Mekene 18

Hane Fe Kö Eö Mekune Troa Olen?

AME la eö a xen, tre drei la ka kuci xen?— Hnei nenë maine ketre atr pena. Ngo pine nemene matre tro eö a olene la xen koi Akötresie?— Pine laka, maine patre ju Akötresie, pëkö xen. Ngo nyipi ewekë tro sa olene fe kowe la atre kuca maine atre thawa la xen.

Ame e itre xa ijin, hne së hna thëthëhmine troa olene la itre ewekë ka loi hna kuca thatraqai së. Kolo ewekë lai ka traqa ekö kowe lo itre xa lepera ngöne lo hneijine ne la Atre Hamë Ini Ka Sisitria.

Atre fe hi eö la pengöne la lepera?— Ame la atr hna tithe hnene la meci cili, tre, kola ulele me ae trotro la itre hnepe götrane la ngönetrei angeic. Ame lo Iesu e celë fen, hna amë casin la itre atr ka lepera, ke tha loi kö e tro angatre a lapa easenyine la itre atr. E öhne hë hnene la lepera la ketre atr a tro hmeku i angeic, tro angeice lai a sue matre troa thuemacane lai atr troa tro ananyi angeic, wanga ixötrekeu pi lai mec.

Loi la thiina i Iesu kowe la itre lepera. Ngöne la ketre drai hnei Iesu hna tro Ierusalema eë; traqa ju hi nyidrë ngöne la ketre traon nge öhnyi nyidrëti ju hi hnene la treen lao lepera. Drenge hë angatre laka, hnei Akötresie hna hamëne koi Iesu la mene troa aloine la nöjei pengöne mec.

Ngacama kola cile ananyi Iesu hnene la itre ka lepera, ngo ka xecie hnyawa koi angatr, laka, ijije hi tro Iesu a aloine la meci angatr. Celë hi matre, ame la angatr a öhne la Atre Hamë Ini Ka Sisitria, angatre hi lai a sue draië, me hape: ‘Iesue Atre hamë ini fe, pane xatua nyihunieti jë!’

 Hapeu, ka hane fe kö eö hnime la itre atr ka wezipo?— Hnei Iesu fe lo hna ujë tune lai. Atre hnyawa hi nyidrë la ehacene la mele ne la itre lepera. Celë hi kepin matre öni nyidrëti koi angatr, ka hape: “Ange troja a amamai nyipunieti jë koi angete huj.”—Luka 17:11-14.

Pine nemene matre qaja jë Iesu koi angatre la ewekë celë? Pine la wathebo hna hamëne hnei Iehova kowe la itre hlue i Nyidrë, göi itre ka lepera. Kola amamane hnene la wathebo cili, la hnëqa ne la atre huuje troa goeëne la ngönetrei ne la atr ka lepera, ke, qâ i angeice troa wange ka hape, patre hë la meci thene lai ka wezipo. Maine loi hë la mec i angeic, haawe, ijije hmaca ha tro lai ka wezipo a ce mele hmaca memine la itre atr ka pë mecin.—Levitiko 13:16, 17.

Ngo ame lo ala treen, ka lepera pala kö angatr. Matre hapeu, tro  jë kö angatre lai a tro kowe la atre huuj, tune lo aqane upi angatre hnei Iesu?— Eje hi, canga tro hi angatr, ke xecie hnyawa koi angatr, laka, tro Iesu a aloine lai meci ka eje thei angatr. Matre, nemene ju hë la ewekë ka traqa?

Traqa pë hë angatre thene la atre huuj, nge patre hë la meci thei angatr. Lolo hmaca ha la ngönetrei angatr, nge egöcatre hnyawa hmaca ha angatr. Manathithi hë angatre qa ngöne la lapaune i angatre kowe la mene ka eje thei Iesu. Drei jë kö la kola elitrauje la madrine i angatr! Ngo hnei angatre hna olene tune kaa koi Iesu? Maine eö ju, nemene fe la nyine tro eö a kuca?—

Ala casi hi qaathene lo lai ala treen la ka bëeke hmaca koi Iesu. Hnei angeice hna atrunyi Iehova, me qaja aloinyi Nyidrë. Meköti la aqane ujë i angeic, ke, ame laka loi pi la meci angeic, tre, qaathene la mene i Akötresie ka eje thei Iesu. Hnei angeice hna kei fene la lue ca i Iesu me sa watingöneca troa olene koi nyidrë. Atraqatre la hni ne ole thei angeic pine la ewekë hna kuca hnei Iesu.

Ngo eka pë hë lo ala naen? Iesu a hnyinge ju me hape: ‘Hapeu, tha ala treene kö lo itre hna aloin? Eka ju pë hë lo ala naen? Hapeu, a ala casi pe hi la ka bëeke troa atrunyi Akötresie?’

 Eje hi, ala casi pe hi la ka atrunyi Akötresie, me bëeke hmaca troa olene koi Iesu. Atre ne ketre nöje kö la thupëtresij cili, atre Samaria. Ngo patre pë hë lo ala naen troa olene koi Akötresie me Iesu.—Luka 17:15-19.

Drei la nyine tro eö a nyitipune thene la itre atr celë? Tha ene kö lo lai atre Samaria, tune kaa fe la mekuna i eö?— Haawe, maine kola kuca la loi koi së hnei ketre atr, nemene fe la nyine tro sa kuca koi angeic?— Olene jë koi angeic. Hnene la itre atr e itre xa ijin hna thëthëhmine troa olene la ewekë hna kuca. Ngo ka nyipi ewekë catre la ole, ke, aqane ujë lai ka amadrinë Iehova Akötresie me Iesu Hupuna i Nyidrë.

Maine tro eö a mekune hnyawa, tro hë eö lai a wanga atrehmekune laka, nyimu atr ka kuca la loi koi eö. Ase jë fe kö hane tithi eö hnei mec?— Maine jë tha hnei lepera kö, ngo hna hane löthi eö hnei hnötr, maine akötre hni pena. Hapeu, hetre atr kö ka nyipi ewekë eö?— Maine jë hnei angeice hna hamë wenekas, maine itre xa drösinöe pena. Hapeu, madrine kö eö la kola thupë eö hnyawa hnei angeic?—

Hnene la atre Samaria hna olene koi Iesu pine la hnei nyidrëti hna aloine la mec i angeic, nge hna amadrinë Iesu hnene la aqane ujë cili. Haawe, maine tro eö a olene la itre ewekë hna kuca koi eö hnene la keme me thine i eö, hapeu, tha tro jë kö nyidroti lai a madrin?— Eje hi.

Nyimu atr ka xatua eö e nöjei drai maine e nöjei wiike pena. Ngacama ame e itre xan, tre, sipu huliwa i angatre kö lai, ngo hnei angatre  pala hi hna kuca cememine la madrin. Thupëne kö ke thëthëhmine pi eö troa olene koi angatr. Hanawange la ketre ceitun, hnene la atre ini eö hna catre xatua eö matre hetre thangane la itre hnei eö hna inin. Ngacama qa i angeice hi lai, ngo tro kö a tru catre la madrine i angeic, e tro eö a olene la hnei angeice hna xatua eö.

Ame e itre xa ijin hetre itre hnepe ewekë hna kuca koi eö hnene la itre atr. Ase hë eö hane öhne la ketre atr e fe koi eö la qëhnelö? Maine kepe trepe ai eö pena? Ngacama itre ewekë lai ka co hna kuca koi së, ngo the thëthëhmine kö së troa olen.

Maine hne së hna mekune troa olene pala hi kowe la itre atrene la fene celë, tro fe hë së lai a hane majemine olene kowe la Tretretro së e koho hnengödrai. Eje hi, nyimu kepine tro sa olene koi Iehova! Qaathei Nyidrëti la mele së, nge Atre hamë së la nöjei ewekë asë nyine amadrinëne la mele së. Haawe, catre pi së atrunyi Akötresie me qaja aloinyi Nyidrë ngöne la nöjei drai ne la mele së.

Tune kaa la aqane tro sa olene koi Akötresie? E jë la Salamo 92:1; Efeso 5:20; Kolose 3:17; me 1 Thesalonika 5:18.

[Iatr ne la götran 98]

Hnei Iesu hna upe la itre ka lepera troa kuci nemen?

[Iatr ne la götran 99]

Nemene la hna mekune troa kuca hnene la atr ka lepera celë?

[Iatr ne la götran 100]

Tune kaa la aqane tro eö a nyitipune lo atre lepera ka bëeke hmaca koi Iesu?

[Iatr ne la götran 101]

Pine nemene matre nyipi ewekë tro pala hi sa mekune troa olen?