Numera 8:1-26
8 Öni Iehova koi Mose:
2 “Qaja jë koi Arona ka hape: ‘Ame la eö a troa amelene la itre laam, ke tro la 7 lao laam a thinane qëmekene la ita ne laam.’”
3 Celë hi hnei Arona hna kuca. Hnei angeic hna amelene la itre laam, matre thinane la götran ka ej qëmeke ne lo ita ne laam, tune lo hna ahnith hnei Iehova koi Mose.
4 Hane hi la aqane kuca la ita ne laam: ketre ewekë lai hna kuca hnei gool hna lepelep hnei hama; qaane ju hi la ngön uti hë la itre iengen, ke hna lepelep hnei hama. Hna kuca la ita ne laam thenge lo hna amaman hnei Iehova koi Mose.
5 Öni Iehova hmaca jë hi koi Mose:
6 “Xome jë la angetre Levi qa ngöne la angetre Isaraela, nge apuiloinyi angatre jë.
7 Hane hi la aqane tro eö a apuiloinyi angatr: Thatha angatre pi hnei tim nyine apuiloinyi angatr qa ngöne la ngazo, nge tro angatr a cine la itre ngönetrei i angatr asë, me wasine la itre iheetre i angatr, me apuiloinyi angatr.
8 Qa i angatr troa xome la ca neköi kau, memine la huuj ne la itre wene feja, ene la farin ka lolo hna ce lomën me oel. Nge qa i ö troa xome la ketre neköi kau nyine huuj ne ngazo.
9 Tro eö a amamane la angetre Levi qëmekene la itat ne icasikeu, nge tro eö a icasinekeune la angetre Isaraela asë.
10 Ame la eö a troa amamane la angetre Levi qëmekei Iehova, tro la angetre Isaraela a atë la itre ime i angatr hune la angetre Levi.
11 Nge tro Arona a tro fë la angetre Levi nyine huuj qëmekei Iehova, nyine huuj ne jumejum* qaathene la angetre Isaraela. Nge tro pë hë la angetre Levi a kuca la huliwa i Iehova.
12 “Qa ne la angetre Levi troa atë la itre ime i angatr hune la he ne la lue kau, me huujëne la ketre kau nyine huuj ne ngazo, me ketre nyine huuj ne dreuth asë koi Iehova, matre troa nue la ngazo ne la angetre Levi.
13 Thupene lai, tro eö a acilëne la angetre Levi qëmekei Arona me itre nekö i angeic, nge tro eö a huujë angatr nyine huuj ne jumejum koi Iehova.
14 Tro eö a aisan la angetre Levi memine la angetre Isaraela. Nge tro ha ewekëng la angetre Levi.
15 Tro la angetre Levi a lö hnine la itat ne icasikeu troa huliwa. Celë hi aqane tro eö a apuiloinyi angatr, me huujë angatr nyine huuj ne jumejum.
16 Ke nyipine la angetre Isaraela, hna hamëne la angetre Levi thatraqai ni. Nge tro ni a xomi angatr nyine nyihnane la itre pane neköne la angetre Isaraela.
17 Ke thatraqai ni la itre pane nekön ne la angetre Isaraela asë, ene la atr me öni. Hnenge hna ahmitrötrën itre ej thatraqai ni, ngöne lo drai ne eni a lepe la itre pane nekön asë ne Aigupito.
18 Tro ni a xome la angetre Levi nyine nyihnane la itre pane neköne la angetre Isaraela.
19 Tro ni a xome la angetre Levi qaathene la angetre Isaraela, matre hamëne koi Arona me itre nekö i angeic, matre kuca la huliwa hnine la itat ne icasikeu thatraqane la nöj, me kuca la huuj ne ialoinekeun kowe la angetre Isaraela, matre tha tro kö a traqa koi angatr la ketre mec pine angatr easenyine la götran gaa hmitrötr.”
20 Celë hi hna kuca hnei Mose me Arona memine la nöje Isaraela asë kowe la angetre Levi. Hnene la angetre Isaraela hna kuca kowe la angetre Levi, thenge lo hnei Iehova hna ahnith koi Mose thatraqai angatr.
21 Hnene la angetre Levi hna apuiloinyi angatr, me wasine la itre iheetre i angatr. Ase jë hi lai, hnei Arona hna huujë angatr nyine huuj ne jumejum koi Iehova. Nge hnei Arona hna kuca la huuj ne ialoinekeun thatraqai angatr, matre apuiloinyi angatr.
22 Thupene lai, hnene la angetre Levi hna lö hnine la itat ne icasikeu, matre kuca la huliwa i angatr thenge la hna amekötin hnei Arona me itre nekö i angeic. Nge hna kuca tune lai kowe la angetre Levi, thenge lo hnei Iehova hna ahnith koi Mose thatraqai angatr.
23 Nge öni Iehova jë hi koi Mose:
24 “Hane hi la nyine troa kuca hnene la angetre Levi: Tro la trahmany ka 25 lao macatre a ce tro memine la itre atr ka kuca la huliwa ne la itat ne icasikeu.
25 Ngo thupene la 50 lao macatre, tro angeic a nue la huliwa i angeic, nge tha tro hmaca kö angeic a hane kuci hnëqa.
26 Ngo ijije hi tro angeic a xatuane la itre trejin me angeic ka cilë hnëqa ngöne la itat ne icasikeu, ngo tha tro hmaca kö angeic a hane cilën la ketre hnëqa e cili. Hane hi la nyine tro eö a kuca kowe la angetre Levi, me itre hnëqa i angatr.”
Itre mekun ecahu fen
^ Heb., “jumejum,” kola hape, troa ahuën me ahië angatr.
