Salamo 64:1-10
Thatraqane la atre jumi traem. Salamo i Dravita.
64 Akötresieti fe, drei ni ju ngöne la eni a xëwe.
Thupëne ju la meleng qa ngöne la trengecatrene la ithupëjia.
2 Thupë ni ju qa ngöne la itre nyinyithiina ne la itre atr ka ngazo,Me qa ngöne la icasikeu ne la itre ka iangazo.
3 Angatr a xöl la thineme i angatr kösë taua;Angatr a hna la itre trenge ithanata ka akötr kösë itre ane pehna,
4 Matre troa eatrëne la atr ka pë engazon qa ngöne la hna zae i angatr;Angatr a canga pehna angeic, nge pëkö xou.
5 Angatr a pi hune fë la aja ka ngazo i angatr;Angatr a ithanatane* la aqane troa juetrëne la itre thethi angatr.
Öni angatr: “Drei la ka troa öhn?”
6 Angatr a thele la itre xaa ewekë ka ngazo;Angatr a hnëkëne ngöne la gaa sihngödr la ketre nyinyithiina ka ie catr;Ka jui la mekun ne la hni i angatr isa ala cas.
7 Ngo tro Akötresie a pehna angatr;E cili, tro angatr a aca tro eatr hnei ane pehna.
8 Tro kö angatr a kei hnene la sipu thineme i angatr;Tro asë hi la itre ka öhn a nangenang.
9 Haawe, tro hë la nöjei atr a xou,Me qaja trongëne la hnei Akötresieti hna kuca,Nge tro angatr a trotrohnine la itre huliwa i nyidrë.
10 Tro la atr ka meköt a madrine koi Iehova, me lapa zae thei nyidrë;Tro ha sue madrin* hnene la itre hni ka meköt.
Itre mekun ecahu fen
^ Maine, “angatr a itö ithuecatr troa kuca la ngazo.”
^ Maine, “sipu atrunyi angatr.”
