Numera 4:1-49
4 Nge öni Iehova koi Mose me Arona ka hape:
2 “Thene la itre nekö i Levi, troa e la itre nekö i Kohatha, thenge la itre fami i angatr, me itre lapa i angatr,
3 ene la itre trahmanyi ka 30 uti hë 50 lao macatre, nge ka sine lo lapa hna upe troa huliwa ngöne la itat ne icasikeu.
4 Hane hi la huliwa ne la itre nekö i Kohatha, ngöne la itat ne icasikeu. Huliwa lai ka nyipi hmitrötr.
5 Ame la angatr a fek qa ngöne la götran hnei angatr hna lapan, tro Arona me itre nekö i angeic a lö me tha la imaano ne thewe hnahag, matre heetrëne la Pua Ne Anyipicin.*
6 Nge tro angatr a amë e koho hune la isitr hna kuca hnei ikupeine fok,* me heetrën hnene la imaano ka bulu asë. Nge tro angatr a amë la itre tan nyine xututh.*
7 Nge tro angatr a seluthe la imaano ka bulu hune la laulau ne la itre falawa nyine amaman,* me atë hun ej la itre trepene xen, me itre ver, me itre kap, me itre djök kowe la waina nyine fii huuj; ngo tro pe kö a nue la itre falawa hune la laulau.
8 Nge tro angatr a seluth hune la itre ewekë cili, la ketre imaano ka madra palulu, me heetrëne la laulau hnene la isitr hna kuca hnei kupeine fok. Nge tro angatr a amë la itre tan nyine xututh.
9 Nge tro fe angatr a xome la imaano ka bulu, me heetrëne la ita ne laam nyine thina, me itre laam, me itre akof,* me itre trepene eë, me itre trengene oel thatraqane la itre laam.
10 Nge tro angatr a atuth ej, me itre ewekën ej, hnene la ketre isitr hna kuca hnei kupeine fok, nge tro angatr a amë la itre tan nyine xututh ej.
11 Nge tro angatr a seluthe la imaano ka bulu hune la ita ne huuje gool, me heetrën hnene la isitr hna kuca hnei kupeine fok, nge tro angatr a amë la itre tan nyine xututh.
12 Nge tro angatr a xome la itre ewekë hna huliwane lapaan ngöne la götrane gaa hmitrötr, me amë itre ej ngöne la imaano ka bulu, me heetrën hnene la isitr hna kuca hnei kupeine fok. Nge tro angatr a athip itre ej ngöne la tan nyine xututh.
13 Tro angatr a jeköthe la hnatresij* qa ngöne la ita ne huuj, me seluth e koho hune la imaano lino ka maea ngön.
14 Nge tro angatr a amë e koho hun la itre ewekë nyine huliwan: ene la itre trepene eë, me itre ifok, me itre pel, me itre kap, me nöjei jia ne huliwa ne la ita ne huuj; tro angatr a seluth hune la itre ewekë cili, la isitr hna kuca hnei kupeine fok, me amë la itre tan nyine xututh.
15 Nge ame hë la kola mejë hnene la nöj, tro Arona me itre nekö i angeic a afenesine troa heetrëne la götran gaa hmitrötr, me itre jia ne huliwa ne la götrane gaa hmitrötr. Nge tro hë la itre nekö i Kohatha a lö e koho hnin, me xututh itre ej, ngo tha tro kö angatr a ketr la götrane gaa hmitrötr, wanga tro angatr a mec. Ame la itre ewekë cili, ke atrekë hnëqane la itre nekö i Kohatha ngöne la itat ne icasikeu.
16 Nge hnëqa i Eleazara nekö i Arona atre huuj, troa wange la oel ne thina, memine la nyine dreu ka pui loi, memine la itre wene feja* nyine huuj, memine la oel nyine iën.* Hnëqa i angeic troa thupëne la uma maano, memine la nöjei ewekë e cili, memine la götran gaa hmitrötr, me itre jia ne huliwa.
17 Nge öni Iehova hmaca jë hi koi Mose me Arona:
18 “Wange kö ke apatrene pi la tribu ne la fami i angetre Kohatha, qaathene la angetre Levi.
19 Ngo kuca jë la ewekë celë koi angatr matre tro kö angatr a mel, nge tha tro kö angatr a mec, pine angatr easenyine la itre ewekë ka nyipi hmitrötr. Tro Arona me itre nekö i angeic a isa thewe huliwa i angatr, memine la nyine tro angatr a xututh.
20 Tha tro kö la angetre Kohatha a lö troa goeën, maine tro hi a aca goeëne la itre ewekë ka hmitrötr, wanga tro angatr a mec.
21 Nge öni Iehova hmaca jë hi koi Mose:
22 “Tro ha e la itre nekö i Geresoma thenge la itre lapa i angatr me itre fami i angatr.
23 Nge tro eö a sija la ëjene la itre trahmanyi ka 30 uti hë 50 lao macatre, itre hna upe troa huliwa ngöne la itat ne icasikeu.
24 Hane hi la nyine tro la angetre Geresoma a thupën, me nyine tro angatr a xututh.
25 Tro angatr a xututhe la itre imaano ne la uma maano, memine la itat ne icasikeu, memine la nyine heetrën ej, memine la isitr hna kuca hnei kupeine fok hna seluth e koho hun, memine la irido ne la hnë lö ne la itat ne icasikeu,
26 memine la itre imaano ne la götrane gaa pë ihakun,* memine la irido ne la hnë lö ne la ikur lo ka kanothe la uma maano memine la ita ne huuj, memine la itre enon, me itre jia ne huliwa, me itre ewekë hna huliwan ngöne la uma maano. Celë hi la itre huliwa i angatr.
27 Ame la nöjei huliwa ne la angetre Geresoma, me itre ewekë nyine tro angatr a xututh, ke qa i Arona me itre nekö i angeic troa amekötin; tro epuni a amekötin koi angatr la nyine tro angatr a xututh.
28 Celë hi itre huliwa ne la itre fami i Geresoma, nyine tro angatr a kuca hnine la itat ne icasikeu. Nge Ithamara nekö i Arona atre huuj, la ka ameköti huliwa koi angatr.
29 Nge ame la itre nekö i Merari, tro eö a sija la itre ëje i angatr thenge la itre fami i angatr, me itre lapa i angatr.
30 Nge tro eö a sija la ëjene la itre trahmanyi ka 30 uti hë 50 lao macatre, itre hna upe troa huliwa ngöne la itat ne icasikeu.
31 Hane hi la qa i angatr nyine troa xututh, thatraqane la huliwa i angatr ngöne la itat ne icasikeu: itre inehe ne la uma maano, me itre agö, me itre ikapa, me itre trepene ka xulu;
32 itre ipoto xötreithe la götrane gaa pë ihakun, me itre trepene hna kuj, me itre nyine saan, me itre enon, me itre jia ne huliwa, me itre nyine kuca ngöne la itre huliwa cili. Nge tro epuni a thawa koi angatr la nyine tro angatr a isa xututh.
33 Celë hi itre huliwa ne la itre fami ne la angetre Merari, nyine tro angatr a kuca hnine la itat ne icasikeu. Nge Ithamara nekö i Arona atre huuj, la ka ameköti huliwa koi angatr.
34 Ame hnei Mose me Arona, me itre tixe ne la nöj, hna sija la ëjene la itre nekö i Kohatha, thenge la itre fami i angatr, me itre lapa i angatr,
35 ene la itre ka 30 uti hë 50 lao macatre, itre hna upe troa huliwa ngöne la itat ne icasikeu.
36 Matre traqa koi 2 750 la itre hna siji ëjen thenge la itre fami i angatr.
37 Hane hi la aqane siji ëjene la itre fami ne la angetre Kohatha, lo itre ka huliwa ngöne la itat ne icasikeu. Hnei Mose me Arona hna sija la itre ëje i angatr, tune lo hnei Iehova hna amekötin koi Mose.
38 Hna siji ëjene la itre nekö i Geresoma, thenge la itre fami i angatr, me itre lapa i angatr,
39 ene la itre ka 30 uti hë 50 lao macatre, itre hna upe troa huliwa ngöne la itat ne icasikeu.
40 Matre traqa koi 2 630 la itre hna siji ëjen thenge la itre fami i angatr me itre lapa i angatr.
41 Hane hi la aqane siji ëjene la itre fami ne la angetre Geresoma, lo itre ka huliwa ngöne la itat ne icasikeu. Hnei Mose me Arona hna sija la itre ëje i angatr, tune la hnei Iehova hna amekötin.
42 Hna siji ëjene la itre nekö i Merari thenge la itre fami i angatr, me itre lapa i angatr,
43 ene la itre ka 30 uti hë 50 lao macatre, itre hna upe troa huliwa ngöne la itat ne icasikeu.
44 Matre traqa koi 3 200 la itre hna siji ëjen thenge la itre fami i angatr.
45 Hane hi la aqane siji ëjene la itre fami ne la angetre Merari. Hnei Mose me Arona hna siji ëje i angatr, tune lo hnei Iehova hna amekötin koi Mose.
46 Hnei Mose me Arona me itre tixe ne Isaraela, hna sija la itre ëjene la angetre Levi asë, thenge la itre fami i angatr, me itre lapa i angatr;
47 itre ka 30 koi 50 lao macatre, nge ka trene huliwa, nge ka xututhe la itre ewekë ne la itat ne icasikeu.
48 Matre ala 8 580 la etrune la itre hna siji ëjen.
49 Hna siji ëje i angatr, tune lo hnei Iehova hna amekötin koi Mose, thenge la itre huliwa hna athip koi angatr, me thenge lo hnei angatr hna troa xututh; Hna siji ëje i angatr tune lo hnei Iehova hna amekötin koi Mose.
Itre mekun ecahu fen
^ Wange ju la HQP.
^ Ketre öni ne hnagejë.
^ Maine, “kapa.”
^ Wange ju la HQP.
^ Wange ju la HQP.
^ Maine, “hnatresij ka si giris.” Ene lo girisine la itre huuj.
^ Wange ju la HQP.
^ Wange ju la HQP.
^ Maine, “ka pë itrapetren.” Wange ju la HQP.
