Numera 35:1-34
35 Ame hnei Iehova hna ithanata hmaca koi Mose ngöne la hnapapa ne Moaba, ezine la hneopegejë Ioridrano, hmekun e Ieriko. Öni nyidrë:
2 “‘Upe jë la angetre Isaraela troa hamën qa ngöne la edrö i angatr, la itre traon hnë troa lapan hnene la angetre Levi. Nge xötreith la itre traone cili, tro fe angatr a hamën kowe la angetre Levi, la itre hnë axö öni.
3 Tro hë la angetre Levi a lapan la itre traone cili, nge troa amë la itre öni ka tru i angatr, me itre xaa öni i angatr, me itre mo i angatr ngöne la itre hnë axö öni.
4 Ame la itre hnë axö öni xötreith la itre traon hnei epuni hna troa hamëne kowe la angetre Levi, ke troa e la 1 000 kubit* qaane la ngöne uma ne la traon.
5 Nge trön la traon, qa i epun troa tuluth la 2 000 kubit ngöne la götrane koië, nge 2 000 kubit ngöne la götrane kolojë, nge 2 000 kubit ngöne la götrane kuë, nge 2 000 kubit ngöne la götrane kolopi. Nge ej e kuhu nyipine la traon. Celë hi la itre hnë axö öni ne la itre traon.
6 “Tro epuni a hamën la 42 lao traon kowe la angetre Levi, me 6 lao traon hnë kötre mel, matre tro la ka humu atr a kötre zae.
7 Haawe, qa i epun troa hamën kowe la angetre Levi la 48 lao traon, me itre hnë axö öni ka ce tro memin.
8 Ame la itre traon hnei epuni hna troa hamën, ke qa ngöne la zi ne la angetre Isaraela. Tro epuni a xom atrun qaathene la itre tribu ka tru, nge tro epuni a xom acon qaathene la itre tribu ka co. Tro la isa ca tribu a hamë traon kowe la angetre Levi, thenge la edrö hnei angatr hna isa kapa.
9 Öni Iehova hmaca jë hi koi Mose:
10 “Hape jë kowe la angetre Isaraela: ‘Tro epuni a sasaithe la hneopegejë Ioridrano, me lö kowe la nöje Kanana.
11 Qa i epun troa iëne hnyawane la itre xaa traon ka hmaloi e troa kötre mel, matre ijij kowe la ka humu atr nge tha hna thë kö, troa hane kötre zae e cili.
12 Ame la itre traon cili, ke nyine kötre mel, matre kötrene la atre ti madra,* nge matre tha tro kö a mec la ka humu atr, e tha hna pane kootrë angeice kö qëmekene la nöj.
13 Hane hi la aqane troa huliwane la itre traon ne kötre mel, hnei epun hna troa hamën.
14 Qa i epun troa hamën nyine traon ne kötr mel, la köni traon ngöne la götrane celë ne la hneopegejë Ioridrano, nge könitre ngöne la nöje Kanana.
15 Ame lo 6 lao traon ne kötre mel, ke thatraqane la angetre Isaraela, me kowe la trenyiwa ka lapa thei epun memine la itre atr ka traqa ngöne la nöje i epun, matre tro la ka humu atr, nge tha hna thë kö, a hane kötr kow ej.
16 “‘Maine tro la ketre atr a lepe la ketre atr memine la sine fao, nge meci ju hi angeic, ke ka humu atre lai. Haawe, tro ha humuthe la atre cili.
17 Nge maine tro la atre cili a trane la ketre hnei etë, nge meci pi hi angeic, ke ka humu atre lai. Haawe, tro ha humuthe la atre cili.
18 Nge maine tro pena la atre cili a lepe la ketre hnei sine sinöe, nge meci ju hi angeic, ke ka humu atre lai. Haawe, tro ha humuthe la atre cili.
19 “‘Qa ne la atre ti madra* troa humuth la ka humu atr. Ame hë la angeic a ixelë memine lai atre cili, qa i angeic troa humuth la atre cili.
20 Maine tro la ketre atr a methinëne me humuthi la ketre, hnene la hna uku angeic maine hna* pena la ketre ewekë,
21 nge maine tro pena la ketre atr a methinën me jenge la ketre, nge meci pi hi angeic, tro ha humuthe la atre ijei, ke ka humu atre lai. Nge e tro la atre ti madra a ixelë memine la ka ihumuth, ke qa i angeic troa humuthe la atre cili.
22 “‘Ngo maine tha hnei angeice kö hna thë troa ukune la atr, nge pëkö imethinë i angeic, nge maine hnei angeic hna hna la ketre ewekë, nge tha hna thë kö,
23 maine pena, tha öhne kö angeic laka, hnei angeic hna amalane la ketre etë, matre mala trane pi hi la ketre atr, nge meci pi hi la atre cili, ngo tha ithupëjia pena kö me angeic, nge pëkö ngazo hnei angeic hna mekun troa kuca kowe la atre cili,
24 haawe, tro hë la icasikeu a amekötin kowe la atre eatrën la ketre memine la atre ti madra, thenge la hna amekötine celë.
25 Tro hë la icasikeu a amelene la atre ihumuth, qa ngöne la ime ne la atre ti madra, nge tro angatr a abëekë angeic kowe la traon ne kötre mel, lo hnei angeic hna kötre zae. Nge tro hë angeic lapa e cili uti hë la kola mec hnene la atre huuj ka sisitria, lo hna siën hnene la oel ka hmitrötr.
26 “‘Ngo maine tro la atre ihmuth a tro trön la traon ne kötre mel, ngöne lo hnei angeic hna kötre zae,
27 nge maine tro la atre ti madra a öhn la ka ihumuth trön la traon ne kötre mel, me humuth i angeic, ke tha tro kö a nyi zöne la atre ti madra pine la hna mec hnene la atre cili.
28 Ke ame la ka humu atr, qa i angeic troa lapa ngöne la traon ne kötre mel, uti hë la kola mec hnene la atre huuj ka sisitria. Nge thupene la kola mec hnene la atre huuj, ijiji angeic hë troa bëeke hmaca kowe la zi i angeic.
29 Celë hi tulu nyine amekötin göne la nöjei xötr me ngöne la nöjei götran hnei epuni hna troa lapan.
30 “‘Ame la ka humu atr, ke tro ha humuthi angeic e hetre ka* öhnyi angeic; ngo tha tro kö a humuthi angeic, e casi hi la ka öhn.
31 Nge tha tro kö epuni a kapa la thupene mel kowe la atr humu atr nge hna amekötin troa humuth, ke tro ha humuthe la atre cili.
32 Nge tha tro kö epuni a kapa la thupene mel kowe la atr ka kötr ngöne la traon ne kötre mel, matre tro angeic a bëeke hmaca kowe la zi i angeic, e tha pane meci kö la atre huuj ka sisitria.
33 “‘Nge tha tro kö epuni a adrone la nöj hnei epuni hna lapan, ke kola adrone la ihnadro hnene la madra, nge tha ijije kö troa apuiloine* la nöj ke hna anenine la madra, ngo tro hi a apuiloin hnene la madra ne la atre anenin ej.
34 Haawe, tha tro kö epuni a adrone la nöj hnei epuni hna lapa ngön, memine la nöj hnenge hna lapan; ke Iehova ni, atre lapa nyipine la nöje Isaraela.’”
Itre mekun ecahu fen
^ 1 kubit: 44,5 cm. Wange ju la Xaa Ith. B14.
^ Wange ju la HQP.
^ Wange ju la HQP.
^ Heb., “kola thupë angeic.”
^ Heb., “që.”
^ Maine, “tha ijije kö troa iloi.”
