Mekene 33

Aqane Thupë Së Hnei Iesu

AME la kola tru trootro hnei Iesu, me atre laka hna thupë nyidrëti ekö hnei Iehova lo nyidrëti a co, tre hapeu, hnei nyidrëti kö hna thithi troa olene koi Iehova la aqane thupë nyidrë?— Nemene jë fe la hnei nyidrëti hna qaja koi Maria me Iosefa, pine la hnei nyidroti hna thupë nyidrë, me kötre sai nyidrë Aigupito eë?—

Ame enehila, tha medrenge hmaca kö Iesu. Nge ketre, patre hë nyidrëti qa la fen. Ngo öhne fe hi eö enehila laka, ala nyimu la angetre mekune ka hape, medrenge pala kö Iesu, nge kolo pala kö a meköle ngöne la trepene ai öni; tune kaa fe la mekuna i eö?— Tro so a wange la ketre ceitun, ame la kola feetë Noel ngöne la nöjei götrane la fen, ala nyimu la itre atr ka xomi Iesu ceitune me medreng.

Eje hi laka tha Iesu hmaca kö a mele e celë fen, ngo nemene la pengöne la mele i nyidrë?— Hna amele nyidrëti hmaca qa hna mec, nge Joxu ka trene mene hë nyidrë enehila e koho hnengödrai. Atre fe hi eö la aqane tro nyidrëti a thupëne la itretre drei nyidrë ngacama nyidrëti hë e hnengödrai?— Ame lo nyidrëti e celë fen, hnei Iesu hna amamane la atreine i nyidrëti troa thupëne la itre atr hnei nyidrëti hna hnim. Pane ce wange  jë së la hnei Iesu hna kuca lo nyidrëti a ti he memine la itretre drei nyidrë.

Drai ka pexeje ne cainöje Iesu ezine la hnagejë ne Galilaia, ketre hnagejë lai ka 20 kilomet la eqean, nge 12 la eisaisan. Kolo ha troa lö la jö, öni Iesu jë hi kowe la itretre drei nyidrë, ka hape: “Tro sha ea kowe la kete götrane la hneopegejë.” Haawe, ame hnei angatre hna tro pi memine la he. Pine laka tha ase kö Iesu mano, haawe nyidrëti a tro jë kowe la ipune la he, me meköl. Tha qea ju kö nge hmulizië pi hi nyidrë.

Itretre drei nyidrë a xomiujine la he. Ka loi hi la drai ngöne la qaan, haodrai hi, ngo tha hmitre ju kö, nge hnahna jë hi la eny. Catrecatre la eny, nge kolo fe hë a catre la gejë me kaca trane la he, ene pe kolo ha nyiqaane tiqa la he hnei tim.

Traqa ha la xou kowe la itretre dreng, ke kolo ha troa lö la he. Ngo tha hnehengazo menu kö Iesu. Nyidrëti pala hi a meköle ngöne la ipune la he. Ame hna traqa pi la itretre drenge troa ahlë nyidrë, me hape: ‘Joxue, joxue, amele së jë; easë hë la a troa meci hnene la enyi ka catr.’ Ame hna cile jë hnei Iesu me acilëne la enyi me gejë, me hape, “The ilu kö, humuju.”

 Tha hmitre ju kö nge patre pi la eny, nge haodrai atraqatre hë. Kola sesëkötre me hai hnene la itretre dreng, pine laka angatre petre hi a xötrei öhne la ewekë ka tune lai. Angatre pë hë a iqajakeune jë, ka hape: “Ka ue la ate celë ! ke nyidëti a musinëne la enyi me gejë, nge lu’ ej’ a dei nyidë.”—Luka 8:22-25; Mareko 4:35-41.

Atre fe hi eö la pengöi Iesu?— Nge qaathei drei la mene i nyidrë?— Maine ju tha tro kö a xou la itretre dreng, pine laka ce Iesu me angatr, nge ketre, tha ketre atr menu kö nyidrë. Atreine nyidrë troa kuca la itre ewekë nyine hain. Hanawange la ewekë hnei nyidrëti hna kuca la kola traqa la janacas.

Ame ngöne la ketre hej, hnei Iesu hna upe la itretre drei nyidrë troa xome la he, matre tro pa i angatre jë kowe la ketre götrane la hnagejë. Nge nyidrëti pë hë a elë casi jë kowe la hune la wetr. Ketre götrane lai ga pë mejen, matre tro nyidrëti a thithi kowe la Tretretro i nyidrë, ene Iehova Akötresie.

 Ame la kola tro hnene la itretre drenge hune la he i angatr, ene pe tro hnahna pi hi la enyi ka catr. Jidri fe hë, ame hnei angatre hna autine pi la isihnyeu ne la he, me qaane troa galu. Ngo tha kötre nyimenyime kö la he, ke catre menu pala ha la eny. Kola kapa la he i angatre hnene la itre hoke ne gejë. Ngacama catre la aqane galu i angatre ngo tha ijije kö troa traqa me xep ngöne la qahlapa.

Iesu casi pala hi e hune la wetr, nge qeadridri pi hë la hnei nyidrëti hna lapa. Trotrohninë hë nyidrëti laka hetre jole ka tru ka traqa kowe la itretre drei nyidrë. Ame hnei nyidrëti hna uti pi me tro hune la ihnagejë, matre troa xatua angatr!

Nemene la ewekë ka troa traqa, e tro eö a tro hune la ihnagejë?— Eje hi, tro hë eö lai a lö, me nunucil. Tha hna traqa kö tune lai koi Iesu, pine laka eje thei nyidrë la ketre mene ka catr. Nanyi pala kö nyidrë kowe la he, ngo kolo ha mama trootro hnei nyidrë kowe la itretre dreng, ke kolo ha wiëwië lai. Thatreine kö angatre mekune ka hape Iesu hi lai ka tro hune la ihnagejë. Celë hi matre angatr a xou me ihokötreny. Ngo Iesu a qaja koi angatre ka hape: “Catejë ; ke ini hi ; the qou kö.”

Ame ju hi la Iesu a elë hune la he, kolo fe hi a upu ju la eny. Kolo hmaca ha a sesëkötre me hai hnene la itretre dreng. Nge angatr a thili ju koi nyidrë, me hape: “Nyipici enëtilai la Hupuna i Akötesie.”—Mataio 14:22-33; Ioane 6:16-21.

Maine eö ju fe a hane mele ngöne lo hneijine i Iesu, ajane fe kö eö troa hane sine la itre iamamanyikeu cili hna kuca hnei Iesu?— Atre fe hi eö la itre kepine matre Iesu a kuca la itre iamamanyikeu cili?— Tru la ihnim i nyidrë kowe la itretre drei nyidrë, nge aja i nyidrëti fe troa xatua angatr. Nge ame la ketre kepin, ke, nyidrëti a pi amamane la aqane tro nyidrëti elanyi a huliwane la mene i nyidrë, e cilëne jë nyidrë la Baselaia i Akötresie.

Ame ngöne la hneijine së enehila, Iesu a huliwane la mene i nyidrë  matre troa thupëne la itretre drei nyidrë qa ngöne la iajojezi Satana. Satana a ajane troa thingijë së troa cainöjëne la Baselaia i Akötresie. Ngo tha Iesu kö a huliwane la mene i nyidrë matre troa thupë së wanga meci pi së. Wange ju la ka traqa kowe lo itre aposetolo i Iesu ka meci ekö. Ame Iakobo, tre, hna humuthi angeic, nge ame Ioane trejine me angeic, tre, hna akalabusin.—Itre Huliwa 12:2; Hna Amaman 1:9.

Ketre tune mina fe enehila, ngacama ka nyi hlue i Iehova ju hë së, maine tha ka nyi hlue i Nyidrëti pena kö, ngo tro pala hi a tithi së hnei mec, me hane meci fe. Ngo ame pe, easenyi catre hë matre patre pi la itre ewekë cili, jëne la Baselaia i Akötresie hna cilëne hnei Iesu. Pë hmaca kö xou elany, ke, tro Iesu a huliwane la mene i nyidrë, matre troa amanathithine la nöjei atr ka drengethenge nyidrë.—Isaia 9:6, 7. 

Hanawange la itre xa xötre ka qeje pengöne la mene hnei Akötresieti hna hamëne koi Iesu, matre troa cilëne la Baselaia i Nyidrë: Daniela 7:13, 14; Mataio 28:18; me Efeso 1:20-22.

[Iatr ne la götran 172]

Tune kaa fe la aqane goeë Iesu hnei eö: tune la ketre Joxu ka trene men maine ketre medrenge pena?

[Iatr ne la götran 173]

Nemene la hnei Iesu hna qaja kowe la enyi me gejë?

[Iatr ne la götran 174]

Pine nemene matre hnei Iesu hna kuca la itre iamamanyikeu?

[Iatr ne la götran 176]

Ame enehila, tune kaa la aqane thupëne Iesu la itretre drei nyidrë?