Mekene 20

Hapeu, Ka Ithepe Mekene Ta Kö Eö?

HAPEU, atre fe hi eö la ketre atr ka pi tro pala hi a cile pa?— Hanawange la ketre ceitun, kola icilenyi la itre atr; tro pi la ketre e angatre a ukune la itre xan, matre tro angeice a cile pa. Hapeu, öhne fe hë eö la aqane ujë ka tune lai?— Ame ngöne la ketre drai, öhne jë hi la Atre Hamë Ini Ka Sisitria la itre thupëtresij a thele thatraqai angatre la itre göhnë ka mama. Matre tha madrine pi kö nyidrë. Tro sa pane ce wange la ewekë cili.

Hna könë Iesu troa xeni thene la ketre Faresaio, ene la ketre hene ne hmi ka tru. Traqa ju hi nyidrëti e cili, nge öhne ju hi nyidrë la kola ithepene la itre göhnë ka mama hnene la itre atr hna könën. Nyidrëti pë hë a edromë jë koi angatr. Hapeu, ajane kö eö kö troa drenge la edromë i nyidrë?—

 Hnei Iesu hna qaja ka hape: ‘Maine hna könë eö hnene la ketre atr kowe la faipoipo, the lapane kö la göhnë ka sisitria.’ Atre fe hi eö la kepine matre qaja jë Iesu la trenge ewekë celë?— Öni nyidrë, wanga hna könëne ju fe la ketre atr ka sisitria catr. Tune la hna amamane ngöne cahu iatr, hnene la atre ihë hna amejëne cahu atr ka lapane la göhnë ka mama, me hape: ‘Nue pi la göhnë thatraqane la atre celë, nge tro jë eö a lapa e koilo.’ Matre, tro jë kö lai a madrine la atr hna amejën?— Ohea. Tro angeice lai a hmahma pine laka hna amejë angeic qëmekene la nöjei atr troa lapa ngöne la ketre göhnë menu pe hi.

Iesu a amamane hnyawa koi së laka, tha ka loi kö e troa ajane la ketre göhnë ka mama. Haawe, öni nyidrëti ka hape: ‘Maine kola könë eö kowe la faipoipo, tro jë eö a xome la göhnë ka co; ke tro ha traqa troa wai eö hnene la atre ikönë, me qaja koi eö ka hape, “Sinenge fe, trojë kowe la maca ne lapa.” Ame hë e cili, ase hë atrunyi eö qëmekene la nöjei atr, ke eö a troa lapane la ketre göhnë ka tru.’—Luka 14:1, 7-11.

Hapeu, trotrohnine hë eö la ini hnei Iesu hna hamëne jëne la edromë celë?— Tro sa pane xome la ketre ceitun. Maine të jë hi eö hnine la ketre kar ka tiqa hnyawa, hapeu, tro kö eö a thipatrëne la itre qatr me ithepe göhnë me angatr?— Hapeu, tro jë kö Iesu a madrine la eö a ujë tune lai?—

Öni itre xan, ka hape, tha Iesu fe kö a hane semesine së. Ame jë la mekuna i eö, ke, nyipici kö lai?— Mekune hi eö lo nyidrëti a xeni thene lo atre Faresaio, öhne hnyawa hi nyidrëti la itre atr a isa ië göhnen. E tro eö a mekun, ke, nyidrëti fe kö a hane wange hnyawa la aqane ujë së enehila?— Eje hi, Iesu hë enehila e hnengödrai, nge maca hnyawa tro nyidrëti a goeë së qa koho.

 Tru hnei jole ka xulu qa ngöne la hna ithepe göhnë. Qa ngöne laka tha madrine kö itre xan, fetra jë hi la itre ikucany. Mama ju hi la ewekë cili lo itre nekönatr a iwaja troa ti babikar. Nyudrene hi a cile treqene matre thawa pi la qëhnelö, matre elë jë troa ithepe göhnë. Nyudreni a iwaja kowe la itre göhnë hmekune la itre mamalama. Nemene ju hë la pune lai?— Traqa pi hi koi iwesitrë.

Pëkö thangane ka loi hna kapa qa ngöne la hna ithepe göhnë. Mekune ju hi eö lo jole ka traqa kowe lo itre aposetolo i Iesu. Hne së lo hna inine ngöne lo Mekene 6, laka hnei angatre hna ikelikelë ne troa ithepe ka tru. Matre, nemene ju hë lo hnei Iesu hna kuca?— Hnei nyidrëti lo hna ameköti angatr. Ngo tha qea hmaca ju kö nge fetra hmaca jë hi la itine ka ngazo cili thei angatr. Tro sa ce wange la kepine matre fetra hmaca jë la itine cili thei angatr.

Iesu me angaposetolo i nyidrë me itre xa atr ju kö a tro tixenuë Ierusalema eë. Ene pe, ithanatane ju nyidrë  me angatre la Baselaia. Ngazo pe, Iakobo hë me Ioane a goeëne la lue göhnë ka sisitria ezi Iesu ngöne la hna nyi joxu elany. Goi qaja fe nyidro la mekune cili koi Salome, thine i nyidro. (Mataio 27:56; Mareko 15:40) Celë hi matre, ame hë e kuhu gojeny, easenyi Iesu jë hi hnei Salome, me sa watingöne ca qëmeke i nyidrë göi troa sipone la ketre edrö ka tru.

Öni Iesu, ka hape, “Nemene la aja i nyipo ?” Aja i eahlo tro Iesu elanyi a nue kowe la lue nekö i eahlo trahmanyi troa lapane la götrane maca me mi ngöne la Baselaia i nyidrë. Ngo drei mejene jë hi lo ala treen la aqane ujë i Iakobo me Ioane, lo nyidroti a upe la thine i nyidro troa sipo. Ame koi eö, nemene ju hë la aqane ujë i angatr?—

Wesitre catre angatr koi Iakobo me Ioane. Haawe, Iesu a hamëne ju koi angatre la ketre ihaji ka loi. Öni nyidrëti ka hape, ame la itre tane la nöjei ethen, tre, pi tro angatr a mama. Ketre, angatr a ithepene la itre göhnë ka  mama, ame jë la mekune i angatr, ke, matre tro la itre atr a drenge thenge angatr. Ngo hnei Iesu hna qaja hnyawa kowe la itretre drei nyidrë, ka hape, tha tro pi kö angatr a ujë tune lai. Loi pe, öni nyidrë ka hape, “ame la ate ajane troa tru thei nyipunie, te, tro angeic’ a huliwa i nyipunie.” Öhne fe hi eö lai!—Mataio 20:20-28.

Atre fe hi eö la hnëqa ne la ketre hlu?— Angeic a huliwa koi itre xan; tha angeice kö a thele troa nyi hlue i angeic. Angeice pe hi a lapane la itre mi ne göhnë. Angeic a ujë tune la aminatr, ene la atr ka ipië. Haawe, mekune pala kö së lo hnei Iesu hna qaja, kola hape, maine kola ajane hnene la ketre atr troa tro pa, loi e tro angeic a ujë kowe la itre xa atr ceitu me hlu.

Nemene la aliene koi së la trenge ewekë cili?— Hapeu, tro kö la hlue a iwesitrë pi göhnë memine la maseta i angeic? Maine tro pena a ithepe ka troa xeni pa? Tune kaa la mekuna i eö?— Hnei Iesu lo hna qaja ka hape, hnëqa ne la hlue troa amë panëne la itre aja ne la maseta i angeic, nge pine ju pë hë la itre aja i angeic.—Luka 17:7-10.

Pine laka tha ka loi kö e troa ithepe tro pa, haawe, nemene hë la nyine tro sa kuca?— Loi e tro sa ujë kowe la itre xan ceitu me itre hlu. Kolo lai a hape, loi e tro sa amë panëne la itre aja ne la itre xan, nge pi së ju pë hë. Ketre, loi e tro sa goeë angatr ceitu me itre atr ka tru hu së. Atre fe hi eö la itre xa aqane tro eö a amë panëne la itre aja ne la itre xa atr?— Hanawange la itre xa ceitun ngöne la itre götrane 40 me 41.

The thëthëhmine kö eö laka, hnene pala hi la Atre Hamë Ka Sisitria hna nyi hluene la itre xan, me amë panëne la itre aja i angatr. Hanawange la ketre ceitun, ame ngöne lo jidri tixenuë i Iesu, hnei nyidrëti hna sa watingöne ca qëmekene la itre aposetolo i nyidrë, me hnea la itre lue ca i angatr. Haawe, maine tro fe sa nyi hluene la itre xan, me amë panëne la itre aja i angatr, tro hë sa amadrinëne la hni ne la Atre Hamë Ini Ka Sisitria memine la Tretretro i nyidrë, ene Iehova Akötresie.

E jë fe la itre xötre celë ne la Tusi Hmitrötr ka upi së troa amë panëne la itre aja ne la itre xan: Luka 9:48; Roma 12:3; me Filipi 2:3, 4.

[Iatr ne la götran 107]

Hapeu, öhne fe hë eö la ketre atr a ithepe tro pa?

[Iatr ne la götran 109]

Nemene la ini hnei Iesu hna hamëne lo nyidrëti a qaja la itre atr ka ajane troa lapane la itre göhnë ka mama?

[Iatr ne la götran 110]

Nemene la edrö hnei Salome hna sipone koi Iesu, nge nemene ju hë la ewekë ka traqa e thupen?