Mekene 36

Drei La Hna Troa Amelene Hmaca? Nge Tro Angatre a Mele Ekaa?

AME ngöne lo lue mekene ka tro pa ha, ije atr lo hna amelene hmaca qa hna mec?— Ala faifi angatr. Nge ije nekönatr?— Köni nekönatr, nge ca thöth. Haawe nemene koi eö la ini hna hamëne hnene la itre ewekë cili?—

Kola ini së ka hape, Akötresieti a hnime la itre nekönatr memine la itre thöth. Ngo hetrenyi pala kö la itre xa atr hnei Nyidrëti hna troa amelene hmaca qa hna mec. Hapeu, itre atr ka kuca la loi hmekuje hi la hnei Nyidrëti hna troa amelene hmaca?— Ijije tro hi sa mekune tun. Ngo ala nyimu pala kö la itre atr ka thatre la nyipici göi Iehova Akötresie memine la Hupuna i Nyidrë. Angatre jë a kuca la itre ewekë ka ngazo, ke hna hamë angatre la itre ini ka thoi. Hapeu, tro fe kö Iehova elanyi lai a hane amele angatre hmaca qa hna mec?—

Önine la Tusi Hmitrötr: “Tro ha mele hmaca la nöjei ka meköt, me ka tha meköti kö.” (Itre Huliwa 24:15) Pine nemene matre tro fe Iehova a amelene hmaca la itre atr ka tha ka meköti kö, ene lo itre atr ka tha hane  kö kuca la loi?— Pine laka ame lo mele petre kö angatr, tha hna aijijë angatre ju fe kö troa atre Iehova, me inine la itre ewekë hnei Nyidrëti hna upi së troa kuca.

Atre fe kö eö ka hape, eue jë la ijine troa amelene hmaca la itre atr qa hna mec?— Mekune hi eö lo hnei Iesu hna thingehnaeane koi Maretha lo kola meci hnei Lazaro, öni nyidrë: “Tro ha mele hmaca la xa i nyipo.” Nge hnei Maretha hna sa koi nyidrë ka hape: “Ate hë ni laka tro angeic’ a mele hmaca ngöne la ijine mele hmaca, ngöne la drai hnapin.” (Ioane 11:23, 24) Nemene la aliene la trenge ewekë i Maretha, lo kola hape, tro Lazaro a mele hmaca “ngöne la drai hnapin”?—

Hetre ketre hna thingehnaeane hnei Iesu hna drenge hnyawa hnei Maretha, kola hape: ‘Tro la nöjei atr ngöne la itre hua nyine amekunën a tropi.’ (Ioane 5:28, 29) Haawe, ame la “drai hnapin,” tre kola qaja la ijine tro Akötresieti a amelene hmaca la itre atr tha hna thëthëhmine kö hnei Nyidrë. Nge ame la drai cili, tre tha ka 24 kö lao hawa, ngo macatre ka ca thauzane pe. Tusi Hmitrötr a qaja, ka hape, drai ne ihnyingë la drai cili, ijine tro ‘Akötresieti a hnyingën amekötine la fen.’ Nge eje fe thene la itre atr cili hna troa amekötin, la itre hna troa amelene hmaca qa hna mec.—Itre Huliwa 17:31; 2 Peteru 3:8.

Pane mekune jë fe eö la madrinen la itre atr asë, e amelene hmaca jë la itre milio lao atr ka mec! Tro angatr a mele e hnine lo hna hëne hnei Iesu, ka hape, Paradraiso. Tro sa pane ce ithanatane la aliene la Paradraiso, memine la pengöne la mele elanyi e cili.

Köni hawa pe hi qëmekene tro Iesu a mec hune la sinöe ne iaxösisi, nge nyidrëti a qaja la Paradraiso kowe lo ketre atr ka thipe ezi nyidrë. Kola  athipe la atr cili pine la itre ewekë ka ngazo hnei angeic hna kuca. Ngo ame la angeic a goeë Iesu me drenge la hnei nyidrëti hna qaja, angeice hi lai a mejiune ju koi nyidrë. Nge angeic a qaja ju koi nyidrë, ka hape: “Mekuneju koi ni e traqa ha cilieti kowe la baselaia i cilie.” Öni Iesu jë hi e sa, ka hape: “Nyipici ini a qaja koi ’ö ngöne la drai celë, tro eö a ce me ini ngöne la paradaiso.”—Luka 23:42, 43.

Nemene la aliene la trengewekë i Iesu celë? Eka la hnen la Paradraiso?— Pane mekune ju hi eö. Eka la hna acile ekö lo Paradraiso?— Mekune hi eö lo, hnei Akötresieti hna ami Adamu me Eva, lo lue pane atr, ngöne lo paradraiso e celë fen. Ame la ëje ne la götrane cili, Edena. Tha ka iheji kö la itre öni asë e cili, nge kola cia la nöjei pengöne sinöe ka hamë wene ka lolo. Nge hetrenyi mina fe e cili la ketre hneopegejë ka tru. Eje hi, mingöminge me lolo la mele ngöne la hnehlapa cili!—Genese 2:8-10.

Ame e elany la kola troa amelene hmaca lo atr ka ihumuth, tro hë a mingöminge me lolo la nöjei götrane asë ne la Paradraiso. Ngo tro fe kö Iesu elanyi lai a hane mele ngöne la Paradraiso cememine la atr cili?— Ohea. Atre fe hi eö la kepine lai?—

Iesu a troa cile ngöne la hna nyijoxu e hnengödrai, me musi qa koho kowe la Paradraiso e celë fen. Ame lo Iesu a iahni memine la atr ka ihumuth, me hape tro nyidrëti a ce me angeic, tre, kolo lai a hape, tro nyidrëti a amele angeice hmaca qa hna mec, me thupëne hnyawa angeic. Ngo pine nemene matre nue pi Iesu la ketre atr ka ihumuth troa hane mele ngöne la Paradraiso?— Tro sa pane thele troa trotrohnine la mekune cili.

 Qëmekene tro la atr cili a ithanata koi Iesu, ke hapeu, atre fe kö angeice la aja i Akötresie?— Ohea. Ame la angeic a kuca ekö la itre ewekë ka ngazo, tre, thatre kö angeice la nyipici göi Akötresie. Ame hë ngöne la Paradraiso elany, tro ha ini angeice la nyipici cili, nge ijiji angeice fe hë troa amamane la ihnim i angeice koi Akötresie, ene la troa kuca la aja i Nyidrë.

Hapeue la itre atr hna troa amelene hmaca, tro asë kö angatre elanyi a mele ngöne la Paradraiso e celë fen?— Ohea. Atre fe hi eö la kepin?— Pine laka ame la itre xa atr hna troa amelene hmaca, tre, angatr a troa ce mele me Iesu e koho hnengödrai. Angatr a troa ce thawa me nyidrë la hna nyijoxu, me ce musi kowe la Paradraiso. Hanawange la itre enyipicin.

Ame ngöne lo jidri tixenuë qëmekene troa meci hnei Iesu, hnei nyidrëti hna qaja kowe la itre aposetolo i nyidrë, ka hape: ‘Kösaue la nöjei hnalapa ngöne la ēnē i Kaka, nge ini a tro troa nyihnyawane la hne i nyipunie.’ Thupene lai, Iesu a ahnithe koi angatre ka hape: “Tro ni a hmaca troa thei nyipunie mate ce me ini ; mate tro nyipunie a ce lapa me ini.”—Ioane 14:2, 3.

 Tro ju hë Iesu ië, thupene lo kola amele nyidrëti hmaca qa hna mec?— Hnei nyidrëti hna bëeke hmaca kowe la Tretretro i nyidrë e koho hnengödrai. (Ioane 17:4, 5) Haawe, ame lo hnei nyidrëti hna ahnithe amë kowe lo itre aposetolo i nyidrë me itre xane ju kö, tre, kolo lai a hape, nyidrëti a troa amele angatre hmaca, matre ce me nyidrë e koho hnengödrai. Nge nemene la hnei angatre me Iesu hna troa kuca e koho hnengödrai?— Tusi Hmitrötre a qaja, ka hape, ame la itretre drenge ka troa sine la “mele hmaca hnapan,” tre, angatr a troa mele e koho hnengödrai, me “ce musi me nyidë uti hë la ite macate ka ca thausan.”—Hna Amaman 5:10; 20:6; 2 Timoteo 2:12.

Ala ije la itre atr ka troa sine la “mele hmaca hnapan,” me ce musi me Iesu?— Ame ngöne la ketre drai, hnei nyidrëti hna qaja kowe la itretre drei nyidrë, ka hape: “Hnënge mamoe ka xalaithe fe, the qou kö, ke aja i Tetetro i nyipunie troa hamë nyipunie la baselaia.” (Luka 12:32) Ame lai “hnënge mamoe ka xalaith,” tre, kolo itre atr hna troa amelene hmaca, matre ce musi me Iesu ngöne la Baselaia ne hnengödrai. Hna e hi la etru i angatr. Tusi Hmitrötre a qaja ka hape, ala “ca hadede nge luate nge ekete la o thausan.”—Hna Amaman 14:1, 3.

Ala ije pë hë la angetre troa mele ngöne la Paradraiso e celë fen?— Tha hna qaja kö la etrune hnene la Tusi Hmitrötr. Ngo ame ekö e Edena, hnei Akötresieti hna upi Adamu me Eva troa hnaho aliene me atiqane la fene hnengödrai. Ngacama hnei nyidroti hna tha idrei, ngo tha saze kö la aja i Akötresie; tro pala kö a atiqane la ihnadro hnene la itre atr ka kuca la loi.—Genese 1:28; Isaia 45:18; 55:11.

Pane mekune jë la aqane troa mingöminge me lolo la mele elany ngöne la Paradraiso! Tro hë la fene hnengödrai elany a ketre hnehlapa ka mingöming. Nöjei pengöne sinöe me iengen a cia hlöeë, nge tiqa ha hnei öni me waco. Pë hmaca kö ka wezipo, pë hë akötr me mec. Itre treme sineen asë hë la nöjei atren. Maine pi tro fe sa hane mele palua ngöne la Paradraiso, nyipi ewekë tro së enehila a isa hnëkë hnyawa.

Hanawange la itre xa xötr ka amamane la aja i Akötresie thatraqane la ihnadro: Ite Edomë 2:21, 22; Ate Cainöj 1:4; Isaia 2:4; 11:6-9; 35:5, 6; 65:21-24.

[Iatr ne la götran 187]

Pine nemene matre Akötresieti a troa amelene hmaca la itre atr ka tha hane fe kö kuca la loi?

[Iatr ne la götran 188]

Ekaa lo lai Paradraiso hnei Iesu hna qaja kowe la atr celë?

[Iatr ne la götran 189]

Nemene la nyine tro sa mekun, ngöne la kola qeje Paradraiso hnei Tusi Hmitrötr?

[Iatr ne la götran 190]

Troa mele ekaa la itre atr hna troa amelene hmaca, nge nemene la hnei angatre hna troa kuca?