Mekene 29

Hapeu, Hna Kapa Kö Hnei Akötresie La Nöjei Feet Asë?

HAPEU, ka pi tro kö eö a hane sine la itre feet?— Nyipici kolo itre ijine kola elitrauje la itre madrine së lai. Tune kaa la mekuna ne lo Atre Hamë Ini Ka Sisitria, aja i nyidrëti jë fe kö tro sa hane sine la itre feet?— Eje hi, hnei nyidrëti fe hi lo hna hane sine lo ketre feet. Hna ce könë nyidrëti lo memine la itretre drei nyidrë kowe la ketre faipoipo. Pine laka Iehova la “Akötesie [“ka madrin,” MN],” haawe, ka tru fe hi la madrine i Nyidrë e tro sa hane sine la itre feet ka lolo.—1 Timoteo 1:11; Ioane 2:1-11.

Ame ngöne la götrane 29 ne la itusi celë, hne së lo hna inine ka hape, hnei Iehova hna thawaluëne la Hneopegejë Ka Palulu, matre fe gojenyine lo angetre Isaraela. Mekune hi eö lo lai ijine cili?— Ame hë la angatre a traqa kowe la ketre götrane la hneopegejë, angatre hi lai a pane nyima jë me fia, matre amamane la ole i angatre koi Iehova. Ketre feet ka tru pi hë. Hnene laka tru la madrine ne la nöj, haawe, ketre tru fe la madrine i Akötresie.—Esodo 15:1, 20, 21.

Thupene la fotre lao macatre, tro pi hi la angetre Isaraela troa hane sine la ketre feet. Ame pe la engazon, hna könë angatre hnene la itre ka tha nyi hlue i Iehova kö. Itre ka nyi hluene lo itre xa haze, nge itre ka majemine kuci ngazo. Ka loi fe kö koi eö troa hane sine la itre feet ka tune lai?— Hna tru catre la elëhni Iehova kowe lo angetre  Isaraela, ene pe hnei Nyidrëti hna nyi thupene koi angatr.—Numera 25:1-9; 1 Korinito 10:8.

Hnene la Tusi Hmitrötr hna qaja la lue atr ka atrune la drai ne hnaho nyidro. Hapeu, kolo kö lai a hane qaja la drai ne hnahone lo Atre Hamë Ini Ka Sisitria?— Ohea. Lue feete ne la lue wanaithihlë ka tha nyi hlue Iehova kö. Ame la ëje ne la ketre e nyidro, tre, Heroda Anetipa. Nyidrëti hi lo ka cilëne la musi e Galilaia ngöne lo ijine i Iesu.

Nyimu ewekë ka ngazo hna kuca hnei Heroda joxu. Hnei nyidrëti hna ce mama memine la föe ne la trejine me nyidrë, Herodia la ëjen. Hnei Ioane Bapataiso, ketre hlue i Akötresie, hna qaja amamane koi Heroda, ka hape, tha ka loi kö la itre ewekë hnei nyidrëti hna kuca. Atraqatre la elëhni Heroda, nyidrëti a kuië Ioane pi kowe la kalabus.—Luka 3:19, 20.

Hnei Heroda hna kuca la ketre feet ka tru göi troa atrune la ijine hnaho nyidrë. Nyidrëti pë hë a könëne jë la itre atr ka sisitria ne la nöj. Angatr a xeni me iji me ce madrin ngöne la ijine cili. Traqa ju hi la nekö i Herodia jajiny, a fia qëmeke i angatr. Tru la madrine i angatre pine la aqane atreine angeice fia, nge Heroda fe hi lai a pi hamë angeice ju la ketre ahnahna ka tru. Öni nyidrëti ka hape: “Tro ni a hamë eö la hnei ’ö hna troa qaja koi ni uti hë la kete götrane la baselaiang.”

 A tro jë angeic a sipo nemen? Mani? Maine ixetre ka lolo? Maine ketre uma atraqatr? Ngo tha mama kö koi angeice la nyine tro angeic a sipon, celë hi matre angeice a tro ju koi Herodia thine i angeic, me hape: “Tro ni a qeje nemen ?”

Pine laka methi Herodia lae Ioane Bapataiso, eahlo a sipone ju kowe la nekö i eahlo jajinyi troa traqa fë la he i Ioane. Ame hnei angeice hna canga bëeke hmaca jë kowe la joxu, me hape: “Ini a ajane tro cilieti a hamë ni enehila la he i Ioane bapataiso hnine la cei.”

Tha ajane kö Heroda troa humuthi Ioane, ke ketre atr ka loi angeic. Ngo pine laka ase hë nyidrëti sisiny, haawe xou nyidrëti hë wanga tro la itre atr a mekune ka hape, tha eatrëne kö nyidrë la hnei nyidrëti hna sisiny. Qa ngöne lai, nyidrëti a upe ju la ketre hlue troa thupa la nyinawa i Ioane. Bëeke fë jë hi hnene la hlu la he i Ioane hnine la cei, me hamëne kowe la jajiny. Nge jajinyi a tro fë hmaca ju pena kowe la thine i angeic.—Mareko 6:17-29.

Ketre ka pë eloine lo hnaluene feet hna qaja hnei Tusi Hmitrötr. Kola feetëne la drai ne hnaho ne la Joxu ne Aigupito. Ame ngöne la ijine cili, hnene la joxu hna thupa la he ne la ketre atr. Nyidrëti a athipe ju la ngönetrei angeic nyine ithue önine la itre waco! (Genese 40:19-22)  E tro eö a mekun, hnei Akötresieti kö hna kapa la lue feet cili?— Pi tro fe kö eö lai a hane sine la itre feet ka tun?—

Hetre sipu kepine matre kola cinyihane la nöjei ewekë asë e hnine la Tusi Hmitrötr. Tusi Hmitrötr a qaja la lue atr ka feetëne la drai ne kola hnaho nyidro. Nge ame asë hi ngöne la lue feet cili, tre, hna traqa la itre ewekë ka ngazo. Haawe, ame koi eö, nemene la hnei Akötresieti hna ajane tro sa trotrohnine hnyawa? Hapeu, Nyidrëti kö a ajane tro sa atrune la drai ne hnaho së?—

Ame enehila, tha kolo hmaca kö a thupa la nyinawa ne la itre atr ngöne la itre ijine feetë drai ne hnahon. Ngo tha tro pi kö sa thëthëhmin, ka hape, hna nyiqane atrune hi la itre drai ne hnahon, hnene lo itre atr ka tha thili kö kowe la nyipi Akötresie. Kola qaja hnene la ketre diksioner (The Catholic Encyclopedia) göne lo itre feete cili ka eje e hnine la Tusi Hmitrötr, ka hape: “Itre atr ka ngazo hmekuje hi la angetre feetë drai ne hnahon.” Hapeu, ajane kö së troa hane tui angatr?—

Nge tune kaa fe la Atre Hamë Ini Ka Sisitria? Hnei nyidrëti fe kö hna hane atrune la drai ne hnaho nyidrë?— Ohea, tha hnei Tusi Hmitrötre fe kö hna qaja ka hape, hna hane atrune la drai ne hnaho Iesu. Ketre tune mina fe lo itretre drei nyidrëti ekö, laka tha hnei angatre fe kö hna hane atrune la drai ne hnaho Iesu. Ngo atre fe hi eö la kepine matre kola feetëne hnene la itre atr, la ijine hnaho nyidrë lo 25 Diseba?—

Kola qaja hnene la ketre itus (The World Book Encyclopedia) ka hape, hna iëne la drai cili pine laka “kola feetëne hnei angetre Roma lo feet, hna hape, Saturne, ijine hnahone la jö.” Kola mama hnyawa e celë, laka, hna xome la drai ne feete i ange wanaithihlë matre tro hmaca pena ha atrune la drai ne hnaho Iesu!

Ngo atre fe hi eö la kepine matre thatreine kö troa qaja ka hape, hna hnaho Iesu lo Diseba?— Pine laka kola qaja hnei Tusi Hmitrötr, ka hape, ame ngöne lo ijine hnaho Iesu, eje ngöne la itre hlapa la itretre thupë mamoe, a kola thupëne la itre mamoe i angatr e jidr. (Luka 2:8-12) Ngo kola amamane hnyawa lai ka hape, ame ngöne la treu Diseba, tre, ijine manie lai nge hnötre catr; haawe, thatreine kö tro angatr a hlë jidr ngöne la itre hlapa.

 Ala nyimu la angetre atre hë ka hape, ame la Noel, tre, tha ijine hnaho Iesu kö. Ketre, atre fe hi angatre laka, kolo hi lo ijine feete i ange wanaithihlë, feete hna xele ma wang hnei Akötresie. Ngo pi tro kö angatre a atrune la Noel, pine laka ka tru kö koi angatre la kuci madrin, hune la troa thele la mekuna i Akötresie. Ngo ame easë, aja së kö troa amadrinë Iehova, hapeue fe la mekuna i eö?—

Haawe, e kuci feete jë së, nyipi ewekë e troa xecie koi së laka, pëkö engazone la feete cili xajawa i Iehova. Ceitune asë hi la itre drai ngöne la macatre; haawe, e mekune hë së troa kuci feet, tha nyipi ewekë kö tro sa treqene lo itre drai hna majemine troa feetën hnei nöjei atr. Ngo ame pe ngöne la drai cili, ijine ka lolo lai tro sa ce kuci xeni me ce madrin me ce elo. Hapeu, madrine fe kö eö troa hane kuca tune lai?— Haawe, ce ithanatane jë me kaka me nenë, nge sipo nyidroti jë troa ce hnëkëne me eö. Matre, ka lolo kö lai koi eö?— Celë hi matre, e mekune hë së troa kuca la ketre ewekë, pane thele jë ka hape, ka tro kö lai a amadrinë Akötresie?

Loi e tro pala hi a kuca la itre ewekë ka amadrinë Akötresie. Celë hi hna amamane hnene la tusi Ite Edomë 12:2; Ioane 8:29; Roma 12:2; me 1 Ioane 3:22.

[Iatr ne la götran 152]

Pine nemene matre hna kapa hnei Akötresieti la feete celë?

[Iatr ne la götran 153]

Nemene la ewekë ka traqa ngöne lo kola atrune la drai ne hnaho Heroda?

[Iatr ne la götran 154]

Pine nemene matre tha ijije kö troa qaja ka hape, hna hnaho Iesu lo 25 Diseba?

[Iatr ne la götran 156]

Tro sa atre hnyawa tune kaa, ka hape ame la itre feet hne së hna kuca, tre, ka amadrinë Akötresie?