Mekene 43

Drei La Itre Trejine Me Easë?

AME ngöne la ketre drai, hnyinge jë hi hnene la Atre Hamë Ini Ka Sisitria, me hape: “Dei la thineng ? nge ite dei la ite tejine me ini ?” (Mataio 12:48) Hapeu, atreine kö eö troa sa la hnyinge celë?— Atre hnyawa hi eö lo ka hape, Maria la thine i Iesu. Ngo atre fe kö eö la ëjene la itre trejine me nyidrë?— Hapeu, hetre xa i nyidrëti fe kö?—

Tusi Hmitrötr a qaja la ëjene la itre trejine me Iesu, ene “Iakobo, me Iosefa, me Simona, me Iuda.” Nge hetre xa i nyidrëti fe. Iesu hi la haetra, nge itre ka co pë hë la itre trejine me nyidrë, trahmanyi me fö.—Mataio 13:55, 56; Luka 1:34, 35.

Hapeu, hna hane fe kö xötrethenge nyidrë hnene la itre trejine me nyidrë?— Önine la Tusi Hmitrötr, ka hape, ame lo xötrei, “tha lapau nyidëti kö hnei ite tejine me nyidë.” (Ioane 7:5) Ngo e thupene hë, Iakobo me Iudra a hane ju xötrethenge nyidrë, me cinyihane lo itre xa tusi ne la Tusi Hmitrötr. Atre fe hi eö, ka hape, nemene la itre tusi cili?— Ene hi lo tusi Iakobo me Iudra.

Ngacama tha hnei Tusi Hmitrötre kö hna qaja la ëjene la itre xa i Iesu, ngo atre hi së laka ala lue nyidro. Lue ka hane fe kö nyidro xötrethenge Iesu?— Thatre kö së ke pëkö hna qaja hnene la Tusi Hmitrötr. Ngo atre hi eö la kepine matre hnyingëne jë Iesu, ka hape: “Dei la thineng ? nge ite dei la ite tejine me ini ?”— Tro sa ce wange lai.

Ame la Iesu a hamë ini kowe la itretre drei nyidrë, traqa ju hi la ketre atr a qaja koi nyidrë, ka hape: “Kola icilenyi e kuhu la thine i cilie me ite tejine me cilie, kola pi ithanata me cilie.” Hane hi lai ijine Iesu a hamëne pi la ketre ini ka sisitria, jëne la hnyinge celë, öni nyidrë: “Dei la thineng ? nge ite dei la ite tejine me ini ?” Thupene lai, nyidrëti a köjane ju  la itretre drei nyidrë, me hape: “Hana wange la thinenge me ite tejine me ini !”

Ase jë hi lai, Iesu a qeje pengöne ju me hape: “Ame la ate kuca la aja i Kakati e koho hnengödrai, celë hi jining, me xang, me thineng.” (Mataio 12:47-50) Drei la etrune la ihnim i Iesu kowe la itretre drei nyidrë. Kola ini së hnei Iesu ka hape, ame la itretre drei nyidrë, tre, itre trejine hi lai me nyidrë, itre trahmanyi me fö, me itre thine i nyidrë.

Ame ngöne la ijine cili, tha lapaune pala kö Iakobo me Iosefa me Simona me Iudra, koi Iesu Hupuna i Akötresie. Maine jë tha xecie hnyawa pala kö e kuhu hni angatr, lo itre ithanata ne lo angela Gaberiela koi Maria, thine i angatr. (Luka 1:30-33) Nge ma hnei angatre jë e itre xa ijin hna hane ngazo thiina koi Iesu. Ngo tha aqane ujë ne nyipi trejine kölai. Hetrenyi kö la ketre atr hnei eö hna atre, nge ka ngazo thiina kowe la trejine me angeic?—

Tusi Hmitrötre a qaja la mele ne la lue trejin, ene Esau me Iakobo. Hnei Esau ngöne la ketre ijin, hna elëhni koi Iakobo matre öni  angeice jë hi: “Tro ni a humuthi Iakobo jining.” Traqa ju hi la xou koi Rebeka thine i nyidro, nge eahlo pë hë a upi Iakobo jë troa kötr, wanga humuthi angeice pi hnei Esau. (Genese 27:41-46) Ngo eloine pe, thupene la itre macatre ka nyimutre, saze pi hi la thiina i Esau, nge amë hë la angeice a iöhnyi hmaca me Iakobo, tre, nyidroti a ihaluthe ju me idrem.—Genese 33:4.

Traqa koi 12 lao nekö i Iakobo. Ame pe la engazon, xele kö la itre nekö i nyidrë ka tru ma wai Iosefa, jin i angatr. Angatr a zalu pine laka sisitria kö la aqane hnimi Iosefa hnene la keme i angatr. Qa ngöne lai, angatr a salemë angeice ju kowe la itretre itö mo ka tro Aigupito eë. Nge angatr a thoi ju pë hë kowe la keme i angatr, ka hape, ase hë heji angeice hnene la ketre öni ka ihej. (Genese 37:23-36) Ketre ewekë ka ngazo catre la hnei angatre hna kuca, tune kaa fe la mekuna i eö?—

E thupene hë, angatre a ietra ju pine la ngazo hnei angatre hna kuca. Nge hnei Iosefa hna nuetrije la ngazo i angatr. Hapeu, öhne fe hi eö la ewekë ka ceitu hna kuca hnei Iosefa me Iesu?— Ame la kola traqa koi Iesu la ketre jole ka tru, hna kötre nyidrë hnene la itre aposetolo i nyidrë, nge hnei Peteru hna kelikelë nyidrë. Haawe, tui Iosefa, hnei Iesu hna nue la ngazo i angatr asë.

 Tro mina fe sa ce wange la pengöne la lue xa trejin, ene Kaina me Abela. Hetre ini hne së hna kapa qa ngöne la pengö i nyidro. Öhne hi Akötresie la hni Kaina, patre kö thei angeice la ihnimi kowe la trejine me angeic. Qa ngöne lai hnei Akötresie hna haji Kaina, me xatua angeice troa saze la aqane ujë i angeic. Maine ka hnimi Akötresieti ju Kaina, eje hi lai laka, tro hë angeice a drei Nyidrë. Ngo ngazo pe, patre kö thei angeice la ihnimi koi Akötresie. Haawe, ame ngöne la ketre drai, hnei Kaina hna hë Abela, me hape: “Tro so kowe la hnehlapa.” Abela hi lai a xötrethenge Kaina ju; traqa ju hi nyidro ngöne la hnehlapa, anyidroti casi hi, Kaina hi lai a lepe humuthe ju la jini angeic.—Genese 4:2-8, MN.

Tusi Hmitrötre a amamane koi së la ini ka sisitria nyine tro sa xome qa ngöne la edromë celë. Atre fe hi eö la ini cili?— “Dei lola wesi ula hnei nyipunie hna denge qa ngöne la qane laka qa shë troa ihnimikeu. Tha tro kö a tui Kaina lo qa ngöne la ka ngazo.” Haawe, loi e tro la itre trejin a ihnimikeu. The tui Kaina kö.—1 Ioane 3:11, 12.

Pine nemene matre tha tro pi kö sa tui Kaina?— Pine laka Tusi Hmitrötr a qaja, ka hape, ka xulu angeice “qa ngöne la ka ngazo” ene Satana Diabolo. Pine laka ceitune hnyawa hi la aqane ujë i Kaina me Diabolo, haawe, kösë keme i angeice hi lae Diabolo.

Hapeu, trotrohnine hi eö la kepine matre nyipi ewekë tro eö a hnime la itre trejine me eö?— Maine tha hnimi angatre kö hnei eö, haawe, itre nekö i drei la hnei eö hna nyitipun?— Itre nekö i Diabolo. Pi tro kö eö a tui angatr?— Haawe, nemene hö la aqane tro eö a amamane la aja ka eje thei eö troa nekö i Akötresie?— Nyipi ewekë tro eö a hnime hnyawane la itre trejine me eö.

Ngo nemene la aliene la kola hape, troa ihnim?— Ame la ihnim, tre, ene la aja ka tru ka eje e kuhu hni së troa kuca la loi kowe la itre xan. Kola mama la ihnim i së kowe la ketre atr, ngöne la easa ajane me thele troa kuca la loi koi angeic. Nge drei la itre trejine me easë hne së hna  troa hnim?— Mekune hi eö lo hnei Iesu hna inin; öni nyidrë, kolo lapa ka cahae ne la itre Keresiano.

Hapeu, ka nyipi ewekë kö la tro sa hnime la itre trejine me easë, itre Keresiano?— Tusi Hmitrötr a qaja, ka hape: “Ame la ate tha hnime kö la tejine me angeice hnei angeice hna goeën, tha ’teine kö angeice troa aja Akötesie lo hnei angeice hna tha goeën.” (1 Ioane 4:20) Haawe, tha tro hmekuje kö sa hnime hi la itre xa trejin, ngo tro pe sa hnimi angatr asë. Kolo hi lo hnei Iesu lai hna qaja; öni nyidrë: “Celë hi mate tro nöjei ate asëjëihë a wangate hmekune laka itete dei ni nyipunie, e tro nyipunie a ihnimikeu.” (Ioane 13:35) Tune kaa la pengöi eö, hnei eö fe kö hna hane hnime asë la itre trejine me eö?— The thëthëhmine kö eö ka hape, e tha hnim asë kö eö la itre trejine me eö, haawe, thatreine jë kö tro eö a hnimi Akötresieti hnyawa.

Nemene la aqane tro sa amamane la etrune la ihnimi së kowe la itre trejine me easë?— Maine easa hnimi angatr, haawe, tha tro kö së lai a thele troa tro thingetrö angatr, me tha ithanata me angatr. Ngo tro pala hi sa thiina ka loi koi angatr. Catre pi së troa kuca pala hi la loi, me ce thawa me angatre la nöjei ewekë ka lolo. Nge e traqa ju koi angatre la itre jol, xatua angatre ju ke, ce easë me angatr e hnine la lapa ka cahae.

Maine tro sa hnime ceitune la itre trejine me easë, tre, nemene la hne së hna amamane jëne la aqane imelekeu cili?— Itretre drei Iesu së, lo Atre Hamë Ini Ka Sisitria. Nge aja së hi lai, tune kaa fe la mekuna i eö?—

E jë la lue xötre celë ka ithuecatre koi së troa hnime la itre trejine me easë: Galatia 6:10 me 1 Ioane 4:8, 21.

[Iatr ne la götran 223]

Ame koi Iesu, drei la itre trejine me nyidrë?

[Iatr ne la götran 224]

Nemene la ini hne së hna xome qa ngöne la hnei Kaina hna kuca koi Abela?

[Iatr ne la götran 226]

Tro eö a amamane tune kaa la ihnim i eö kowe la trejine me eö?