Mekene 16

Ewekë Ka Sisitria Catr

AME ngöne la ketre drai, hnene la ketre atr hna traqa troa wai Iesu. Atre hnyawa hi angeic laka, eje thei Iesu la inamacan, ene pe öni angeic koi nyidrë ka hape: ‘Atre ini fe, pane qaja jë kowe la trejine me eni troa ce thawa me eni la itre xa ewekë i angeic.’ Ame la mekuna ne la atre cili, tre, meköti fe tro angeice a hane hetrenyi la itre ewekë ne la trejine me angeic.

Maine eö ju lae Iesu, tro hë eö a sa tune kaa kowe la atre cili?— Trotrohnine ju hi Iesu laka hetre hnepe jole thei angeic. Tha ene kö la troa piin la hna hetrenyi hnene la trejine me angeic. Ngo hna ajolë angeice hi hnene laka thatre kö angeice la ewekë nyine troa amë panëne ngöne la mele i angeic.

Pane thele hnyawa jë pe së la mekune celë. Nemene la ewekë nyine tro sa thele panëne ngöne la mele së? Ene la troa hetrenyi la itre nyimo, me itre iheetr ka hnyipixe, maine itre xa ewekë kö?— Ohea, hetrenyi kö la ketre ewekë ka sisitria catr. Hane hi lai kepine matre qaja jë Iesu la pengöne la atr ka thëthëhmi Akötresie. Ajane fe kö eö troa drenge la edromë cili?—

Ka trenamo catre la atr cili. Nyimu hlapa i angeice nge nyimu umatë i angeic. Hnene laka ka mele la itre hlapa i angeic, tha ijijë hë troa xawane itre eje hnine la itre umatë. Matre, nemene hë la hnei angeice hna troa kuca? Öni angeic ka hape: ‘Tro ni a thë la itre umatëng, me acili hnan, ngo ka tru catre pe. Celë hi matre, ijije tro ni a xawane asë la itre wene ka loi ne la itre hlapang.’

Hna mekune hnene la atr celë laka, aqane tro hi lai a huliwa. Ame koi  angeic, huliwa ne ka inamacane la troa xawane tune la, la itre ewekë i angeice ka nyimutre. Öni angeice jë hi ka hape: ‘Pine laka hnenge hna xeen amë la itre ewekë ka nyimutre, haawe, tha tro kö ni a jinë xeni elany. Qa ngöne lai, tha luelue kö ni. Tro hë ni la a nango xen, me ij me madrin.’ Ngo tha ka loi kö la aqane waiewekë ne la atr ka trenamo celë. Ame koi eö, hnauëne lai?— Angeice hmekuje hi a meku angeice me thele troa sipu amadrinë angeice kö. Ngo tha angeice fe kö a hane meku Akötresie.

Haawe, Akötresieti pë hë a ithanata jë kowe la atr ka trenamo cili. Öni Nyidrëti ka hape: ‘Hmo hë eö. Tro hë eö a mec ngöne la jidri celë. Nge thatraqai drei pë hë la itre ewekë hnei eö hna xeen amë?’ Hapeu, e meci pi lai atre trenamo, tro hmaca jë kö angeice a öhnyi eloine la itre ewekë i angeic?— Ohea, thatraqai itre xan pë hë lai. Celë hi matre, qaja jë Iesu kowe lai atr ka traqa troa wai nyidrë, ka hape: “Tui angeice la ate ami ewekë thatraqai angeice kö, nge pëkö nyi angeice thei Akötesie.”—Luka 12:13-21.

Hapeu, pi tro kö eö a nyitipune la atr ka trenamo celë?— Ka tru koi angeice troa nyinyape thele la itre mo ne fen. Ketre mekune lai ka ngazo catr, hnene  laka joxu catre kö la pi hetreny. Ame hi la engazon, “pëkö nyi angeice thei Akötesie.”

Nyimutre enehila la itre atr ka ujë tune la atr ka trenamo celë. Loi e tro pala hi a xomi xan la itre ewekë i angatr. Ngazo pe, tro ha traqa koi angatre la itre jole ka nyimutre. Hanawange la ketre ceitun, hetre nyimo i eö kö?— Nemene la itre xa nyimo i eö? Maine hetre balo maine droli ne la sine ce elo i eö, maine ketre ewekë pena ka pë thei eö, nemene la hnei eö hna troa kuca? Tro kö eö a pi hune fë tro la keme me thine i eö, a itöne la ewekë cili?—

Maine jë ame e itre xa ijin, eö hi a nyipi ewekëne la nyimo e xötrei. Ngo nemene ju hë la pengöne ej, e qea ha?— Kolo ha hnyiqetr trootro. Maine xecie hmaca pena ha, nge watripëhë eje, ke, tha nyipi ewekëne hnyawa ha eö. Ngo loi e tro eö a atre hnyawa, laka, hetrenyi la ketre ewekë ka sisitria catre kö hune la itre nyimo i eö. Atre fe hi eö ka hape nemen?—

Ene la mele i eö. Nyipici, maine patre ju la mel, pëkö ewekë hnei eö hna atreine troa kuca. Ngo maine eö a pi mel, nyipi ewekë tro eö a kuca la itre ewekë ka amadrinë Akötresie, tune ka fe la mekuna i eö?— Haawe, the tro kö a ujë tune lo lai atr ka trenamo ka thëthëhmi Akötresie.

 Tha itre nekönatre hmekuje kö la ka ujë qene hmo, tune lo lai atr ka trenamo. Hna tune fe lai hnene la itre ka tru. Hnei itre xane pala hi hna pi hetre mo. Hetrenyi hë angatre la xeni thatraqane la nöjei drai, me iheetr, me hnalapa. Ngo angatre hmaca kö a ajan atrun. Ke, kolo pala hi a thele troa nyimu iheetr, me atrune catrëne la itre hnalapa. Itre ewekë lai ka tru thupen. Celë hi matre, angatre pala hi a catre huliwa matre tru la manie hna kapa. Eje hi laka, tru ju hë la manie hna troa kapa, ngo tru catre pala hi la hna ajane troa itön.

Ame itre xan, tru catre hë la hawa i angatre thei maseta, nge co pe hi thatraqane la hnepe lapa i angatr. Nge pëhë ijine nyine tro angatre a hamëne koi Akötresie. Ngo hapeu, ijije kö tro la manie i angatre a itö mele i angatr?— Ohea. Nge e meci pi angatr, ijije hmaca kö tro angatre a huliwane la manie i angatr?— Ohea. E meci hë la atr, pëkö ketre ewekë hnei angeice hna atreine troa kuca.—Ate Cainöj 9:5, 10.

Hapeu, kolo lai a hape, tha ka loi kö e troa hetre mani?— Ohea. Ka nyipi ewekë lai koi së, matre troa itö xen, me iheetre së. Tusi Hmitrötre mina fe a qaja ka hape, ketre titaxapo la mani. (Ate Cainöj 7:12) Ngo ewekë ka ngazo la troa hni koi mani. Tro hë sa tune lo lai atre trenamo, laka hna xawane amë la itre ewekë thatraqai angeice kö, ngo tha thele pe troa trenamo xajawa i Akötresie.

Nemene la nyine tro sa kuca, matre tro sa trenamo xajawa i Akötresie?— Loi e tro sa amë panë Akötresie ngöne la mele së. Hnene la itre xa atr hna selëne ka hape, ka lapaune fe hi angatre koi Akötresie; nge ijijë hë lai. Ngo ka trenamo fe kö angatre xajawa i Akötresie?— Ohea, ceitui angatre hi memine lo atre trenamo ka thëthëhmi Akötresie.

Tha hnei Iesu fe kö hna thëthëhmine la Tretretro i nyidrë e koho hnengödrai. Ketre, tha hnei nyidrëti kö hna nyinyape thele mani. Nge ketre, tha hnei nyidrëti kö hna thele troa hetrenyi la itre mo ka nyimutre. Ka sisitria hnyawa koi Iesu la ewekë nyine amë panëne ngöne la mele i nyidrë. Atre fe hi eö ka hape, nemen?— Ene la troa trenamo xajawa i Akötresie.

Ngo pane qaja jë koi ni la aqane tro sa trenamo xajawa i Akötresie?— Hnene la hna kuca la itre ewekë ka amadrinë Nyidrë. Hnei Iesu hna qaja ka hape: “Ini a kuca pala hi la nöjei ewekë nyine amadi nyidë.” (Ioane 8:29) Easa  amadrinë Akötresie ngöne la easa kuca la itre ewekë hnei Nyidrëti hna ajan. Nemene la itre xa ewekë nyine tro eö a kuca, matre troa amadrinë Akötresie?— Eje hi lai, ijije hi tro eö a e la Tusi Hmitrötr, me sine la itre icasikeu ne Keresiano, me thithi koi Akötresie, me xatuane mina fe la itre xa atr troa atrepengö i Nyidrë. Celë hi la itre xa ewekë nyine tro sa wanga atrune ngöne la mele së.

Hnene laka ka trenamo Iesu xajawa i Akötresie, ene pe hnei Iehova hna thupë nyidrë. Ketre, hnei Akötresieti fe hna hamëne koi Iesu la manathithi ka tru, ene la troa mele palua. Maine tro sa xötrethenge hnyawa la tulu i Iesu, tro hë Iehova a hnimi së, me hane thupë së fe. Hawe, catre pi së troa nyitipu Iesu, ngo the tune kö lo atre trenamo ka thëthëhmi Akötresie.

Hanawange la itre xa xötr ka amamane la aqane tro sa goeëne hnyawa la itre mo ne fen: Ite Edomë 23:4; 28:20; 1 Timoteo 6:6-10; me Heberu 13:5.

[Iatr ne la götran 87]

Nemene la jole ka eje thene la atr celë?

[Iatr ne la götran 88]

Nemene la hna mekune hnene la atre trenamo celë?

[Iatr ne la götran 89]

Nemene la ewekë hnei eö hna hetreny, laka, ka sisitria catre kö hune la itre nyimo i eö?

[Iatr ne la götran 91]

Nemene la ewekë ka sisitria catr hna kuca hnene la nekönatr celë?