Mekene 46

Hapeu, Tro Hmaca Kö a Traqa La Iwë Tune Ekö?

HAPEU, hnei eö fe hë hna hane drenge la ketre atr a qaja ka hape, tro ha nyipune la fen?— Ala nyimu la itre atr enehila ka ithanatane la pengöne cili. Angatr a mekune ka hape, tro la ketre boob a apatrene trije la ihnadro. Ngo hapeu, tro kö Akötresieti a apatrene elanyi la ihnadro ka mingöming, memine la itre wëtresij ka hudrume lolo?—

Tune lo aqane ce wange së, Tusi Hmitrötre fe hi a qaja la pune la fene hnengödrai, me hape, “kola pate la fene hnengödrai.” (1 Ioane 2:17) Matre, nemene la hnei eö hna mekun, ame la kola qaja ka hape, troa patre la fene hnengödrai, tre, kolo kö lai a qaja ka hape, troa patre la ihnadro?— Ohea, Tusi Hmitrötre  pe a amamane ka hape ame laka xupe jë Akötresieti la ihnadro, tre “mate lapan;” haawe, tro la itre atr a lapane ej, me mele madrin. (Isaia 45:18) Kolo fe a qaja ngöne Salamo 37:29 ka hape: “Tro ha la ange ka meköti a hetenyi la nöj, me lapa palua kö ngön’ ej.” Ketre, öni Tusi Hmitrötre hmaca jë, tro ha cile huti epine palua la ihnadro.—Salamo 104:5; Ate Cainöj 1:4.

Ngo maine tha ihnadro kö la ka troa patr, ke nemene hö la hna troa apatren?— Troa xatua së troa sa la hnyinge celë, e hne së hna pane sine thele la itre ewekë ka traqa ekö ngöne lo hneijine i Noa. Kola qaja hnene la Tusi Hmitrötre ka hape: “Hna apatene la fene hnengödrai ka hekö hnene la iwë.”—2 Peteru 3:6.

Hapeu, hetre itre atr ka mele pe kö thupene la Iwë ngöne lo hneijine i Noa?— Kola qaja hnene la Tusi Hmitrötre ka hape, hnei Akötresieti “hna amele Noa, nge ala luengemene fe, ate cainöjëne la thina ka meköt nge kola axulune la iwë kowe la fene hnengödrai ka ngazo.”—2 Peteru 2:5.

Haawe, ame lo fene hna apatrene ngöne lo hneijine i Noa, ke, kola qaja la ihnadro maine itre atr ka ngazo?— Tusi Hmitrötre a qaja hnyawa ka hape, kolo “fene hnengödrai ka ngazo,” ene lo itre atr ka kuca la ngazo. Nyiso hi lo a ase ce wange la pengö i Noa, ketre “ate cainöj” nyidrë. Matre, nemene jë la hnei nyidrëti hna cainöjën?— Hnei Noa hna thuemacane la itre atr, laka, tro ha apatrene la “fene hnengödrai ka hekö.”

Hnei Iesu fe hna qeje pengöne kowe la itretre drei nyidrë la Iwë cili, ngo hnei nyidrëti hna wangatrune la aqane ujë ne la itre atr ne la hneijine cili qëmekene troa traqa la pun. Öni nyidrëti koi angatr, ka hape: “Ngöne la ijine pate pete kö la iwë, [itre atr] a lapa xen, me ij, me faipoipo, me ihamë föeë, uti hë ngöne la drai hnei Noa hna lö hnine la aka, nge tha ’te [“tha nyipi ewekëne,” MN] kö angate uti hë traqa ha la iwë, me cengöne thei angat’ asë pi.” Thupene lai, öni Iesu jë fe hi ka hape, tro fe  sa hane öhne la itre aqane ujë cili qëmekene troa apatrene la fene celë.—Mataio 24:37-39.

Kola amamane hnyawa hnene la trenge ewekë i Iesu, laka, loi e tro sa xomi ini qa ngöne la aqane ujë ne la itre atr ngöne lo hneijine i Noa. Pane xome hmaca jë la Mekene 10 ne la itusi celë. Mekune hi eö lo aqane ujëne lo itre atr ekö?— Hnene lo itre xan e angatr hna isi me kuca la itre ewekë nyine akötrë itre xan. Nge öni Iesu jë fe, alanyim la angetre xele ma drenge la itre maca qaathei Akötresie hna tro fë hnei Noa.

Nge ame ju hi la ketre drai, öni Iehova jë hi koi Noa ka hape, tro Nyidrëti a axulune la iwë matre troa apatrene asë la nöjei atr ka ngazo. Tro ha di asë la ihnadro uti fe hë la sasaithe la hene la itre wetr. Hnei Nyidrëti mina fe hna upi Noa troa cane la ketre aka, ketre ikesi atraqatre ka tune la hna amamane ngöne la iatr ngöne la götrane 238.

Eje hi laka tha aka ka co kö la hna upi Noa troa can, ke tro eje a nyi göhne i Noa me hnepe lapa i nyidrë, memine fe la itre öni ka nyimutre. Tru la huliwa i Noa memine la hnepe lapa i nyidrë. Hnei angatre hna sa sinöe, me qane troa cane la aka. Nyimu macatre ne cane angatre la aka cili ka tru catr.

Atre fe hi eö lo ketre huliwa hnei Noa hna kuca?— Hnei nyidrëti hna cainöj, me thuemacane la itre atr laka, easenyi hë troa traqa la Iwë. Hapeu, hnei angatre kö hna drei nyidrë? Pëkö ca atr ka drei nyidrë, kolo hmekuje hi la hnepe lapa i Noa. Nyimu ewekë ka ajolëne la itre atr cili. Mekune hi eö lo hnei Iesu hna qaja, göne lo itre hna kuca hnei angatr?— Angatr a xeni me iji me ihamë föeë. Ame koi angatr, tre tha itre atr ka ngazo kö angatr, celë hi matre, tha pi tro kö angatr a drei Noa. Ngo tro sa ce wange la ewekë ka traqa koi angatr.

Thupene jë hi la hna lö hnei Noa memine la hnepe lapa i nyidrë hnine la aka, Iehova hi lai a thinge ju la qëhnelö. Ame lo itre atr e kuhu trön, tha mekune pi kö angatre ka hape easenyi hë la iwë. Sesëkötre ju hi angatre la kola nyiqaane trotro la mani. Tha hna hane fe kö mani  tune lai ekö. Tha hmitre kö nge kolo ha nyiqaane di asë. Kola kei la itre sinöe, me uligötre la itre etë ka tru. Nge tune kaa pë hë lo itre atr e kuhu tröne la aka?— Öni Iesu ka hape: “Traqa ha la iwë, me cengöne thei angat’ asë pi.” Meci asë hë la itre atr cili. Pine nemen?— Iesu a qaja ju la kepine me hape, “tha ’te kö angat,” ke tha drei Noa kö hnei angatr!—Mataio 24:39; Genese 6:5-7.

The tro kö eö a thëthëhmine laka, ame koi Iesu, tro lo itre ewekë ka traqa a hamë ini koi së enehila. Nemene la ini cili?— Ame laka apatrenyi angatre pi hnei Akötresie, tre, pine la itre thiina ka ngazo hnei angatre hna kuca. Ngo hnene mina fe laka pëkö ijine hnei angatre hna xom matre troa nyipi ewekë Akötresie me wangatrune la itre ewekë hnei Nyidrëti hna troa aeatrën. Tha tulu kö lai nyine tro sa xötrethenge, tune kaa la mekuna i eö?—

Ame la hnei eö hna mekun, ke tro hmaca kö Akötresieti elanyi a hane apatrene la fen hnene la ketre Iwë?— Ohea, ase hë Nyidrëti lo sisiny ka hape, tha tro hmaca kö Nyidrëti a axulune la iwë. Öni Nyidrëti ka hape: “Tro ni a amë la lewenenge ngöne la iaw, celë hi hatene la isisinyikeunge memine la fene hnengödrai.” Haawe, ame la lewen, celë hi hatrene laka “tha tro hmaca kö la iwë a angazone la nöjei ka mel’ asë.”—Genese 9:11-17.

Eje hi laka, tha tro hmaca kö Akötresieti a apatrene la fene hnengödrai hnene la ketre iwë. Ngo ase hë thuemacanyi së hnene la Tusi Hmitrötre laka, troa apatrene la fene celë. Haawe, e apatrene pi Akötresie la fene celë, drei la itre hnei  Nyidrëti hna troa amelene pe?— Hapeu, tro fe kö Nyidrëti elanyi a hane amelene la itre atr ka mele koi angatre kö, ngo tha thele pe troa atrepengöi Nyidrë? Nge ame ange ka tha xomi ijine kö troa inine la Tusi Hmitrötr, tro fe kö Akötresieti elanyi lai a hane amele angatr? Tune kaa la mekuna i eö?—

Aja së asë hi tro Akötresieti elanyi a hane amele së, tune kaa la mekuna i eö?— Hapeu, tha ewekë ka mingöminge kö lai koi së, e amelene jë Akötresieti la hnepe lapa së asë, tune lo hna kuca koi Noa me hnepe lapa i nyidrë?— Celë hi matre ka nyipi ewekë catre tro sa trotrohnine hnyawa la aqane tro Akötresieti a apatrene la fene celë, me nyihnane eje hnene la fene ka hnyipixe me ka meköt.

Tusi Hmitrötr a qeje pengöne la ewekë cili ngöne la tusi Daniela mekene 2 xötre 44. Kolo hi a qaja la hnedrai së, me hape: “Ngöne la ite drai ne la ite joxu cili tro Akötesieti ne hnengödrai a axulune la kete baselaia [maine: mus] ka tha tro kö a apaten’ epine palua ; nge tha tro kö a nue la baselaia cili kowe la ite xa nöj, tro ej’ a lep’ anyilanyilane me apatene la nöjei baselaia asëjëihë cili, nge tro ej’ a cile hut’ epine palua.”

Hapeu, trotrohnine hnyawa kö eö la aliene la xötre celë?— Tusi Hmitrötre hi lai a qaja la aqane tro la mus i Akötresie a lep apatrene elanyi la nöjei musi ne fen. Pine nemen?— Pine laka tha hnene kö la itre musi cili hna drengethenge la Joxu hna acile hnei Akötresie. Kola qeje drei lai?— Iesu Keriso.

Iehova hmekuje hi la ka ijij troa iëne la musi ka troa amekötine la ihnadro, nge Hupuna i Nyidrë ene Iesu, la Joxu hnei Nyidrëti hna iën. Easenyi catre hë la ijine tro Iesu Keriso a lepe apatrene asë la nöjei musi ne la fene celë. Hna qaja lai ngöne la tus i Hna Amamane mekene 19, xötre 11 koi 16, tune la aqane mama e cahu ngöne iatr. Tusi Hmitrötr a hëne la isi Akötresie ka troa lepe apatrene la nöjei musi ne la fen, ka hape, Amagedo.

Akötresieti enehila a thuemacanyi së ka hape, tro Nyidrëti a apatrene la nöjei musi asë hna acile hnei atr. Ngo tro fe kö Nyidrëti elanyi lai  a hane upi së troa hane lö hnine la isi cili?— Ohea, ke öni Tusi Hmitrötr, ame Amagedo, tre, celë hi “ishi ngöne la drai atraqate i Akötesie kapucatinasë.” (Hna Amamane 16:14, 16) Haawe, isi Akötresie la Amagedo, nge Iesu Keriso la tane isi hnei Nyidrëti hna upe qa koho hnengödrai. Hapeu, calemi catre hë la isi Amagedo? Tro sa pane ce wange la mekune celë.

Hane cahu itre xötre nyine e ka amamane la aqane tro Akötresieti a lepe apatrene la itre atr ka ngazo, me amelene pe la itre atr ka nyi hlue i Nyidrë: Ite Edomë 2:21, 22; Isaia 26:20, 21; Ieremia 25:31-33; me Mataio 24:21, 22.

[Iatr ne la götran 238]

Nemene la pengöne la fene hna apatrene ngöne lo ijine i Noa?

[Iatr ne la götran 241]

Pine nemene matre tha tro pi kö a tru koi së la itre elo me itre nyine iamadrinë?

[Iatr ne la götran 243]

Tro Iesu Keriso, lo Joxu hna acile hnei Akötresie a lepe apatrene la fene celë e Amagedo