Mekene 48

Easenyi Hë La Fene Ka Hnyipixe i Akötresie

HNEI Akötresieti hna ami Adamu me Eva ngöne la hnehlapa e Edena. Ngacama hnei nyidroti hna xele ma drei Akötresie matre meci la pun, ngo tha ase kö Akötresieti nue trije la itre matra i nyidro, ene easë. Hnei Nyidrëti hna thele jëne matre ijiji së fe troa hane mele epine palua ngöne la Paradraiso. Tusi Hmitrötr a thingehnaean, ka hape: “Tro ha la ange ka meköti a hetenyi la nöj, me lapa palua kö ngön’ ej.”—Salamo 37:29.

Kola qaja hnene la Tusi Hmitrötre la “hnengödrai ka hnyipixe” me “fene hnengödrai ka hnyipixe.” (Isaia 65:17; 2 Peteru 3:13) Ame la “hnengödrai” ka eje enehila, tre, kola qaja la itre musi hna acile hnei atr. Nge ame la “hnengödrai ka hnyipixe,” tre, kola qeje Iesu Keriso memine la itre atr ka troa ce musi me nyidrë e hnengödrai. Itre ka tro angatr a cilëne la musi ka meköti Akötresie, me haöthe la fene asë hnene la tingeting.

Nge nemene la pengöne la “fene hnengödrai ka hnyipixe”?— Kola qaja la nöjei atr asë ka kuca la loi me ka hnimi Iehova. Loi e tro eö a trotrohnine hnyawa la “fene hnengödrai” hna qaja e hnine la Tusi Hmitrötr; tha kolo kö a qaja la ihnadro, ngo itre ka tro pe a lapan la fene celë. (Genese 11:1; Salamo 66:4; 96:1) Qa ngöne lai, ame la itre atrene la fene hnengödrai ka hnyipixe, tre, kolo itre ka troa mele e celë fen.

Tro ha apatrene la itre atr ka ngazo qa ngöne la fene celë. The thëthëhmine kö eö laka, hna apatrene asë hi hnei Iwë lo itre atr ka ngazo, ka mele ekö ngöne lo hneijine i Noa. Tro fe hi a tune laielany. Tro ha apatren e Amagedo la itre atr ka ngazo ne la fene celë. Tro sa ce wange enehila la pengöne la mele elanyi ngöne la fene ka hnyipixe i Akötresie, thupei Amagedo.

Hapeu, pi tro fe kö eö elanyi a hane mele epine palua ngöne la Paradraiso, me mele tingetinge ngöne la fene ka hnyipixe?— Pëkö ca droketre enehila ka atreine troa hamëne koi së la mele ka tha ase palua kö. Ketre, pëkö  wenekas ka atreine troa thepe së qa ngöne la mec. Casi hi la gojenyi ne tro kowe la mele ka tha ase palua kö, ene la troa easenyi koi Akötresie. Hanawange la nyine tro sa kuca, tune la aqane amamane koi së hnene la Atre Hamë Ini Ka Sisitria.

Xome jë la Tusi Hmitrötre i eö, nge e jë la tus i Ioane mekene 17 xötre 3. Hanawange la hna qaja hnene la Atre Hamë Ini Ka Sisitria, kola hape: “Nge dei lola la mele ka tha ase palua kö, laka tro angat’ a ate hmekua cilie la nyipi Akötesieti ka cas, me Iesu Keriso la hnei cilieti hna upengëtin.”

Tune la hna qaja hnei Iesu, nemene la nyine tro sa kuca matre hetrenyi jë së la mele ka tha ase palua kö?— Ame la ewekë hnapan, nyipi ewekë tro sa thele troa atrepengöne la Tretretro së e hnengödrai ene Iehova, memine fe la Hupuna i Nyidrë, lo atre itö mele së. Qa ngöne lai, inine jë së la Tusi Hmitrötr. Celë hi la ixatua hna troa hamë eö hnene la itusi celë, hna hape, Drenge Ju La Atre Hamë Ini Ka Sisitria.

Ngo pine nemene matre kola qaja ka hape, e tro sa thele troa atrepengöi Iehova, tro hë sa mele epine palua?— Atre hi së ka hape, nyipi ewekë la tro sa xeni ngöne la nöjei drai; ketre tune mina fe, nyipi ewekë tro sa thele o drai troa atrepengöi Iehova. Kola qaja hnene la Tusi Hmitrötr, ka hape: “Tha tro kö a mele la ate hnei areto hmekuje hi, ngo hnene la nöjei tenge ewekë asë ka xulu qa ngöne la ine ula i Akötesie.”—Mataio 4:4.

Nyipi ewekë tro mina fe sa thele troa atrepengö Iesu Keriso, ke nyidrëti lo Hupuna hnei Akötresieti hna upe matre troa köletrije la itre ngazo së. Kola qaja hnei Tusi Hmitrötr ka hape: “Pëkö iamele thei kete.” Nge kolo mina fe a qaja ka hape: “Hetenyi hë la mele ka tha ase palua kö hnene la ate lapaune kowe la Hupuna.” (Ite Huliwa 4:12; Ioane 3:36) Ngo nemene la aliene la troa ‘lapaune’ koi Iesu?— Kolo lai a hape, loi e troa xecie hnyawa e kuhu hni së laka, nyidrëti hmekuje hi la jëne mele koi së, nge pëkö ketre. Hapeu hetrenyi kö the së lapaune cili?— Maine eje hi, tro hë së lai a catre drengethenge la Atre Hamë Ini Ka Sisitria ngöne la nöjei drai ne mele së.

Ame la ketre aqane tro sa drengethenge nyidrë, tre, ene la troa e lapane la itusi celë, me atrepengöne hnyawa la aliene la itre iatr. Loi e tro fe sa thele  troa atreine sa la itre hnyinge hna fejane ezine la itre iatre cili. Ketre, ka loi e troa ce e la itusi celë me kaka me nenë. Maine patre kö nyidro, ce e pena ju memine la itre xa ka tru, me itre xa nekönatre fe. Maine tro eö a xatuane la itre atr troa atre la itre ini hna hamëne hnene la Atre Hamë Ini Ka Sisitria, ijije fe hi tro angatre a hane mele epine palua ngöne la fene ka hnyipixe hna hnëkëne hnei Akötresie. Hapeu, tha ewekë ka mingöminge kö lai?—

Ase jë hi Tusi Hmitrötre qaja koi së ka hape: “Kola pate la fene hnengödrai,” ej a amamane jë pena koi së la nyine troa kuca matre tro sa mele epine palua ngöne la fene ka hnyipixe i Akötresie. Önine ej: “Troa cile huti epine palua la ate kuca la aja i Akötesie.” (1 Ioane 2:17) Qa ngöne lai, tune kaa la aqane tro sa kapa la mele ka tha ase palua kö ngöne la fene ka hnyipixe cili?— Tro sa thele troa atrepengöi Iehova me Iesu lo Hupuna hnei Nyidrëti hna hnim. Ngo tha tro kö sa thëthëhmine troa trongëne la itre ini hne së hna kapa. Epi tro la itre ini hnei eö hna kapa qa hnine la itusi celë a xatua eö troa melëne la nöjei ewekë celë.

 [Iatr ne la götran 251]

Maine tro eö a e la tus i Isaia 11:6-9 me Isaia 65:25, tro hë eö a öhne la aqane mele tingetinge ne la itre öni. Goeëne ju la itre iatre celë. Öhne hi eö cahu neköi mamoe, me neköi nani, me lepad, me kau, me liona atraqatr, memine cahu nekönatr ka ce tro me angatr? Hapeu, öhne fe hi eö la itre xa öni hna qaja hnene la Tusi Hmitrötr?— Goeëne ju cahu nekönatre kola ce elo memine la un! Ame ngöne la fene ka hnyipixe, tha tro hmaca kö la ketre atr a xou. (Hosea 2:18) Matre, tune kaa fe la mekuna i eö?—

 [Iatr ne la götran 252]

Pane goeëne ju cahu nöjei pengöne atr; angatr a ce mele tingeting. Nge mama hi ka hape, angatr a trongëne la hna upi angatre hnei Iesu troa kuca, ene la troa ihnimikeu. (Ioane 13:34, 35) Ame la itre jia ne isi, tre, angatre a ujëne itre eje matre nyine uja dro. Kola qaja hnei Tusi Hmitrötre ka hape, tro ha tingetinge me mele xetietë la itre atr ngöne la fene ka hnyipixe. Hanawange la itre xötre ka qeje pengöne lai: Salamo 72:7; Isaia 2:4; 32:16-18; me Ezekiela 34:25.

 [Iatr ne la götran 253]

Hanawange cahu itre trahmanyi me itre föe me itre nekönatr. Angatr a nyihnyawa la ihnadro, matre troa ketre göhnë ka mingöming. Öhne fe hi eö la emingömingöne cahu hnalapa hnei angatre hna kuca, memine la nöjei pengöne wene sinöe me feja. Pine laka tha kolo hmaca kö a angazone la ihnadro hnene la itre atr, haawe, kösë ketre Paradraiso hë enehila, tune ekö lo hnehlapa e Edena. E jë la itre xa ewekë ka lolo hna qaja ngöne la itre xötre celë: Salamo 67:6; 72:16; Isaia 25:6; 65:21-24; me Ezekiela 36:35.

 [Iatr ne la götran 254]

Kola mama hnyawa ngöne cahu iatr la aqane lolone la mele ne la itre atr, itre ka egöcatre me madrin asë hi angatr. Pëkö ka peje ca me timek, maine hna tithi pena hnei mec. Öhne fe kö eö cahu itre atr hna amelene hmaca? Tusi Hmitrötr a qeje pengöne la itre ewekë cili ngöne Isaia 25:8; 33:24; 35:5, 6; Itre Huliwa 24:15; me Hna Amaman 21:3, 4.