Salamo 108:1-13
Nyima. Salamo i Dravita.
108 Akötresieti fe, ka cile huti la hning.
Eni* a pi nyima me elo miuzik hnene la hning ka pexej.
2 Itre nyine elo miuzik ka hetre filen, hlë jë; nge itre arpe fe, hlë jë.
Eni a pi ahlëne la kaqa ne lai.
3 Iehova fe, tro ni a atrunyi nyipë nyipine la itre atr,Nge tro ni a nyima* atrunyi nyipë nyipine la itre nöj.
4 Ke atraqatre la ihnimi nyipici i nyipë, nge ka draië catre kö hune la itre hnengödrai,Nge ame la aqane mele nyipici i nyipë, ke ej a ketr la itre iaw.
5 Akötresieti fe, epi tro nyipëti a draië hune la itre hnengödrai;Epi tro la lolo i nyipëti a haöthe la fene hnengödrai asë.
6 Amele huni pi hnene la ime maca i nyipë,Nge sa jë koi ni matre mele pi la itre hnimina i nyipë.
7 Jëne la ehmitrötre* i Akötresie, hnei nyidrëti hna qaja ka hape:
“Tro hë ni a elitrauj hnei madrin, me hamë Sekema nyine edrö,Nge tro hë ni a tuluth la Hnathup e Sukotha.
8 Ewekëng lae Gileada me Manase,Nge Eferaima la petrene* la heng;Iudra la sine tö ne musing.
9 Moaba la itrap hnë sieng.
Thei Edroma, tro ni a kuiëne la ibutreng.
Thei Filisiti, tro ni a sue madrin.”
10 Drei la ka troa tro sai ni kowe la traon hna ekögölith?
Drei la ka troa xomi ni a tro Edroma?
11 Hapeu, tha nyipëti kö Akötresie?Lo Akötresie atre nuetriji hun memine la itre trongene isi hun?
12 Xatua huni jë ngöne la akötre hun,Ke ka gufa la iamele* qaathene la atr.
13 Tro huni a kapa la trengecatr qaathei Akötresie,Nge tro nyidrëti a wajawaja la itre ithupëjia hun.
Itre mekun ecahu fen
^ Heb., “memine fe la lolong.”
^ Ame la kola qaja, “nyima,” me “atrunyi,” ke kolo fe a qaja la “troa elo miuzik.”
^ Maine jë, “göhnë ka hmitrötr i nyidrë.”
^ Heb., “hna xupi hag.”
^ Wange ju la HQP.