Mekene 4

Hetre Ëje i Akötresie

AME la easa xötrei iöhnyi memine la ketre atr, nemene la pane ewekë hne së hna hnyingëne koi angeic?— Ene la ëje i angeic. Isa hetre ëje së asë hi. Hnei Akötresieti hna ati ëjene fe lo pane atr ekö. Adamu la trahmany, nge Eva la föi angeic.

Ngo tha itre atr casi kö la ka hetre ëjen. Maine troa hamëne koi eö la ketre droli maine ketre öni pena, hapeu tha tro kö eö lai a canga ati ëjen?— Eje hi, kola mama hnyawa e celë laka, nyipi ewekë catre troa isa hetre ëj.

Pane goeëne jë caha itre fini wëtresiji e jidr. Hapeue la mekuna i eö, isa hetre ëjene fe kö itre ej?— Eje hi, ka isa hetre ëjene la itre wëtresiji asë qaathei Akötresie. Öni Tusi Hmitrötr ka hape: “Nyidëti a e la ite wëtesij, me ati ëjen’ asë it’ ej.”—Salamo 147:4.

Drei la atr ka sisitria ne la hnengödrai me fen?— Akötresieti hmekuje hi. Hapeue la mekuna i eö, hetre ëje i Nyidrëti fe kö?— Tha sihngödri kö koi Iesu laka, hetre ëje i Akötresie. Hnei Iesu hna thithi koi Akötresie me hape: ‘Hnenge hna amamane kowe la itretre drei ni la atresiwa i cilie.’ (Ioane 17:26) Atre fe hi eö la ëje i Akötresie?— Akötresieti kö la ka sipu amamane koi së la ëje i Nyidrë. Öni Nyidrë: “Iehova ni, celë hi ëjeng.” Haawe, ame la ëje i Akötresie, tre, IEHOVA.—Isaia 42:8.

Madrine kö eö la kola hëne la ëje i eö?— Eje hi, tro hë eö lai a madrin, ke, tha thëthëhmine kö la ëje i eö. Ame la aja i Iehova, tre, tro fe la itre atr a hane atre la ëje i Nyidrë. Celë hi matre loi e tro sa xome la ëje i Iehova ngöne la easa qeje Akötresie kowe la itre atr. Celë hi hna kuca hnene la Atre Hamë Ini Ka Sisitria ngöne la nyidrëti a ithanata memine la itre atr. Ame ngöne la ketre ijin, hnei Iesu hna qaja ka hape: “Qâ i ’ö troa aja Iehova Akötesi ’ö hnene la hni ’ö ka pexej.”—Mareko 12:30.

 Atre hnyawa hi Iesu laka ka nyipi ewekë catre la ëje i “Iehova.” Celë hi matre hnei nyidrëti hna upe la itretre drei nyidrë troa qaja pala hi la ëje i Akötresie. Hnei nyidrëti mina fe hna upi angatre troa qaja la ëje i Akötresie ngöne la angatr a thith. Tha sihngödri kö koi Iesu laka ame la aja i Akötresie, tre, ene la troa atre hnei nöjei atr asë la ëje i Nyidrë, ene Iehova.

Hnei Akötresieti hë ekö hna amamane koi Mose, atre Isaraela, la enyipiewekëne la ëje i Nyidrë. Ame ngöne la ijine cili, angetre Isaraela petre kö e Aigupito, ene lo itre nekö i Isaraela. Hna thahluë angatre hnene la angetre Aigupito. Ame ngöne la ketre ijin, hnei Mose hna nyi xölene la ketre thupëtresiji ne la nöje i angeic. Drenge jë hi Farao joxu ne Aigupito, ene pe elë jë hi la hni nyidrë me thele troa humuthi Mose! Kötre pi hi Mose qa Aigupito.

Hnei Mose hna kötre kowe la ketre nöj, hna hëne ka hape, Madiana. Hnei angeice hna faipoipo me hiane e cili la itre nekö i angeic. Ketre, ame la huliwa i angeic, tre, troa  thupë mamoe. Ame ngöne la ketre ijine angeice a thupëne la itre mamoe ezine la ketre wetr, e cili, hnei angeice hna öhne la ketre ewekë ka ketre pengön. Kola mele la ketre isinöe ngo tha ae kö! Easenyine jë hi angeice troa wange la ewekë cili.

Atre fe hi eö la ewekë ka traqa?— Kola drenge hnei Mose la ketre aqane ewekë qa ngöne lai isinöe ka mel, nge kola hë angeice ka hape: “Mose! Mose!” Drei lai ka hë angeic?— Akötresie! Nyidrëti a pi upi Mose troa kuca la ketre ewekë. Öni Nyidrëti jë hi koi Mose ka hape: ‘Tro ni a upi ’ö koi Farao, nge qâ i ’ö troa thenge la nöjeng’ itre nekö i Isaraela qa Aigupito.’ Hnei Akötresieti hna thingehnaeane koi Mose laka tro Nyidrëti a xatua angeic.

Ngo öni Mose koi Akötresie ka hape: ‘Maine tro ni a tro kowe la itre nekö i Isaraela, me qaja koi angatre ka hape, hnei Akötresieti hna upi ni koi nyipunie. Nemene la nyine tro ni a kuca e qaja jë angatr ka hape, “Dei la ëje i Nyidë?” Nemene la nyine tro ni a qaja?’ Hnei Akötresieti hna upi Mose troa qaja kowe la itre nekö i Isaraela ka hape: ‘Hnei Iehova hna upi ni koi nyipunie, nge ka epine palua la ëjeng, ene Iehova.’ (Esodo 3:1-15) Kola amamane hnyawa e celë, laka Iehova la ëje i Akötresie. Nge  tha tro jë kö Nyidrëti a saze ëj. Ame la aja i Nyidrë, tre, tro pala hi sa atre epine palua lai ëje i Nyidrë, ene Iehova.

Kola tro pi hnei Mose a tro Aigupito eë, ngo tha drei Iehova kö hnei angetre Aigupito, angatre a wangaconyi Nyidrë. Tha trotrohnine kö angatre laka Nyidrëti hi la Akötresieti ne la fene hnengödrai asëjëihë, ngo tha Akötresi angetre Isaraela hmekuje kö. Celë hi matre Iehova a qaja jë kowe la joxu ne Aigupito ka hape: ‘Eni a troa kuca matre troa hlemu la ëjeng e celë fen asë.’ (Esodo 9:16) Nge celë hi hnei Nyidrëti hna kuca. Atre fe hi eö la hnei Nyidrëti hna kuca?—

Hnei Nyidrëti hna pane xatua Mose troa ea la nöje Isaraela me thepe angatre qa Aigupito. Traqa ha angatre qëmekene la hnagejë ka palulu, Nyidrëti a thawaluëne pi la hnagejë matre thue gojenyi ne la nöje i Nyidrë. Ame la kola tro sasaithe la hnagejë hnene la itre nekö i Isaraela, kolo fe hi a weje huzu hnei Farao me itre soce i nyidrë. Iehova a hnyithe ju la hnagejë, ame hna kaca trane me humuthe asë la itretre Aigupito.

Kola drei mejene e cailo fen me hlemu la hna kuca hnei Iehova ngöne la Hnagejë Ka Palulu. Easa atre tune kaa la ewekë cili?— Traqa ha koi footre lao macatre thupene la ewekë cili, angetre Isaraela a traqa e Kanana, ene lo nöje hnei Iehova hna thingehnaeane troa hamëne koi angatr. Ame  e cili, hna qaja hnene la ketre föe hmae kowe la lue atre Isaraela, ka hape: “Dengë hë huni laka hnei Iehova hna aeane la Hnagejë Ka Palulu thatraqai nyipunie, e tro nyipunie e kolemi qa Aigupito.”—Iosua 2:10.

Ame enehila, nyimutre la itre atr ka ujë tune lo angetre Aigupito ekö. Xele angatre ma kapa ka hape, Iehova hi la Akötresieti ne la fene asë. Qa ngöne lai, Iehova a ajane tro la itre hlue i Nyidrëti a qeje Nyidrë kowe la itre xan. Celë hi ewekë lai hna kuca hnei Iesu ekö. Ame ngöne lo nyidrëti a troa mec, hnei nyidrëti hna thithi me qaja  koi Iehova, ka hape: “Hnenge hna amamane koi angate la atesiwa i cilie.”—Ioane 17:26.

Ajane kö eö troa hane tui Iesu? Qaja jë kowe la itre xa atr ka hape, ame la ëje i Akötresie, tre, Iehova. Maine jë tro eö a öhne laka nyimutre la itre atr ka thatre Nyidrë. Pane amamane jë koi angatre la Salamo 83:18. Maine eö a ajan, tro sa ce e la xötre cili ngöne la Tusi Hmitrötr. Kola qaja ka hape: “Nge tro nöjei ate a ate laka cilieti la Kasisitia hmekuje hune la fene hnengödrai asëjëihë, nge Iehova la atesiwa i cilie.”

Nemene la hna ini së hnene la xötre celë?— Eje hi, kola amamane koi së ka hape, “Iehova” hmekuj la ëje ka sisitria catr. Celë hi ëje ne la Akötresie Kapucatin Asë, Tretretro i Iesu, nge Atre Xupe la nöjei ewekë asë. Nge mekune hnyawa kö lo hna qaja hnei Iesu ka hape, tro sa hnimi Iehova Akötresie hnene la hni së ka pexej. Hnimi Iehova kö hnei eö?—

Nemene la aqane tro sa amamane koi Iehova ka hape, hetre ihnimi së koi Nyidrë?— Loi e tro sa pane thele troa atrepengöi Nyidrë, tune la easa thele troa iatre memine la ketre enehmu. Ketre, tro sa qaja kowe la itre xa atr la ëje i Nyidrë. Ijije hi tro sa amamane mekötine hnine la Tusi Hmitrötr la ëje i Nyidrë. Ijije mina fe tro sa qaja koi angatre la itre ewekë ka tru hnei Nyidrëti hna xupe memine fe la itre hnei Nyidrëti hna kuca nyine loi koi së. Atraqatre la madrine i Iehova e tro sa ujë tune lai, ke, ame la sipu aja i Nyidrë, tre, ene la tro la itre atr a hane atre Nyidrë. Ijije mina fe tro sa hane qeje Nyidrë, tune kaa la mekuna i eö?—

Tha ajane asë kö la itre atr troa drei së a qeje Iehova. Ngacama hna qeje Iehova hnei Iesu lo Atre Hamë Ini Ka Sisitria, ngo nyimutre pe la itre atr ka xele ma drei nyidrë. Ngo tha celë kö lai ka sewe Iesu troa qeje Iehova.

Haawe, loi e tro sa ujë tui Iesu. Catre pi së troa hane qeje Iehova. Nge maine tro sa ujë tune lai, tro hë Nyidrëti a madrine, ke, Nyidrëti a öhne laka easa hnine la ëje i Nyidrë.

E jë la itre xötre celë ka amamane la enyipiewekëne la ëje i Akötresie: Isaia 12:4, 5; Mataio 6:9; Ioane 17:6; me Roma 10:13.

[Iatr ne la götran 27]

Atre fe hi eö laka hetre ëjene asë hi la itre wëtresij?

[Iatr ne la götran 28]

Nemene la ini hnei Mose hna kapa qa ngöne lo isinöe ka palulu?

[Iatr ne la götran 29]

Ame ngöne lo Hnagejë Ka Palulu, nemene la hna kuca hnei Iehova matre hlemu jë la ëje i Nyidrë?

[Iatr ne la götran 30]

Hnei Iesu hna qaja la ëje Iehova.

Atreine fe kö eö amamane la ëje i Akötresie e hnine la Tusi Hmitrötr?