Mekene 32

Aqane Thupë Iesu Ekö

HNEI Iehova e itre xa ijine hna kuca la itre ewekë nyine hain, matre troa thupëne la itre ka co e thatreine petre kö nyudren sipu thupëne la mele i nyudren. Maine hnei eö hë hna hane ua agö nyipine la hnënge hnitr, maine tro jë hi a mama koi eö la ewekë cili. Maine jë tha pexeje kö la aqane waiewekë i eö ngöne la qan, ke loi e öhne hnyawa jë eö la ewekë cili uti hë la pun matre meköti pi la aqane trotrohnine i eö.

Pane mekune jë eö ka hape, öhne ju hi eö e ketre ijine la ketre waco e kei a tro kuhu hune i haö. Kösë lo ka eatr, ke kola thipi ipië la ketre iape ne ej. Ame la eö a thele troa easenyikow ej, tre sesë ananyi eö ju hi. Eö hmaca hi lai a easenyi catre ju kowe ej uti hnyawa ha la eö a cile ezi ne ej. Ngo sesëkötre ju hi eö la ej a sesë a patr. Pë kö eatren ej. Ngo hetre hnene eje hna juetrëne koi eö, atre fe hi eö ka hape nemen?—

Ame ngöne lo lai hnehnitre hna të ngön hnene lai waco, tre, e cili fe hi la itre nekö ne ej. Celë hi matre thin a xou wanga öhne jë eö la itre nekö ne ej, nge akötrë nyudreni jë. Haawe, ej a nyi ka eatre iapene ju, matre troa xom ananyi eö qa ngöne la itre nekön. Ame koi eö, drei la ka atreine troa thupë së tune la waco celë ka thupëne la itre nekö ne ej?— Ame e hnine la Tusi Hmitrötr, kola aceitunë  Iehova memine la ketre aeto ka atreine thupëne hnyawa la itre ha nekö ne ej.—Deuteronomi 32:11, 12.

Iesu Hupuna i Akötresie, la nekö i Iehova ka sisitria catr. Hnei Iesu hna pane mele e koho hnengödrai, ketre ua nyidrë ka trene men tune la Tretretro i nyidrë. Ame la ijine cili, tha nyipi ewekë kö troa xatua nyidrë. Ngo ame hë lo kola hnaho nyidrëti e celë fen ceitu me ketre medreng, nyipi ewekë hë troa xatua nyidrë. Nyidrëti a ajane troa thupë nyidrë, me xatua nyidrë.

E pi tro nyidrëti a kuca la aja i Akötresieti e celë fen, nyipi ewekë tro nyidrëti a atr ka pexej me tru e celë fen. Celë hi matre hnei Satana hna thele jëne troa humuthi nyidrë lo medrenge petre kö. Pi tro kö eö a atre la hna kuca hnei Iehova matre troa thingijë i Satana troa humuthi Iesu?— Ketre edromë lai ka lolo catr.

Nyimu drai hë e thupene la hna hnaho Iesu, Satana a ahudrumene ju la ketre wëtresij ngöne la götrane Kohië. Hnene la itre magoi, ene lo itre atr ka thele troa qejepengöne la mele jëne la aqane trongene la itre wëtresij, hna xötrethenge lo lai wëtresiji cili, me xötrëne la itre gojenyi ga nany,  uti hë la traqa angatr e Ierusalema. Traqa ju hi angatre e cili a hnyingëne la götrane hnë troa hnahone la atr ka troa joxu i angetre Iudra. Hnene la itre atr ka atre hnyawa la Tusi Hmitrötr hna sa koi angatr, ka hape: “E Betheleema.”—Mataio 2:1-6.

Eje e Ierusalema ngöne la ijine cili la ketre joxu ngazo thina, Heroda la ëjen. Drenge jë hi nyidrë ka hape, hetre ketre joxu hna hnyipi hnahone e Bethelema, öni nyidrëti jë hi kowe la itre magoi, ka hape: ‘Tro jë thele agöne la medreng, nge e öhne hë nyipunie, traqa pi troa hane thuemacanyi ni.’ Atre fe hi eö la kepine matre Heroda a ajane troa atre, ka hape, ekaa Iesu?— Traqa ha la zalu koi nyidrë me ajane troa humuthi Iesu!

Nemene jë koi eö la aqane tro Akötresieti a thupëne la Hupuna i Nyidrë?— Öhnyi Iesu hë hnene la itre magoi, nge angatr a hamëne ju la itre ahnahna i angatre koi nyidrë. Thupene jë hi lai, jëne la ketre pu, Akötresieti a qaja ju koi angatr ka hape, tha tro pi kö angatr a bëeke fë ithuemacany koi Heroda. Haawe, ame hë la angatre a bëeke kowe la nöje i angatr, tha hnei angatre hmaca kö hna Ierusalema thenge. Atre jë hi Heroda laka, koilo hë la itre magoi, hane hi lai nyidrë a wesitre catr. Aja i nyidrë troa humuthi Iesu, ene pe amekötine ju nyidrë troa humuthe lo itre nekönatr trahmanyi ka mele e Betheleema, qane la hna hnyipi hnahone uti hë la ka lue macatre! Ngo patre fe hë Iesu lo la ijine cili.

Atre fe hi eö ka hape, hna traqa tune kaa la pengöne cili?— Kolo pe hi a bëeke lo itre magoi, nge Iehova fe hi lai a hamë ithuemacanyi ju koi Iosefa föi Maria. Hnei Nyidrëti hna upi angeice troa kötre Aigupito eë. Haawe, nanyi hë Iesu qaathei Heroda. Thupene hë la itre macatre, bëeke hmaca jë hi Maria me Iosefa me Iesu qa Aigupito, ke hnei Iehova hna hamëne koi Iosefa la  ketre ithuemacany. Jëne la pu, hnei Nyidrëti hna upi angeice troa tro Nazareta eë, matre troa hetru Iesu e cili.—Mataio 2:7-23.

Hapeu, öhne hë eö la aqane thupëne Iehova la Hupuna i Nyidrë?— Drei lo ka tune lo itre ha neköi waco hna juetrëne hnei thin, nge ka tui Iesu lo medrenge petre kö nyidrë? Hapeue eö, ma ka tui eö fe hi lai?— Nyimutre fe la itre atr ka ajane troa akötrë eö. Atre fe hi eö ka hape drei?—

Tusi Hmitrötr a aceitunë Satana me ketre liona ka thele troa heji së. Nge tune la itre liona ka thele tha, laka, itre ej a sesë troa heje la itre neköi öni ka co, ketre Satana mina fe me itre dremoni angeic, a thele troa akötrëne la itre nekönatr. (1 Peteru 5:8) Ngo ka catre kö Iehova hui Satana. Atreine Nyidrëti troa thupëne la itre nekö i Nyidrë, me troa apatrene la itre ewekë ka ngazo hnei Satana hna kuca koi nyudren.

Hne së lo hna inine ngöne la Mekene 10 laka, hetre ewekë hnei Satana me itre dremoni angeice hna ajane tro sa kuca; atre fe hi eö ka hape nemen?— Ene la ketre ewekë hnei Akötresieti hna wathebon, tune la troa ce meköle trefën. Drei hmekuje hi lo ka ijije troa ce meköle trefën?— Kolo hmekuje hi lo itre atr ka faipoipo hë.

Ngazo pe, ame enehila ala nyimu la itre ka tru ka ajane troa kuci ngazo memine la itre nekönatr. Nge ame la itre hna angazon, nyudreni hmaca kö a kuca la itre huliwa ka ngazo ka tune lai, me huliwane menune la itre götrane ga hmitrötrene la ngönetrei i nyudren. Celë hi ewekë ka traqa ekö kowe lo itre atr ne Sodoma. Kola qaja hnei Tusi Hmitrötr, ka hape hnene la nöjei atr ne la lapa cili, “qane la nöjei thupëtresij uti hë la nöjei qat,” hna thele troa kuci ngazo memine lo itre atr ka traqa troa wai Lota.—Genese 19:4, 5.

Tune lo aqane thupë Iesu ekö, nyipi ewekë tro fe a hane thupë eö qa ngöne la itre atr ka tru maine itre xa nekönatre pena ka thele troa kuci ngazo me eö. Hna majemine hnene la itre atr cili troa amemëne la itre nekönatr. Tro angatre e itre xa ijin, a hamë ahnahna koi eö, matre tha tro kö eö a qajaqaja la itre huliwa i angatr. Ngo ceitune hi la aqane pi tru i angatr me Satana me itre dremoni angeic; angatr a ajane troa hune fë la itre sipu aja i angatre kö. Ame la hnei angatre hna ajan, tre, ene la troa angazone la itre nekönatr. Ewekë lai ka sisi catr!

 Atre fe hi eö la ketre aqane tro angatre a tro fë pi trune la sipu aja i angatr?— Maine jë tro angatr a thele jëne matre tro eö a huliwane menune la itre götrane ga hmitrötrene la ngönetrei eö, maine tro pena a kucahmëne itre ej. Ngo tha tro pi kö eö a nue la ketre atr troa elo memine la götrane ga hmitrötrene la ngönetrei eö. Goi tha tro fe eö a nue la itre trejine me eö, itre trahmanyi me föe, maine pena la keme me thine i eö, troa elo memine la itre götrane cili. Ame la itre götrane cili ne la ngönetrei eö, tre, ewekë i eö hmekuj.

Tune kaa la aqane tro eö a thupëne la ngönetrei eö, qa ngöne la itre atr ka kuca la itre ewekë ka ngazo cili?— Ame la ewekë hnapan, the nue pi kö la ketre atr troa elo memine la götrane ga hmitrötrene la ngönetrei eö. Maine kola thele troa ujë tune lai hnene la ketre atr, qaja catrëne ju koi angeic, ka hape: “The ketri ni kö, wanga tro na qejeqeje eö!” Nge maine angeic a upezö eö, the drei angeice pi kö. Trengathoi lai. Tro jë pe troa qejeqeje angeic! The cile kö ngacama qaja ju hë angeice ka hape, pëkö atr ka troa atre la hnei epon hna kuca. Maine tro angeic a hamëne koi eö la itre xa ahnahna, maine troa axouenyi eö pena, the drei angeice pi kö, ngo kötrene pi pe.

Tha tro pi kö eö a xou, ngo ame pe, thupëne hnyawa kö la mele i eö. Ame la kaka me nenë a hmekë eö qa ngöne la itre xa atr maine itre xa götrane pena, drei nyidroti ju. Maine tro eö a ujë tune lai, eje hi lai laka, tha tro kö a angazo eö me akötrë eö hnene la itre atr ka ngazo thina.

Nyipi ewekë troa thupë së qa ngöne la itre huliwa ka sis, tune la kuci ngazo. E jë la Genese 39:7-12; Ite Edomë 4:14-16; 14:15, 16; 1 Korinito 6:18; me 2 Peteru 2:14.

[Iatr ne la götran 167]

Nemene la hna kuca hnene la waco celë, matre troa thupëne la ha nekö ne ej?

[Iatr ne la götran 168]

Thupene la hna wai Iesu hnene la itre magoi, nemene la hnei Akötresieti hna qaja koi angatr matre troa thupë Iesu?

[Iatr ne la götran 169]

Tune kaa hmaca la aqane thupë Iesu hnei Akötresie?

[Iatr ne la götran 171]

Nemene la nyine tro eö a qaja me kuca, ngöne la kola thele troa ketri eö hnene la ketre atr?