Mekene 21

Hapeu, Ka Loi Kö La Atr Ka Sipu Selë Angeice Kö?

ATRE fe hi eö la aliene la hnëewekë hna hape, selën?— Hanawange la ketre ceitun. Hapeu, hnei eö fe kö hna hane kuca la ketre ewekë, tha hnei eö kö hna atreine hnyawa? Maine feni balo pena, maine iwaja. Önine ju hi la ketre nekönatre ka goeë eö ka hape, “Waea, ka pë hnënyengöne eö, ka nyenyape catre kö ni hui eö”!— Hane hi lai pengöne la atr ka sipu selë angeice kö.

Hapeu, madrine kö eö la kola qaja tune koi eö hnene la itre atr?— Nge tune kaa ju fe hë la mekuna i angatr, e tro eö a ketre sipu selë eö kö?— Hapeu, ka loi kö e troa qaja kowe la ketre atr, ka hape: “Loi ju kö ni hui eö?”— Aja i Iehova kö la itre atr ka sipu selë angatre kö?—

Atre fe hi hnene la Atre Hamë Ini Ka Sisitria la itre atr ka sipu selë angatre kö. Angatr a selë angatre kö me wajahuje la itre xan. Ame ngöne la ketre drai, Iesu pë hë a qaja jë koi angatre la ketre edromë, nyine amamane la engazone la aqane ujë i angatr. Tro sa ce dreng.

Kola qaja la pengöne la ketre Faresaio memine la ketre telona. Ame la itre Faresaio, tre, itre hene hmi ka sipu selëne ka hape, itre ka meköt me ka hmitrötr angatre hui itre xan. Hnei Iesu hna qaja la pengöne lo Faresaio; angeice a lö hnine la ēnē e Ierusalema troa thithi koi Akötresie.

Traqa ju fe hi la ketre telona troa hane thithi hnine la ēnē. Nyimutre la itre atr ka methinëne la itre telona, pine laka ame koi angatr, itre atrekënö la itre atr cili. Nge nyipici laka, nyimutre thene la itre telona la itre atr ka huliwa thoi.

 Ame e hnine la ēnē, kola thithi koi Akötresie hnene la Faresaio ka hape: ‘Akötesieti fe, ini a ole koi cilie qa ngöne laka tha ketre atr ka ngazo kö ni. Tha eni kö a ënö, nge pëkö ewekë ka ngazo hnenge hna kuca. Tha ceitunge kö memine koilo telona, ngo ketre atr ka meköti ni. Alua tha xeni ni ngöne la wik, matre hetre ijine koi ni troa meku cilie. Ketre, eni a hamëne la itre hnaaluepi ne la itre ewekë hnenge hna hetreny.’ Ame la Faresaio celë, angeice a mekune ka hape, sisitria catre kö angeice hune la itre xan, mekuna i eö fe hi lai?— Pëkö ca hni ne hmahma i angeice troa qaja la itre ewekë cili koi Akötresie.

Ketre pengöne catre kö la aqane ujë ne la telona hune lai Faresaio. Ame la angeice a thith, tha hane fe kö angeice gala hnengödrai eë. Ngo angeice pe hi a cil acony, me ietrane la itre ngazo i angeic, me xexe la imano i angeic. Tha hnei angeice pi kö hna selë angeic koi Akötresie. Ngo öni angeice pe: ‘Akötresieti fe, epi nuetrije pi cilie la itre ngazong.’

Ame koi eö, drei e nyidro la ka amadrinë Akötresie? Hapeu, kolo Faresaio, ene lo ka sipu selëne me nyi ka loi? Maine angeice pena lo telona, lo atre ietrane fë la itre ngazo i angeic?—

Hnei Iesu hna qaja ka hape, kolo telona la atre amadrinë Akötresie. Pine nemene lai? Öni Iesu ka hape: ‘Ke tro ha acone la atre atrunyi angeice kö, nge tro ha atrune la atre aconyi angeice kö.’—Luka 18:9-14.

Nemene la ini hnei Iesu hna hamëne jëne la edromë celë?— Kola hape, atr ka ngazo la ka sipu selë angeice kö. Ngacama tha hne së kö hna qaja, ngo tro hi a mama la pengö së hnei aqane ujë së. Hapeu,  hnei eö fe hë hna hane selë eö kö?— Tro sa ce wange la tulu i Peteru aposetolo.

Hnei Iesu hna thuemacane la itre aposetolo i nyidrë, laka, tro angatre a nuetriji nyidrë, e traqa pi troa othi nyidrë; ngo öni Peteru jë hi: ‘Maine tro angatr asë a nuetriji enëtilai, ame ni, tha tro jë kö ni a nuetriji enëtilai!’ Ngo gufa ju kö la ithanata i Peteru, pine laka hnei angeice hna nuetriji Iesu hnyawa. Ngo tune la tro sa ce wange ngöne la Mekene 30, tro kö angeice a bëeke hmaca koi Iesu.—Mataio 26:31-33.

Tro së enehila a ce wange la ketre ceitun. Ame la kola hamëne la ketre qâ nyine itupathin ngöne la uma ne ini eö, atre asë hi eö la itre mekune nyine troa sa, ngo thatreine ju pe hi la ketre sine ini eö. Nyipici, tro lai a tru la madrine i eö. Ngo e selëne hë eö ka hape, tru kö la hnei eö hna atre hui angeic, ke, hapeu ka loi kö la aqane ujë cili?— Tro kö eö a waja huje la sine ini eö, matre tro eö a draië hui angeic?—

Celë hi lo aqane ujë ne lo Faresaio lai. Hnei angeice hna sëlë angeice kö me nyi ka loi hune la telona. Ngo hnene la Atre Hamë Ini Ka Sisitria hna qaja ka hape, ngazo la aqane ujë ne la Faresaio. Maine atreine ju hë së kuca la ketre ewekë hune la ketre atr, ngo tha tro pi kö sa mekune ka hape, ka sisitria catre kö së hui angeic.

Haawe, maine tru catre kö la hnei eö hna atre hune la sine ini eö, ke, tro kö eö lai a thele troa selë eö kö?— Pane mekune ju ka hape, drei la atre xup la atuat së, isa hne së kö?— Ohea, Akötresieti la Atre hamë së. Nge ame la nöjei ewekë hne së hna atre, tre, itre hna ini së lai. Maine jë hne së hna inine qa hnine la ketre itus, maine hna qaja pena koi së hnene la ketre atr. Nge maine hne së ju hë hna sipu trotrohnine la ketre ewekë, hnei nemen matre atreine jë së?— Eje hi, hnene la atuat hna hamë së hnei Akötresie.

E öhne hi eö ka hape, jole kowe la ketre atr troa kuca la ewekë, hnauëne kö laka tha ithuecatre kö koi angeic? Qaja ju koi angeice ka hape,  lolo la huliwa i angeic, nge xatua angeice jë matre lolo catre pi. Hapeu, aja i eö fe kö troa hane xatua eö tune lai hnene la itre atr?—

Tru catre kö la trenge catre i itre xan hui itre xan. Hapeu e eö ju lai ka tru trenge catren hune la itre trejine me eö, tro kö eö lai a ketre sipu selë eö?— Ohea. Kola hetre trenge catre së qa ngöne la hne së hna xen. Ngo hnei drei hna axulune la jö me mani memine la nöjei ewekë asë, matre hetre nyine tro sa xen? Akötresie!— Qa ngöne lai, nyipi ewekë tro sa olene koi Akötresie, Atre hamë së la trenge catr.—Ite Huliwa 14:16, 17.

Öhne fe hi eö lo laka, xele catre së ma drenge la atr ka sipu selën?— Celë hi matre mekune hnyawa kö eö lo hna qaja hnene la Atre Hamë Ini Ka Sisitria; öni nyidrëti lo: ‘Ame la hnei nyipunieti hna ajane troa kuca koi nyipunie hnene la itre atr, kuca tune ju fe lai koi angatr.’ Maine tro sa ujë tune lai, tro hë sa thigaje qa ngöne lo aqane ujë ne lo Faresaio ka selë angeice kö.—Luka 6:31.

Ame ngöne la ketre drai, hna hë Iesu hnene la ketre atr, ka hape, atre ini ka loi. Ngo hapeu, hnei nyidrëti kö hna sa, ka hape, ‘Eje hi, atre ka loi ni’?— Ohea.  Öni nyidrëti pe koi angeic: “Pëkö ka loi, ngo Akötesie casi hi.” (Mareko 10:18) Ngacama ka pexeje la Atre Hamë Ini Ka Sisitria, ngo tha hnei nyidrëti pi kö hna sipu selë nyidrë. Hnei nyidrëti pe hna atrune pala hi la Tretretro i nyidrë, ene Iehova.

Haawe, drei la nyine tro sa selën?— Iehova Akötresie hmekuje hi ke Nyidrëti la Atre Xupe la nöjei ewekë asë. Ame la easa goeëne la kola lö la jö, maine nöjei ewekë asë hna xup ka mingöming, ijije hi tro sa qaja ka hape, ‘Iehova Akötresi së la Atre Xupe la itre ewekë celë!’ Epi tro së enehila a catre qaja atrune pala hi la itre ewekë ka lolo hna kuca hnei Iehova, tune mina fe la itre ewekë nyine tro hmaca kö Nyidrëti a kuca.

E jë la itre xötre celë ka qaja la pengöne la atr ka selë angeice kö, nge ka amamane fe la aqane tro sa thipetrije la aqane ujë ka ngazo cili: Ite Edomë 16:5, 18; Ieremia 9:23, 24; 1 Korinito 4:7; me 13:4.

[Iatr ne la götran 113]

Pine nemene matre ka loi koi Akötresieti la telona, hune la Faresaio?

[Iatr ne la götran 115]

Hapeu, sisitria kö eö hune la ketre atr, pine laka tru la hnei eö hna atrein hui angeic?

[Iatr ne la götran 115]

Pine nemene matre tha tro kö sa selëne e tru ju la trengecatre së hui itre xan?

[Iatr ne la götran 116]

Kola qaja atrunyi drei hnene la nekönatre celë?