei angeic.
21 Thupene lai, tro angeic a cil qëmekei Eleazara atre huuj, nge tro Eleazara a sipone la ixatua i Iehova göi angeic, jëne la Urim.* Nge thenge la hnei angeic hna amekötin, tro angatr a tro, nge thenge la hnei angeic hna amekötin, tro angatr a lö, angeic memine la angetre Isaraela asë.”
22 Ame hnei Mose hna kuca asë tune lo hnei Iehova hna amekötin koi angeic. Nge hnei angeic hna xomi Iosua, me acili angeic qëmekei Eleazara atre huuj, nge qëmekene la nöj asë.
23 Thupene lai, hnei Mose hna ati im hui Iosua, me acili angeic ngöne la hnëqa i angeic, tune lo hnei Iehova hna amekötin jëne Mose.
