Mekene 5

“Dei La Nekönge”

ATRAQATRE la madrine ne la itre keme me thin, ngöne la kola kuca la itre ewekë ka lolo hnene la itre nekö i angatr. Maine ka lolo la aqane ujë ne la nekö jajinyi maine nekö trahmanyi pena, tre, canga tro hi la keme a qaja kowe la itre xane ka hape: “Nekönge lai.”

Pine laka hnei Iesu pala hi hna kuca la itre ewekë ka amadrinëne la Tretretro i nyidrë, haawe, madrine catre la Keme i nyidrë. Mekune hi eö lo hnei Akötresieti hna kuca ngöne lo ce Iesu memine lo köni atre drei nyidrë?— Hnei Akötresieti hna ewekë qa koho hnengödrai me hape: “Dei la nekönge hniminang, ini a madi nyidë.”—Mataio 17:5.

Atraqatre pala hi la madrine i Iesu troa amadrinëne la Tretretro i nyidrë. Pine nemene lai? Pine laka atraqatre la ihnimi nyidrë kowe la Tretretro. Ewekë ka jole lai e tro sa kuca la ewekë e hna musinë së. Ngo ka hmaloi pe, e hna kuca qa kuhu hni së. Kola hapeue la troa kuca la ketre ewekë qa kuhu hni së?— Kolo lai a hape, hetre aja së e troa kuca la ewekë cili.

Qëmekene tro Iesu a uti kowe la fen, hnei nyidrëti pala hi hna trongëne cememine la hni ka ajane la itre hna amekötine hnene la Tretretro i Nyidrë, ene Iehova Akötresie. Hnene la ihnimi nyidrë koi Akötresie hna upi nyidrë troa ujë tune lai. Atraqatre la madrine i nyidrë troa ce mele e koho hnengödrai memine la Tretretro i nyidrë. Ngo hetre ketre huliwa ka tru hnei Akötresieti hna upi nyidrë troa kuca. Nge ame e cili, nyipi ewekë tro Iesu a uti qa hnengödrai, troa hnaho nyidrëti e celë fen ceitu me medreng. Ame laka kapa jë Iesu la hna upi nyidrë, ke, aja i Iehova.

Isa hetre thinene asë hi la itre atr; qa ngöne lai nyipi ewekë troa hetre thine i Iesu fe. Atre fe hi eö la ëje ne la thine i Iesu?— Maria la ëje i eahlo. Hnei Iehova hna upi Gaberiela angela i Nyidrë troa ithanata koi Maria. Hnei Gaberiela hna ahnithe koi Maria ka hape, tro eahlo a hnahone la ketre nekönatre trahmanyi nge troa ati ëje i angeic, ka hape Iesu. Drei la keme ne la nekönatr?— Kola qaja hnene la angela ka hape, Iehova Akötresie. Celë  hi kepine matre kola hë Iesu ka hape, Hupuna i Akötresie.

Ame koi eö, nemene la hnei Maria hna mekune göne la ewekë cili?— Tune kaa, hnei eahlo kö hna qaja ka hape: “Tha ajane fe kö ni troa thine i Iesu”? Ohea, hnei Maria hna canga kapa troa kuca la aja i Akötresie. Ngo troa hnahone tune kaa e celë fene la Nekö i Akötresie, ngo ka mele pe e koho hnengödrai? Atre fe hi eö la kepine matre isa pengöne kö la aqane hnaho Iesu memine la aqane hnahone la itre atr?—

Ame ngöne la Akötresieti a xupi Adamu me Eva lo lue pane keme me thine së, hnei Nyidrëti hna aijijë nyidro troa ce meköle trefën. Upune jë hi föe, nge e kuhu hni nyiidro, kola kökötre trootro la medreng; kola qaja la pengöne cili ka hape, ketre iamamanyikeu! Tune kaa fe la mekuna i eö?

Ngo ka sisitria catre pala kö la iamamanyikeu hnei Akötresieti hna kuca göi Iesu. Hnei Nyidrëti hna xome la mele ne la Hupuna i Nyidrë qa koho hnengödrai, me amë e kuhu hni Maria. Aca kuca hi Akötresieti la huliwa celë. Jëne la iamamanyikeu cili, kola tru trootro hnei Iesu e kuhu hni Maria, tune lo itre nekönatre a tru trootro e kuhu hni ne la itre thine i nyudren. Thupene lai, hnei Maria hna faipoipo me Iosefa.

Ame ju hi lo qëmekene troa hnaho Iesu, tro pi Maria me Iosefa Betheleema eë. Ala nyimu catre la itre atr ngöne la traon, pëhë göhnë ngöne la itre uma, ene pe nyidroti a tro pi kowe la ketre uma i öni. Nge e cili hi la hnei Maria hna hnaho Iesu. Tune la hna amamane ngöne cahu iatr, hna ami Iesu ngöne la ketre trepene ai öni, trepene ai kau me itre xa öni kö.

 Hetrenyi la itre xa ewekë nyine haine ka traqa ngöne lo jidri ne hnaho Iesu. Hnene la ketre angela hna mama kowe la itretre thupë mamoe ka lapa ezine la nöje Betheleema. Hnei angeice hna thuemacanyi angatr, laka Iesu la ketre atr ka tru. Önine la angela koi angatr ka hape: ‘Hanawang! ini a qaja koi nyipunie la maca ka loi, nyine madrine atraqatre thatraqane la nöjei atr asëjëihë. Ase hë hnahone ngöne la drai celë la atre iamele.’—Luka 2:10, 11.

Hnene fe la angela hna qaja kowe la itretre thupë mamoe ka hape, tro hë angatre a öhnyi Iesu e Betheleema, a meköle ngöne la ketre trepene ai öni. Nge thupene jë hi lai, angeice memine la itre xa angela a nyiqane atrunyi Akötresie. Angatr a nyima me hape, “Atrunyi Akötesieti jë . . . nge tingetingë hë e celë fen thene la nöjei ate hna hnim.”—Luka 2:12-14.

Thupene la kola tro hnene la itre angela, hnene lo itretre thupë mamoe hna tro Betheleema eë, me öhnyi Iesu e cili. Angatre pë hë a qaja jë koi Iosefa  me Maria la nöjei ewekë ka loi hnei angatre hna dreng. Pane mekune ju eö la madrine i Maria qa ngöne la hnei eahlo hna kapa troa thine i Iesu.

Thupene lai, hnei Iosefa me Maria hna ce tro me Iesu matre troa mele e Nazareta. E cili hi lo hnei Iesu hna tru. Pine laka ketre thupëtresiji hë nyidrë, ene pe nyidrëti pë hë a nyiqane jë la ketre huliwa ka sisitria, ene la troa inine la itre atr. Celë hi lo ketre götrane qa hnei Iehova Akötresieti hna ahnithe kowe la Hupuna i Nyidrë troa kuca e celë fen. Eje thei Iesu la hni ne ajane troa xome la huliwa cili, pine laka atraqatre la ihnimi nyidrë kowe la Tretretro i nyidrëti e koho hnengödrai.

Qëmekene troa nyiqane la huliwa i nyidrë ne Atre Hamë Ini Ka Sisitria, hnei Iesu hna pane upi Ioane Atre Bapataiso troa bapataiso nyidrë ngöne la Hneopegejë ne Ioridrano. Nge ame ju hi  e cili, hna traqa la ketre ewekë nyine hain! Ame petre hi la Iesu a elë qa ngöne la tim, öni Iehova jë hi qa hnengödrai: “Dei la Nekönge hniminang ; ini a madi nyidë.” (Mataio 3:17) Hapeu, madrine fe kö eö la kola qaja hnene la keme me thine i eö ka hape, nyidro a hnimi eö?— Drei fe hi lai madrine ka eje e kuhu hni Iesu.

Hnei Iesu pala hi hna kuca la ewekë ka meköt. Goi tha hnei nyidrëti fe hna kuca hnihnine la ketre ewekë. Ketre, tha hnei nyidrëti fe kö hna hane qaja kowe la itre atr ka hape, nyidrëti la Akötresie. Hnei Gaberiela angela hna qaja koi Maria ka hape, tro ha ati ëje i Iesu, Hupuna i Akötresie. Goi qaja fe Iesu ka hape, nyidrëti la Hupuna i Akötresie. Ketre, tha hnei nyidrëti fe kö hna hane qaja ka hape, sisitria catre kö la atrehmekune i nyidrë hune la Tretretro i nyidrë. Öni nyidrëti pe ka hape: “Atraqate Tetetroti hung.”—Ioane 14:28.

Ame ekö e koho hnengödrai, hnei Iesu pala hi hna kuca la itre ewekë hna qaja hnene la Tretretro i nyidrë. Tha hnei nyidrëti kö hna nangë Iehova, nge thupene lai, nyidrëti a kuca pena la ketre ewekë. Atraqatre la ihnimi nyidrë kowe la Tretretro i nyidrë. Celë hi kepine matre nyidrëti pala hi a drenge la hna qaja hnene la Tretretro i nyidrë. Thupene lai, ame la Iesu a traqa e celë fen, hnei nyidrëti hna thele troa eatrëne la itre hnëqa hna ahnithe koi nyidrë hnene la Tretretro e koho hnengödrai. Tha hnei nyidrëti fe kö hna xomi ijine thatraqane la itre xa huliwa kö. Haawe, easa trotrohnine hnyawa e celë la kepine matre atraqatre la madrine i Iehova kowe la Hupuna i Nyidrë!

Hapeu, aja së fe kö troa hane amadrinë Iehova?— Nga catre pi së troa nyitipu Iesu, ene la troa drengethenge Akötresieti hnyawa. Akötresieti a ithanata koi së jëne la Tusi Hmitrötr. Tune kaa la mekuna i eö, loi kö e troa selëne ka hape, easa drengethenge Akötresie, ngo kuca pe së la ketre ewekë ka ifekethe memine la Tusi Hmitrötr?— Ketre, the thëthëhmine kö eö laka, maine ka nyipici la ihnimi eö koi Akötresie, haawe, tro hë eö a kuca la itre ewekë ka amadrinë Nyidrë.

Ame enehila, e jë la itre xötre celë ne la Tusi Hmitrötre ka amamane la enyipiewekëne troa atre Iesu hnyawa me mejiune koi nyidrë: Mataio 7:21-23; Ioane 4:25, 26; me 1 Timoteo 2:5, 6.

[Iatr ne la götran 33]

Nemene la hnei Gaberiela angela hna qaja koi Maria?

[Iatr ne la götran 34]

Pine nemene matre hna ameköle Iesu hnine la ketre trepene ai öni?

[Iatr ne la götran 35]

Nemene la maca ka loi hna qaja hnene la ketre angela kowe la itretre thupë mamoe?