Mekene 27

Drei La Akötresi Eö?

PINE nemene matre nyipi ewekë e tro eö a atre la Akötresi eö?— Pine laka nyimu haze hna thili kow hnene la itre atr. (1 Korinito 8:5) Ame ngöne la ketre drai, jëne la mene i Akötresie, hnei Paulo hna aloine la meci ne la ketre atr ka peje ca qane la kola hnahon. Haine jë hi hnene la itre atr, me qaja catrën ka hape: “Uti hë koi shë la ite haze kösë ite ate!” Angatr a pi thili koi Paulo memine la sine tronge i nyidrë, ene Banaba. Öni angatr e hë Paulo ka hape, Heremes, nge Banaba, Zeus; ke itre ëjene haze i angatre lai.

Ngo hnei Paulo me Banaba hna sawa la itre atr cili troa thili koi nyidro. Ame hnei nyidro hna nyinyape kowe la nyipine la ka ala nyim, me qaja ka hape: “Tijepi la ite tha nyipi ewekë cili, me ujë koi Akötesie ka shewengönie.” (Itre Huliwa 14:8-15) Drei la “Akötesie ka shewengönie,” lo Atre xupe la nöjei ewekë asë?— Iehova lo “Kasisitia hmekuje hune la fene hnengödrai asëjëihë.” Ame koi Iesu, Iehova la “nyipi Akötesieti ka cas.” Haawe, drei hmekuje hi la nyine tro sa thili kow?— Iehova hmekuj!—Salamo 83:18; Ioane 17:3; Hna Amaman 4:11.

Ame la engazon, tru catre hnei itre atr enehila ka tha hane thili kö kowe la “nyipi Akötesieti ka cas,” ngo thili pe kowe la itre xa haze kö. Ame e itre xa ijin, angatr a thili kowe la itre hnasatr hna tratraune ngöne sinöe, maine hna sa ngöne etë maine hna kuca hnei fao pena. (Esodo 32:4-7; Levitiko 26:1; Isaia 44:14-17) Hetrenyi mina fe la itre trahmanyi me föe ka hlemu hna xome ceitu me haze, maine idrola. Hapeue la mekuna i eö, ka loi kö lai e tro sa thili kowe la itre atr cili?—

Hnei Paulo hna cinyihane ka hape: “Hna atimekëne la ite hni angete tha lapaune kö hnene la haze ne la fen.” (2 Korinito 4:4) Drei lai haze cili?— Satana Diabolo! Angeice hi la ka iaöne la itre atr troa thili kowe la nöjei pengöne atr maine ewekë pena.

 Mekune hi eö lo hnei Iesu hna sa koi Satana, lo angeic a thele tro Iesu a thili koi angeic?— Öni nyidrëti lo ka hape: “Tro eö a thili koi Iehova, Akötesi ’ö, me nyi hlue i anganyidëti hmekuje hi.” (Mataio 4:10) Iesu hi lai a amamane hnyawa, laka Iehova hmekuje hi la nyine tro sa thili kow. Eni a pi ce ithanatane me eö la edromë ne la itre xa thöthi ka trotrohnine hnyawa la mekune cili, ene Saderaka, Mesaka, me Abedenego.

Angetre Heberu la itre thöthi cili, nge itretre Isaraela angatr, nöje i Akötresie. Ame ngöne la ijine cili, angatre a po e Babulona, nge hnei Nebukaneza joxu hna acile la ketre hnasatr gol. Nyidrëti pë hë a amekötine jë ka hape, ame la kola ho la miuzik, tro la nöjei atr asë a kei me thili ju kowe la hna satr. Nyidrëti a thuemacanyi angatre ju fe ka hape, ‘ame la atr ka tha hane kei me thil, tro ha kuië angeice kowe la hnaope ka mele hnei eë.’ Pane mekune hnyawa ju eö, ka hape, maine eö ju fe e cili, nemene la hnei eö hna troa kuca?—

 Ame la hna majemine hnei Saderaka me Mesaka me Abedenego, tre, ene la tro pala hi a drengethenge la joxu. Ngo ame ngöne la ijine cili, tha hnei angatre kö hna drengethenge nyidrë. Pine ue jë?— Pine laka hna qaja ngöne la wathebo i Akötresie, ka hape: ‘The tro kö eö a nyi xa haze qëmekeng. The tro kö eö a nyi idrola thatraqai eö, me thili kowe ej.’ (Esodo 20:3-5) Haawe, hnei Saderaka me Mesaka me Abedenego hna drengethenge la wathebo i Akötresie, hune la hna amekötine hnene la joxu.

Tru la elëhni ne la joxu, ene pe iupi jë nyidrë troa thenge lai köni atre Heberu. Öni nyidrëti jë koi angatr, ka hape: ‘Nyipici kö laka tha hane kö nyipunie thili kowe la itre hazeng? Maine ju ijije hë tro ni a nyithupene koi nyipunie. Ngo tro hmaca kö ni a pane nue nyipunie. Ngo ame pe, e ho hmaca jë la miuzik, mekune kö nyipunie thili kowe la hnasatr hnenge hna kuca. Ngo e tha kei kö nyipunie me thili kowe ej, hawe, tro hë ni a kuië nyipunie hnine la hnaope ka mele hnei eë. Nge drei ju hë la haze ka atreine troa thepe nyipunie qa ngöne la imeng?’

Nemene la hna kuca hnene la köni thöthi celë? Maine ce eö ju fe me angatr, nemene fe la hnei eö hna troa kuca?— Hnene la itre thöthi cili hna qaja kowe la joxu, ka hape: ‘Atreine fe hi la Akötresieti hne huni hna nyi hlue kow troa thepe hun. Ngo e tha thepe huni ju hë hnei Nyidrë, tha tro pi kö huni a nyi hluene la itre haze i nyipë, me thili kowe la hnasatr gol hnei nyipëti hna kuca.’

 Pine laka tru la elëhni ne la joxu, nyidrëti pë hë a amekötine jë ka hape: ‘Asevene jë lao adreuthine la hnaop!’ Thupene lai, nyidrëti a upe jë la itre trahmanyi ka catr troa othi Saderaka me Mesaka me Abedenego, me kuië angatre hnine la hnaope ka mele hnei eë! Catrecatre la idreuthine la hnaop, ene pe tro jë hi la ukahlokine la eë a dreuthe amecine lo itre hlue ne la joxu. Nge tune kaa ju pë hë lo köni atre Heberu?

Tro meköti Saderaka me Mesaka me Abedenego kowe la nyipine la eë. Ngo hnei angatre hna canga cil. Pëkö ca eatre i angatr, nge uke hë lo itre otrene i angatr. Hna tune kaa jë lai?— Goe jë hi la joxu kowe la hnaop, nge traqa pi hi la xou koi nyidrë. Öni nyidrëti ju hi, ka hape: ‘Hapeu, tha hne së kö lo hna kuiëne la köni atr kowe la eë?’ Ame hna sa hnene la itre hlue i nyidrë, ka hape: “Ejëti joxu.”

Thupene lai, kola qaja hnei joxu ka hape: ‘Hanawang, ini a öhne la itre atr ka ala eke, kola tro agö hnine la eë, nge tha hna dreuthi angatre kö hnei eë.’ Atre fe hi eö ka hape, drei lai hnaeken?— Ketre angela i Iehova. Hnei angeice hna thupëne lo lai köni atre Heberu e nyipine la eë.

Haawe, hnene la joxu hna easenyine la qene la hnaope ka mele hnei eë, me uune ka hape: “We, Saderaka, me Mesaka, me  Abedenego, ite hlue i haze ka sisitia, löpi, nge trohemi!” Ame hnei angatre hna lö pi, nge öhne ju hi hnene la nöjei atr asë, laka, pëkö ca eatre i angatr. Goi tha pupui haji ne eë fe angatr. Haawe, ame hë e cili, kola qaja hnene la joxu ka hape: ‘Ole kowe la Akötresi Saderaka me Mesaka me Abedenego, lo Atre upe la angela i Nyidrë troa amelene la itre hlue i Nyidrë, ke tha hnei angatre kö hna thili koi ketre haze, ngo kowe hmekuje hi la sipu Akötresi angatr.’—Daniela, mekene 3.

Hetre ini nyine tro sa xome qa ngöne la edromë celë. Nyimu atr enehila ka kuca la itre iatr maine idrola, matre tro sa thili kow. Kola qaja ngöne la ketre diksioner, ka hape: “Ceitune hi la darapo me kuluse, lue ewekë ka hmitrötr.” Ame la itre xa iatr, hna kuca hnei sinöe, nge itre xan hnei etë, me fao, me imaano. Hnene lo itretre pane drei Iesu ekö hna xele ma hane thili kowe lo angetre cilë musi ne Roma. Hna qeje pengöne hnei Daniel P. Mannix, atre inine la aqane trongene la mele ne la atr, ka hape, tha isazikeu kö la aqane ujë cili memine la troa “xele ma sali koi darapo, maine troa hane amexeje la itre ithanata nyine isisinyikeu.”

Hapeue la mekuna i eö, pëkö engazone koi Akötresie e thili jë eö kowe la ketre iatr hna kuca hnei maano, maine sinöe maine etë, maine fao pena?— Hapeu, meköti kö e tro la ketre hlue i Iehova a thili kowe la ketre iatr cili?— Ame Saderaka me Mesaka me Abedenego, tha hnei angatre kö hna ujë tune lai, nge madrine catre Iehova koi angatr. Haawe, tune kaa la aqane tro eö a xötrethenge la tulu i angatr?—

Maine easa nyi hlue i Iehova, haawe, tha tro pi kö sa thili kowe la ketre atr, maine ketre ewekë pena. E jë la hna qaja göne la ewekë cili ngöne Iosua 24:14, 15, 19-22; Isaia 42:8; 1 Ioane 5:21; me Hna Amaman 19:10.

[Iatr ne la götran 143]

Pine nemene matre hnei Paulo me Banaba hna sawa la itre atr troa thili koi nyidro?

[Iatr ne la götran 144]

Pine nemene matre hnene la itre atr celë hna xele ma thili kowe la hnasatr?

[Iatr ne la götran 145]

Hnei Iehova hna amelene tune kaa la itre hlue i Nyidrë qa hnine la hnaope ka mele hnei eë?

[Iatr ne la götran 146]

Nemene enehila la itre idrola hna thili kow hnene la itre atr?