Mekene 9

Cile Catre Ju Kowe La Itre Itupath

ASE hë hane upi ö hnene la ketre atr troa kuca la ketre ewekë ka ngazo?— Hnei angeice kö hna safie eö, me qaja ka hape, thatreine kö eö troa kuca la ewekë cili? Maine pena hnei angeice hna qaja koi eö ka hape, nemene la engazon, kola iqene hnyima lai?— Angeice hi lai a thele troa iaö eö.

E iaö së jë, nemene la nyine tro sa kuca? Tro kö sa kei thenge la itupath me kuca la ewekë ka ngazo?— Tha kolo kö lai a amadrinë Iehova Akötresie. Ngo drei kö la hna amadrinëne ngöne la ijine cili?— Satana lo Diabolo.

Satana hi la ithupëjia me Akötresie, nge Satana fe hi la ithupëjia me easë. Thatreine kö tro sa öhnyi angeic, pine laka ketre ua angeic. Ngo öhnyi së hi hnei angeic. Ame ngöne la ketre ijin, hnei Diabolo hna tupathi Iesu, lo Atre Hamë Ini Ka Sisitria. Tro sa ce wange la hnei Iesu hna kuca, matre e traqa ju tupathi së, atreine hi tro sa hmek.

Ka tru koi Iesu la troa kuca la aja i Akötresie. Ame la aqane amamane nyidrë, ke, hnei nyidrë hna xome la bapataiso ngöne la Hneopegejë ne Ioridrano. Nge thupene lai, hna tupathi nyidrë hnei Satana. Hnei Tusi Hmitrötr hna qaja ka hape, ame “hna thawapi la [hnengödrai]” koi Iesu. (Mataio 3:16) Kolo lai a hape, maine jë Iesu ha mekune hmaca lo mele i nyidrë ekö e koho hnengödrai ce me Akötresie.

Ase hë bapataiso Iesu, ene pe nyidrëti a tro pi kowe la hnapapa, matre troa sine thele me mekune lo itre  ewekë hnei nyidrëti hna kuca ekö e koho hnengödrai. Hnei nyidrëti hna lapa e cili fotre lao drai nge fotre lao jidr. Pëkö hnei nyidrëti hna xeni ngöne la itre drai cili, ene pe traqa pi koi nyidrë la mecijin. Satana hi lai a thele jëne ju troa tupathi nyidrë.

Öni Diabolo koi Iesu ka hape: “Maine cilieti la Hupuna i Akötesie, te, ulatinejë mate aretopi la it’ etë celë.” Ka hnyapa la falawa! Ngo hapeu, atreine jë kö Iesu troa ujëne la etë troa nyi falawa?— Eje hi, atreine hi nyidrë. Pine nemene? Pine laka nyidrëti hi la Hupuna i Akötresie, nge eje thei nyidrë la mene ka tru.

Nge tune kaa fe eö, tro fe kö eö a drei Diabolo troa ujëne matre falawa pi?— Ka mecijine catre i Iesu. Nge maine tro hi nyidrëti a aca kuca la iamamanyikeu celë, ke, nemene la engazon?— Atre hnyawa hi Iesu laka, tha nyine tro kö a huliwane menune la mene i nyidrë. Hnei Iehova hna hamëne la mene cili, matre tro Iesu a ea la itre atr koi Akötresie; ngo tha nyine tro kö nyidrëti a kuci mekunën.

Drei la kepine matre amexeje jë Iesu koi Satana lo hna cinyihane hnine la Tusi Hmitrötr, kola hape: “Tha tro kö a mele la ate hnei areto hmekuje hi, ngo hnene la nöjei tenge ewekë asë ka xulu qa ngöne la ine ula i Akötresie.” Atre hnyawa hi Iesu laka nyipi ewekë troa pane amadrinë Iehova, hune la nyine xen.

Ngo tha mano kö Diabolo troa tupathi Iesu hmaca. Angeice a tro sai Iesu ju Ierusalema eë, hune la ketre götrane ga draië ne la ēnē.  Thupene lai, Satana a qaja koi Iesu ka hape, ‘Maine eö la Hupuna i Akötresie, sesëpi. Ke, ase hë cinyihan ka hape, tro la itre angela i Akötresie a kapa trongë eö, wanga eatre jë eö.’

Pine nemene matre ithanata jë Satana tune lai?— Angeice a thele tro Iesu a ujë qene hmo. Ngo tha hnei Iesu kö hna drei Satana. Öni nyidrëti koi Satana ka hape, “Ase hë cinyihan, ‘The tro kö eö a tupathi Iehova Akötesi ’ö.’ ” Atre hnyawa hi Iesu la engazone e troa tupathi Iehova hnene la hna nue mele menu.

Ngo tha hnei Satana kö hna hmaca e cili. Ase hë lai angeic a tro sai Iesu ju kowe la ketre wetr ka draië catr. Ene pe amamane ju angeice la nöjei baselaia, maine itre musi ne la fen, me nöjei ewekë ne ej. Thupene lai, Satana a qaja koi Iesu ka hape: “Tro ni a hamë cilie la nöjei ewekë cili, e tro cilieti a kei thili koi ni.”

Atre fe hi eö lai hna pi hamëne hnei Diabolo? Nemene la aliene lai, itre ewekë i Satana asë jë kö la itre baselaia ene la itre musi e celë fen?— Tha thele kö Iesu troa ikelikelën, ke, maine tha itre ewekë i Satana ju la itre mus, tro hi nyidrëti lai a ameköti angeic. Mama hnyawa hi laka, Satana la tane la nöjei nöje asë e celë fen. Celë hi matre Tusi Hmitrötr a qeje angeic ka hape, “tane celë fen.”—Ioane 12:31.

Nge traqa ju Diabolo thingehnaeane tro eö a kapa la ketre ewekë, e troa pane thili koi angeic, nemene ju hë la hnei eö hna troa kuca?— Atre hi Iesu la engazone e troa thili koi Diabolo, ngacama hetre nyine tro ju hë a kapa qaathei angeic. Haawe, nyidrëti a sa koi Diabolo, me hape: ‘Satana, kötre jë! Ke ase hë qaja hnine la Tusi Hmitrötr ka hape, tro eö a thili koi Iehova Akötresi ö, me nyi hlue i Nyidrëti hmekuje hi.’—Mataio 4:1-10; Luka 4:1-13.

Hetre itupathi fe hne së hna troa cile kow. Atreine hi eö troa amexeje la itre xan?— Drei la ketre ceitun. Hnei nenë hna pane sa gato, nge qëmekene troa xen, öni eahlo ju hi koi eö ka hape, wange kö ketre pi eö. Ngo pine laka mecijine catre eö, ene pe kola tupathi eö troa xen la gato cili. Hapeu, tro kö eö a drei nenë?— Aja i Satana la tro eö a tha idrei.

 Meku Iesu hnyawa ju hnei eö. Ame nyidrë, tre, ketre ka mecijine hi nyidrëti lo. Ngo atre hnyawa hi nyidrëti laka, nyipi ewekë catre kö troa amadrinë Akötresie, hune la troa xen. Maine tro eö a drengethenge nenë, eö hnyawa hi lai a nyitipu Iesu.

Pane mekune ju eö ka hape, e hamë eö pi hnene la itre sine ini eö la itre wenekas, nge öni angatre ju hi, e ase hë eö lai ulume itre ej, tro ha nyipi lolo la mele i eö. Ngo ame pe la itre wenekas cili, tre, ma  itre dorog. Tro pena ha eö lai a wezipo qa ngön, maine meci pena. Maine jë tro fe angatr a upe iele eö troa ufi sixa. Ame la sixa, tre, celë hi ketre dorog. Matre, nemene la hnei eö hna troa kuca?—

The thëthëhmine kö eö lo hnei Iesu hna kuca. Hnei Satana hna thele tro Iesu a wange sixane la mele i nyidrë, ngöne la angeic a upi nyidrë troa sesë qa hune la ēnē. Ngo hnei Iesu hna thipetrije la itupathi Satana. Nemene la hnei eö hna troa kuca e safie eö ju hnene la ketre atr troa kuca la ketre ewekë hna mecin?— Ame Iesu, tha hnei nyidrëti kö hna drei Satana. Ketre tui eö mina fe, the drenge kö la itre atr ka uku eö troa kuca la ngazo.

Maine jë troa upi eö e ketre ijin, troa thili kowe la ketre iatr, ngo hna wathebone lo hnei Tusi Hmitrötr. (Esodo 20:4, 5) Maine jë troa traqa la ewekë cili ngöne la uma ne ini eö. Thuemacanyi eö jë hi ka hape, e tha tro kö eö a drenge la hna amekötin, tro ha upi eö qa ngöne la uma ne ini. Haawe, nemene hë la hnei eö hna troa kuca?—

Hmaloi hi e troa kuca la ewekë ka loi, e hna kapa hnei nöjei atr. Ngo jole catre hë lai, e uku së ju hnei itre xan troa kuca la ewekë ka ngazo, ke, ame koi angatr, pëkö engazone lai. Ngo ame la ka sisitria koi së, tre, ene la troa atre la mekuna i Akötresie. Atre kö Nyidrëti la ewekë ka loi koi së.

Tha nyipi ewekë kö koi së la hna qaja hnei atr, ngo tha tro pe sa kuca la ewekë hna sisine hnei Akötresie. Celë hi aqane tro së lai a amadrinë Akötresie, ngo tha Diabolo kö.

Maine kola aja ithuemacanyi göne la aqane troa cile kowe la itre itupath, e jë la Salamo 1:1, 2; Ite Edomë 1:10, 11; Mataio 26:41; me 2 Timoteo 2:22.

[Iatr ne la götran 52]

Nemene la itre ewekë hnei Iesu hna mekune hmaca ngöne lo ijine nyidrëti a bapataiso?

[Iatr ne la götran 53]

Hnei Diabolo hna xome tune kaa la itre etë nyine tupathi Iesu?

[Iatr ne la götran 55]

Pine nemene matre Satana a hamëne koi Iesu la nöjei baselaia celë?

[Iatr ne la götran 55]

Nemene la nyine tro eö a kuca e traqa ju tupathi eö?

[Iatr ne la götran 56]

Pine nemene matre ngazo e troa thili kowe la itre iatr?