Mekene 35

Hetre Mele Hmaca!

AME la mekuna i eö, ke aja i Akötresieti kö troa amele së hmaca qa hna mec?— Ka xecie hnyawa la ewekë cili koi Iobu, ketre atr ka loi koi Akötresie. Ame hë la Iobu a mekune ka hape, easenyi hë angeice troa mec, öni angeice jë hi koi Akötresie: “Tro cilieti a könieti [hën], nge tro ni a gemie [sa] koi cilie.” Ketre, hnei Iobu mina fe hna qaja ka hape, tro Akötresieti a fetresietin, kola hape, eje thei Nyidrëti la aja ka tru troa amele Iobu hmaca qa hna mec.—Iobu 14:14, 15.

Ka ceitu Iesu kö me Iehova Akötresie lo Tretretro i nyidrë, laka aja i Iesu mina fe troa xatua së. Ame ngöne la kola qaja koi Iesu hnene la ketre lepera, ka hape, ‘Maine aja i cilie, tre, aloine jë la mecing,’ ene pe öni Iesu e sa ka hape: “Ini a ajan.” Ame hnei nyidrëti hna aloine pi la lepera.—Mareko 1:40-42.

Ka tru pala hi la ihnim i Iesu kowe la itre nekönatr, tune la Tretretro i nyidrë. Ame ngöne lo hneijine ekö, hnei Iehova hna amelene hmaca la lue nekönatr. Ame ngöne la pane ijin, hnei Elia, ketre hlue i Nyidrë, hna sipone iele Iehova troa amelene hmaca la neköne la ketre sine föe ka thina ka loi koi Elia, nge hnei Iehova hna kapa. Ame ngöne la hnaluene ijin, hnei  Nyidrëti hna jëne Elisaia, matre troa amelene hmaca la ketre nekönatr trahmany.—1 Ite Joxu 17:17-24; 2 Ite Joxu 4:32-37.

Hapeu, madrine fe kö eö e troa atre laka atraqatre la ihnim i Iehova koi së?— Tha Nyidrëti hmekuje kö a meku së ngöne la easa mel, ngo ngöne mina fe la ijine meci hë së. Hnei Iesu hna qaja ka hape, ngacama meci hë la itre atr hnei Iehova hna hnim, ngo itre ka mele angatre ngöne la mekuna i Nyidrë. (Luka 20:38) Tune la hna qaja hnei Tusi Hmitrötr, ‘thatreine kö troa iananyi së memine la ihnimi Akötresie hnene la mec, me mel, me itre ewekë ka tro ha traqa.’—Roma 8:38, 39.

Hnei Iesu hna amamane ngöne lo nyidrëti e celë fen, laka Iehova a hnehengazone la itre nekönatr. Mekune hi eö lo Iesu a lapaa xomi ijine troa qeje Akötresie koi nyudren. Ngo atre fe hi eö ka hape, hnei Iehova hna hamëne fe koi Iesu la mene matre atreine nyidrë troa amelene hmaca la itre nekönatr qa hna mec?— Tro ni a qaja koi eö la aqane amelene Iesu la nekö i Iairo jajinyi ka 12 lao macatre.

Ame la hnalapa i Iairo me ifënekö i angeic memine la nekö i nyidro jajinyi ka cas, tre ezine la Hneopegejë ne Galilaia. Ame ngöne la ketre drai, tithe ju hi la nekö i angeic hnene la ketre meci ka tru, nge ame koi angeic, ka tro hë nyën a mec. Ame e cili, angeic a meku Iesu, ke hnei angeice hna drenge ka hape, atreine Iesu troa aloine la itre trene mec. Celë hi kepine matre tro ju angeice troa thele nyidrë. Matre, öhnyi Iesu ju hi hnei angeice a kola inine la itre atr ezine la Hneopegejë ne Galilaia.

Iairo pë hë a thele jë troa easenyi Iesu, uti hë la angeice a kei kowe la lue ca i nyidrë. Öni angeice jë hi koi Iesu, ka hape: ‘Kolo ha troa meci la nekönge jajinyi ka co. Epi tro jë cilie troa xatua nyën, eni a sipo cilie.’ Haawe, canga ce tro jë hi Iesu me Iairo. Pine laka ala nyimu fe la itre atr ka traqa troa wange la Atre Hamë Ini Ka Sisitria, ene pe hane jë fe angatre xötrethenge nyidro. Ngo ixelë ju hi angatre e kuhu gojenyi memine la itre xa atr ka traqa qa ngöne la hnalapa i Iairo, öni angatre jë hi e thuemacanyi angeice ka hape: “Meci hë la nekö i nyipëti jajiny, nyine ue troa une ielene kö la Ate ini ?”

 Drenge hi Iesu la hnei angatre hna qaja. Trotrohnine hnyawa hi nyidrëti la akötre i Iairo, pine laka meci hë la nekö i angeice jajinyi ka cas. Qa ngöne lai, öni Iesu koi angeice ka hape: ‘The xou kö, ngo lapaune ju koi Akötresie, nge tro hë la nekö i eö jajinyi a mel.’ Angatr a trongëne jë kö la gojenyi angatre uti hë kowe la hnalapa i Iairo. Ame e cili, kola itreijenyi la itre sinee ne la hnepe lapa. Tru la akötre thei angatr, pine laka meci hë la neköne la sinee i angatr. Ngo Iesu pë hë a qaja jë koi angatre ka hape: ‘The itreijenyi kö; tha meci kö la nekönatr, ngo nyën a meköl.’

Kola hnyimasai Iesu hnene la itre atr, pine laka atre hnyawa hi angatr, laka meci hë la nekö jajiny. Nga hnauëne hö laka qaja jë Iesu ka hape, nyën a meköl?— Atre hi eö la ini hnei nyidrëti hna ajane troa hamëne koi angatr?— Nyidrëti a ajane tro angatre a atre hnyawa laka, ame la atr ka mec tre, ceitune hi memine la atr ka hmulizië. Ketre, nyidrëti a ajane troa amamane fe ka hape, jëne la mene qaathei Akötresie, nyidrëti a troa amelene hmaca la atr ka mec, ceitune me nyidrëti a troa ahlëne la ketre atr qa hna meköl.

Kola upetrön eë la nöjei atr asë hnei Iesu qa hnine la hnalapa, nge lapa ju pe hi lo itretre drei nyidrë ene Peteru me Iakobo me Ioane, memine la keme me thine ne la nekö jajiny. Thupene lai, nyidrëti a easenyi nyën me  xome la iwanakoime i nyën, me hape: ‘Jajinyi fe, cile jë!’ Ame hna canga cile jë la jajiny, me tro. Nge atraqatre la madrine ka eje thene la keme me thin.—Mareko 5:21-24, 35-43; Luka 8:40-42, 49-56.

Pane mekune jë enehila la ewekë celë: Maine atreine hi Iesu troa amelene hmaca la nekö jajinyi celë qa hna mec, nemene la ejolene koi nyidrë e troa amelene la itre xan?— Hapeu, tro hmaca kö nyidrëti a kuca la ewekë cili?— Eje hi. Hnei Iesu lo hna sipu qaja, ka hape: “Calemi hë la ijine tro la nöjei ate ngöne la ite hua [“nyine amekunën,” MN] a denge la aqane ewekë i [eni], me tropi.”—Ioane 5:28, 29.

Hapeu, aja i Iesu kö troa amelene hmaca la itre atr qa hna mec?— Hanawange la ketre ceitune qa hnine la Tusi Hmitrötr, ka troa xatua së troa sa la hnyinge cili. Hetrenyi la ketre ewekë ka traqa e Naina ka amamane la aqane utipine Iesu la itre atr ka akötr ngöne la itre ijine kele wezipo.

Tro fë jë hi la wezipo qa Naina. Neköne ka cas ne la ketre sine föe hna meci trij, lai hna xututh. Atraqatre la hleuhleu me akötre ne la föe, nge kola ce tro me eahlo hnene la ka alanyim, kowe la hna kele wezipo. Eahlo a treije latresi, nge thatreine kö troa aupunyi eahlo.

Ame ngöne la ijine cili, Iesu me itretre drei nyidrë a tro Naina eë. Traqa ju hi angatre ngöne la qanahage ne la traon, nge hanawange kola xututhe la neköne la sine föe. Ame la Iesu a öhne la föe e treije latresi, traqa pi hi la utipine koi nyidrë. Kola ketr la hni nyidrë hnene la trenge akötre ne la föe. Nyidrëti a ajane ju troa xatua eahlo.

Hnei Iesu hna qaja menyikëne koi eahlo, ka hape: “The teije kö.” Sesëkötre ju hi la itre atr, me goeë Iesu. Nyidrëti a easenyine ju la wezipo, nge angatre a isa thel, ka hape, nemene la hnei nyidrëti hna troa kuca. Öni nyidrëti jë hi, ka hape: “Thupëtesiji fe, ini a qaja koi ö, Cilejë.” Lapa jë hi lo ka mec, me nyiqane ewekë.—Luka 7:11-17.

Drei jë kö la mekune ka eje e kuhu hni ne la föe ngöne la ijine cili! Nge nemene fe la mekune ka eje e kuhu hni eö, e amelene hmaca ju la ketre atr hnei eö hna hnim?— Kola amamane hnyawa hnene la edromë celë, la  etrune la ihnim i Iesu kowe la itre atr, me etrune la aja i nyidrë troa xatua angatr, mekuna i eö fe hi lai?— Drei jë kö la madrine së elanyi troa kapa la itre atr hna troa amelene hmaca ngöne la fene ka hnyipixe hnei Akötresieti hna thingehnaean!—2 Peteru 3:13; Hna Amamane 21:3, 4.

Ame la itre atr hna troa amelene hmaca, tre, ene lo itre ka tru me itre nekönatr hne së hna atre. Tro hi së lai a canga wangatrehmekunyi angatr, tui Iairo atre hnyawa hi angeice laka, nekö i angeice hi la hnei Iesu hna amelene hmaca qa hna mec. Ame la itre xa atr, itre hadredr maine itre thauzane lao macatre ne meci hë angatr. Ngacama itre ka mele angatre ekö a nanyi catre hë la itre macatre, ngo tha hna thëthëhmi angatre kö hnei Akötresie.

Madrine fe kö eö, la eö a atre ka hape, sisitria la aqane hnimi së hnei Iehova Akötresie me Iesu Hupuna i Nyidrë?— Atraqatre la aja i nyidro tro sa mel, tha koi itre hnepe macatre ka xoxopatre kö, ngo uti hë epine palua!

Tusi Hmitrötr a qaja koi së la mejiune thatraqane la itre ka mec. E jë la Isaia 25:8; Itre Huliwa 24:15; me 1 Korinito 15:20-22.

[Iatr ne la götran 182]

Hnei Iehova hna amamane tune kaa la ihnim i Nyidrë kowe la itre nekönatr?

[Iatr ne la götran 184]

Nemene la ini hne së hna xome qa ngöne la hnei Iesu hna amelene hmaca lo nekö i Iairo jajinyi qa hna mec?

[Iatr ne la götran 186]

Nemene la hna amamane hnene la mele hmaca ne lo neköne ka cas ne lo sine föe?