Mekene 28

Drei La Hne Së Hna Troa Drengethenge?

THATRE kö së e itre xa ijin, ka hape, tro sa drengethenge drei. Hanawange la ketre ceitun, maine jë troa upi eö hnei kaka me nenë troa kuca la ketre ewekë, nge upi eö hmaca jë hi hnene la atre hamë ini maine polis, troa kuca la ketre ewekë ka isazikeu memine la hna qaja hnei nyidro. Tro ju hë eö lai a drei drei?—

Hne së lo hna wange ngöne lo Mekene 7, la hna qaja hnei Tusi Hmitrötr ngöne Efeso 6:1-3. Kola amamane hnene la xötre cili, la enyipiewekëne e tro la itre nekönatr a drengethenge la itre keme me thine i angatr; kola hape: “Denge thenge ju la ite keme me thine i nyipunie thei Joxu.” Atre fe hi eö la aliene la kola hape, “thei Joxu”?— Kola qaja la itre keme me thine ka lapa thei Joxu, nge angetre inine la itre nekö i angatre troa drengethenge la itre wathebo i Akötresie.

Ngo ala nyimu la itre ka tru ka tha lapaune kö koi Iehova. Maine öni angatre jë hi ka hape, pëkö engazone troa atrekënö e hnine la setroa, maine igoeë qâ ngöne la hna ini e ijine itupath, tune kaa la mekuna i eö?—

Mekune ju eö lo kola upe la nöjei atr asë hnei Nebukaneza Joxu troa kei me thili kowe la hnasatr hnei nyidrëti hna acil. Tha hnei Saderaka kö lo me Mesaka me Abedenego hna drengethenge nyidrë. Atre fe hi eö lai kepin?— Pine laka kola qaja hnei Tusi Hmitrötr, ka hape, Iehova hmekuje hi la nyine tro sa thili kow.—Esodo 20:3; Mataio 4:10.

Thupene la mec i Iesu, hnene la itre aposetolo i nyidrë hna cile qëmekene la angetre isenyin. Hnene lo Atre Huuje Ka Sisitria ene Kaiafa hna qaja koi angatr, ka hape: “Hne huni hna ahnithe xönexönëne koi nyipunie mate tha tro kö nyipunie a inine ngöne la ëje [i Iesu] ; nge  hana wang, hnei nyipunie hna atiqane Ierusalema hnene la ini nyipunie.” Pine nemene matre tha hnene kö la itre aposetolo hna drengethenge la angetre isenyin?— Sa jë hi Peteru koi Kaiafa, me nyi trenge ewekëne lo itre aposetolo asë, ka hape: “Ijiji huni troa denge thenge Akötesie hune la at.”—Itre Huliwa 5:27-29.

Ame ngöne la ijine cili, atraqatre la musi ne la itre hene ne hmi angetre Iudra, ngo ame la ka musinëne la nöj, tre, itretre Roma. Kaisara la tane la musi angatr. Ngacama xele kö la angetre Iudra troa musinë angatre hnei Kaisara, ngo ame pe nyimutre la itre ewekë ka loi hna kuca thatraqai angatre hnene la musi nyidrë. Ame enehila, hetrenyi mina fe la itre ewekë ka loi hna kuca thatraqa së hnene la itre mus. Atre fe hi eö la itre xa ewekë cili?—

Kolo itre gojenyi hna kuca hnene la mus, matre saqe së nyinyapëne la itre gojenyi së. Hnene mina fe la musi hna nyithupene la itre polis me itre ka tha man, matre troa thupë së. Hetrenyi mina fe la itre uma ne ini hna xupe thatraqane la itre nekönatr, me itre uma nyine nyi hnalapa ne la itre qatr. Manie la jia ne la itre ewekë cili. Nge atre fe hi eö, ka hape, ka traqa qa ka la manie cili hna huliwane hnene la mus?— Qaathene hi la itre atr. Ame lo angatre a kuiëne la itre manie hna athipe hnei mus, angatre hi lo lai a hotr.

 Ame lo Atre Hamë Ini Ka Sisitria petre kö e celë fen, ala nyimu la angetre Iudra ka xele ma hotr kowe la musi angetre Roma. Ame ngöne la ketre drai, hna upe koi Iesu la itre xa atr hnene la itretre huuj, troa hnyingëne la ketre mekune ka jol. Öni angatre koi nyidrë, ka hape, ‘Hapeu, ijiji huni troa hotre koi Kaisara, maine tha ijiji huni kö?’ Angatr a hnyinge tune lai, matre troa tupathi Iesu. Maine öni Iesu ju ka hape, ‘Hotre jë,’ hawe, tro hë lai a elëhni la angetre Iudra. Nge maine qaja ju nyidrë ka hape, ‘Ohea, the hotre kö,’ tria ha nyidrëti lai.

Nemene la hnei Iesu hna kuca? Hnei nyidrëti hna sipone la ketre denari. Thupene lai, hnei nyidrëti hna hnyinge ka hape: ‘Qëmeke i drei la, nge nemene cahu hna cinyihan?’ Kola sa hnene la itre atr, ka hape: “Kaisara.” Haawe, öni Iesu jë hi ka hape: “Hamënepi koi Kaisara la ite ewekë i Kaisara ; nge koi Akötesie la ite ewekë i Akötesie.”—Luka 20:19-26.

Pëkö atr ka atreine troa sa maine isenyin memine la hna qaja hnei Iesu. Maine Kaisara a kuca la itre ewekë nyine loi koi së, haawe, meköti lai e tro sa kuiën la hna athipi manie koi së. Celë hi matre, Iesu a amamane hnyawa e celë la enyipiewekën e tro sa hotr kowe la mus, pine la itre ixatua hna hamëne koi së.

 Ngacama tha ijiji eö pala kö troa hotr, pine laka nekönatre petre kö eö, ngo hetre ewekë nyine tro fe hë eö a hane hamëne kowe la mus. Nemen?— Ene la troa drengethenge la itre wathebo i mus. Celë hi matre qaja jë Tusi Hmitrötr, ka hape: ‘Drengethenge ju la angetre musi atraqatr.’ Kola qaja lo itre atr hna acile troa musinëne la nöj. Iehova Akötresie la ka upi së troa drengethenge la itre wathebo i mus.—Roma 13:1, 2.

Maine amekötine jë hnei mus, ka hape, wathebo troa triji pepa menu e cahu gojeny, ke, tro kö eö a drengethenge lai?— Aja i Akötresieti fe hi lai. Nge hapeu la itre polis, tro fe kö eö a hane drengethenge angatr?— Hna nyithupei angatre lai hnei mus, göi troa thupë së. Ame la easa drengethenge angatr, tre, easë fe hi lai a drengethenge la mus.

Maine eö ju a mekune troa sole koi ketre pala gojeny, nge önine ju la polis, ka hape, “Pane treqene ju!” tro ju hë eö a kuci nemen?— Maine thupe gojenyi pe kö hnei itre xan, hapeu tro fe kö eö a hane xötrethenge angatr?— Itreqe ju pe, ngacama eö casi ju pe hi la ka cil. Ame la hnei Akötresieti hna sipo eö, tre, ene la troa idrengethenge.

Maine jë, troa traqa la ketre jole kowe la itre atr ka lapa ezi eö, ene pe önine jë hi la polis, ka hape: “The uti kö koi gojeny, isa lapa hnalapane ju.” Drenge ju hi eö la kola isueny, nge eö a pi atre ka hape, nemene ewekë jë lai? Hapeu, tro kö eö a tro kuhu gojeny?— E tro hë eö, ke, hapeu, eö kö lai a drengethenge “la angete musi atraqat”?—

Ame ngöne la itre nöje ka nyimutre, musi la ka xupe la itre uma ne ini, me nyithupene la itre ka hamë ini. Ame la eö a hane mekun, tre, aja i Akötresieti kö tro eö a drengethenge la atre hamë ini koi eö?— Pane mekune hnyawa jë eö. Musi la ka nyithupene la itre ka hamë ini matre troa ini eö, nge kola nyithupene mina fe la itre atrene la polis, göi troa thupë eö. Haawe, e tro eö a drengethenge la polis, maine ka hamë ini, eö fe hi lai a drengethenge la mus.

Ngo tune kaa ju hë e traqa ju upi eö hnene la ketre atre hamë ini koi eö troa thili kowe la ketre iatr, maine ketre hnasatre pena? Tro ju hë eö a  ujë tune kaa?— Mekune ju eö lo köni angetre Heberu, tha hnei angatre kö lo hna drengethenge Nebukaneza Joxu, lo ka upi angatre troa thili kowe la hnasatr. Mekune hi eö lo kepin?— Tha ajane kö angatre troa ena la wathebo i Akötresie.

Hnei Will Durant ketre atr ka inamacan, hna cinyihane la pengöne la itre pane Keresiano ekö, laka, ‘hnei angatre ekö hna sisinyi troa mele nyipici, ngo tha koi Kaisara kö.’ Angatre pe lo a sisinyi troa mele nyipici koi Iehova! Kolo fe a qaja koi së, ka hape, loi e tro pala hi sa amë panë Akötresie ngöne la mele së.

Easa drengethenge la mus, tune la aqane amekötine Akötresie. Ngo tro hë sa ujë tune  kaa, e upi së jë troa kuca la ketre ewekë hna wathebone hnei Nyidrë?— Epi tro fe sa tune lo itre aposetolo, lo kola sa kowe la atre huuje ka sisitria, ka hape: “Ijiji huni troa denge thenge Akötesie hune la at.”—Itre Huliwa 5:29.

Kola ini së hnei Tusi Hmitrötr troa drengethenge la wathebo. E jë la Mataio 5:41; Tito 3:1; me 1 Peteru 2:12-14.

[Iatr ne la götran 148]

Nemene la hnei Peteru hna qaja koi Kaiafa?

[Iatr ne la götran 149]

Hnei Iesu hna sa tune kaa kowe la hnyinge ne la itre atr celë ka thele troa tupathi nyidrë?

[Iatr ne la götran 151]

Pine nemene matre nyipi ewekë tro sa drengethenge la ketre atrene la polis?