Mekene 3

Atre Xupe La Nöjei Ewekë Asëjëihë

A JANE kö eö tro na qeje pengöne la ketre ewekë ka mingöming?— Goeëne ju la iwanakoime i eö. Thinge ju. Xome jë la ketre ewekë. Kola mama hnyawa e celë laka, atreine hi tro sa kuca la itre ewekë ka nyimutre nge ka mingöming, memine la iwanakoime së. Atre fe hi eö ka hape, drei la ka xupe la lue iwanakoime së?—

Nyidrëti hi lo Atre Xupe la ineqë së me hnafiji së, me lue alameke së. Kolo hi a qeje Akötresie, lo Tretretro ne lo Atre Hamë Ini Ka Sisitria. Madrine kö eö laka hnei Nyidrëti hna xupe la lue alameke i eö?— Nyimutre la itre ewekë hne së hna öhne hna jëne la lue meke së. Tune la itre engen, me ihaö, me hnengödrai ka bulu. Easa öhne mina fe, tune ngöne la iatr, la itre nekö i waco a kola sipo xen. Ka mingöminge catre la easa goeëne la itre ewekë cili, tune kaa la mekuna i eö?—

Ngo drei la ka xupe la itre ewekë cili? Atr? Ohea. Atreine hi la itre atr troa xupi uma, ngo thatreine ju pe hi angatre xupi ihaö. Ketre thatreine fe kö angatre xupe la nekö i waco, me engen memine la ketre ewekë ka mel. Hapeu, atre fe kö eö la itre ewekë cili?—

Akötresieti hi lo Atre Xupe la itre ewekë asë cili. Hnei Nyidrëti hna xupe la hnengödrai memine la ihnadro. Hnei Nyidrëti mina fe hna xupe la itre atr. Ame lo pane trahmanyi me föe, tre, Nyidrëti hi lo ka xupi nyidro. Celë hi lo hna ini së lai hnei Iesu, lo Atre Hamë Ini Ka Sisitria.—Mataio 19:4-6.

 Kola atre tune kaa hnei Iesu ka hape, hnei Akötresieti hna xupe lo pane trahmanyi me föe? Hapeu, hnei nyidrëti kö hna öhnyi Akötresieti a xupi nyidro?— Eje hi. Ce Iesu me Akötresie ngöne lo lai ijine kola xupi atr. Haawe, kola mama hnyawa e celë, laka Iesu hi lo pane xupuana i Akötresie. Ketre angela nyidrëti ekö ka ce mele memine la Tretretro i nyidrë e koho hnengödrai.

Kola qaja hnei Tusi Hmitrötr ka hape, öni Akötresie: “Tro sha xupe la ate.” (Genese 1:26) Drei lai hnei Akötresieti hna ithanata kow?— Nyidrëti hi lai a ithanata kowe la Hupuna i Nyidrë ka uti kowe la fen, lo hna hëne e thupene ka hape, Iesu.

Pane mekune hnyawa jë eö lai! Ame la easa drei Iesu, easë hi lai a kapa la itre ini hna hamëne hnene lo angela ka ce me Akötresieti ekö, ngöne lo Nyidrëti a xupe la ihnadro me itre xa ewekë ju kö. Qa ngöne laka hna ce huliwa hnei Iesu memine la Tretretro i nyidrë e koho hnengödrai hawe, nyimutre la itre ini hnei nyidrëti hna kapa. Hane hi lai kepine matre hë nyidrëti jë ka hape, Atre Hamë Ini Ka Sisitria!

 Hapeue la mekuna i eö, qëmekene tro Akötresieti a xupe la Hupuna i Nyidrë, jole kö koi Nyidrë troa lapa cas?— Ohea, tha jole kö koi Nyidrë, nge tha hleuhleu kö la mele i Nyidrë. Ngo hnauëne kö laka Nyidrëti a xupe la itre xa ka mel?— Hnei Nyidrëti hna ujë tune lai, pine laka Akötresie ka ihnimi Nyidrë. Ame la aja i Nyidrë, tre, ene la troa mele me madrine la itre atr. Loi e tro sa olene koi Nyidrëti la hnei Nyidrëti hna hamëne koi së la mel.

Kola mama ngöne la itre hna kuca hnei Akötresieti laka, atraqatre la ihnimi Nyidrëti koi së. Hnei Nyidrëti hna xupe la jö, ene pe lai pi me keukawa la fen. Maine pë ju jö, tro ha lepanyi me pë mele e celë fen. Hapeu, ka loi kö koi eö laka hnei Akötresieti hna xupe la jö?—

Akötresieti fe la ka axulune la manie koi së. Ame ngöne la itre xa ijin, tha ajane kö eö troa trotro la mani, pine laka kola ajolë eö troa elo e kuhu trön. Ngo celë hi ka aciane me aengëne la itre feja. Haawe ame la eö a goeëne la itre engen ka mingöming, tro eö a olene koi drei?— Koi Akötresie. Nge tune kaa mina fe la itre wene sinöe me itre dröne sil ka lolo hne së hna xen, tro eö a olene koi drei?— Loi e tro fe sa olene koi Akötresie, pine laka maine patre ju la jö memine la mani, eje hi lai laka, thatreine kö troa cia la itre feja.

E traqa ju la ketre atr a hnyingë eö ka hape, ‘Nyipici kö ka hape, Akötresieti la ka xupe la itre atr memine la itre öni?’ Tro eö a sa tune kaa koi angeic?— Maine jë öni eö jë hi ka hape: “Nyipici, Akötresieti la ka xupe la itre atr memine la itre öni.” Ngo maine angeice a isenyine me eö me qaja ka hape, tha kapa kö angeic laka hna xupe la itre atr hnei Akötresie, ngo ka xulu pe angatre qaathene la itre öni, haawe, tune kaa la mekuna i eö? Tha celë kö la hna inine lai hnei Tusi Hmitrötr. Eje pe a qaja ka hape, ame asë hi la itre ka mel, tre, itre hna xupe asë hi hnei Akötresie.—Genese 1:26-31.

Ngo e qaja jë la ketre atr ka hape, tha ka lapaune kö angeice koi Akötresie. Nemene la aqane tro eö a xatua angeic?— Maine jë tro eö a amamane la ketre uma me hnyingëne koi angeic ka hape: “Drei la ka kuca la uma celë ?” Pëkö uma ka cile xan, ke, atre hi së laka hna xupe lai hnei atr!—Heberu 3:4.

 Thupene lai, pane tro sai angeice jë kowe la ketre götran, me amamane koi angeice la ketre iengen, nge hnyingëne ju koi angeic ka hape: “Drei la ka kuca la iengene celë ?” Pëkö atr ka atreine xupi engen. Ngo, kola tune lo lai uma laka tha ka xulu xane kö; ame la engen, tha ka cia xane kö. Akötresieti hi la ka aciane ej.

Upi angeice jë fe troa drenge la itre waco ka ho, nge hnyingë angeice jë ka hape: “Drei la ka xupe la itre waco me ini angatre troa ho?” Akötresieti hi. Akötresieti hi la ka xupe la hnengödrai memine la fen memine la itre ka mele asë! Nyidrëti hi La Atre hamëne la mel.

E qaja jë la ketre atr ka hape: ‘Thatreine kö ni troa jele nyipicine e tha hnenge kö hna öhne hnei lue mekeng.’ Kösë tha jele nyipicine kö angeic, ke, tha öhne kö. Nge pine laka tha öhnyi Akötresieti kö hnene la itre atr, haawe, tha lapaune kö angatre koi Nyidrë.

Nyipici, tha ijije kö tro sa öhnyi Akötresie. Öni Tusi Hmitrötr ka hape: ‘Pëkö atr ka öhnyi Akötresie.’ Pëkö trahmanyi me föe maine nekönatre pena ka atreine troa öhnyi Nyidrë. Celë hi matre thatreine kö troa thele troa nyi iatrë Nyidrë. Hnei Nyidrëti lo hna wathebone troa nyi iatrë Nyidrë. Haawe, tha tro kö Nyidrëti a madrine e tro sa afedrene la itre iatr cili hnine la uma së.—Esodo 20:4, 5; 33:20; Ioane 1:18.

Ngo nemene la aqane tro eö a atre ka hape, hetre Akötresie e tha öhnyi Nyidrëti kö hnei eö? Pane mekune jë eö la ewekë celë. Öhne fe kö eö la eny?— Ohea. Pëkö ala casi ka atreine goeëne la eny. Ngo ame pe, tre, öhne hi eö la hna kuca hnene la eny, eje a enijëne la itre picine sinöe. Haawe, jele nyipicine ju hi eö laka hetre eny.

Ketre tui Akötresieti mina fe laka, ijije tro eö a öhne la itre hnei Nyidrëti hna kuca. Ame la eö a goeëne la ketre engene ka lolo maine ketre waco pena, eö hi lai a öhne la itre ewekë hna xupe hnei Nyidrë. Haawe, eö hi a jele nyipicine jë laka hetre Akötresie.

Maine jë tro la ketre atr a hnyingëne koi eö ka hape, ‘Drei la Atre Xupe la jö memine la ihnadro?’ Kola sa hnei Tusi Hmitrötre ka hape: “Hnei Akötesieti hna xupe la hnengödrai memine la fene hnengödrai.” (Genese 1:1) Haawe, Akötresieti hi la ka xupe la nöjei ewekë asë ka lolo! Tune kaa fe la mekuna i eö ngöne la götrane cili?—

 Maine nyipici laka pëkö ka pi meci e easë ngo tune kaa, madrine fe kö eö troa hane mel? Drenge hi së la kola ho la itre waco. Ketre, easë fe a goeëne la itre engen me itre xa ewekë hnei Akötresieti hna xup. Easë mina fe a kapa la itre xeni qaathei Nyidrë.

Nyipi ewekë tro sa olene la nöjei ewekë cili hnei Akötresieti hna hamëne koi së. Nge tha tro pi kö sa thëthëhmine la ewekë ka sisitria celë, ene la mele hnei Nyidrëti hna hamëne koi së. Nge maine hetre hni ne ole së koi Nyidrë, tro hë sa kuca la ketre ewekë. Nemene la eweke cili?— Ene la troa drei Nyidrë me trongëne la itre hnei Nyidrëti hna amekötine qa hnine la Tusi Hmitrötr. Celë hi aqane tro së lai a amamane koi Akötresieti ka hape, easa hnimi Nyidrë, ke, Nyidrëti hi lo Atre Xupe la nöjei ewekë asë.

Pine laka nyimutre la itre ewekë hnei Akötresieti hna kuca koi së haawe, nemene la aqane tro sa amamane la hni ne ole së koi Nyidrë? E jë la Salamo 139:14; Ioane 4:23, 24; 1 Ioane 5:21; me Hna Amaman 4:11.

[Iatr ne la götran 21]

Drei la ka xupe la nöjei ka mele asë?

[Iatr ne la götran 22]

Pine laka hetre ka kuca la uma, drei la ka xupe la itre engen, me itre sinöe me itre öni?

[Iatr ne la götran 25]

Hnei eö hna atre tune kaa, ka hape hetre eny?