Mekene 7

Idrengethenge a Thupë Eö

HAPEU, hetre madrine i eö kö troa kuca la nöjei ewekë hnei eö hna ajan? Hapeu ame e itre xa ijin, ke, tha hmanono kö eö, e troa upe lapa eö? Pane qaja jë koi ni la hnei eö hna mekun.—

Ngo nemene la ewekë ka loi koi eö? Ene la tro eö a trongëne la itre sipu aja i eö, maine pena troa drengethenge la keme me thine i eö?— Hetre sipu kepine matre kola upi eö hnei Akötresie troa drengethenge nyidro. Tro sa pane ce wange la kepine cili.

Ije macatre i eö?— Atre hi eö la macatre ne la keme i eö?— Nge tune kaa thine i eö, me lue qaqa i eö?— Tru catre kö angatre hui eö. Eje hi, ame la ka tru, tre, nyimutre la itre ewekë hnei angeice hna atre. Angeice a dreng me goeëne me kuca la itre ewekë ngöne la nöjei macatre. Haawe, ijije hi tro la itre thöthi a xomi ini qaathene la itre ka tru.

Hapeu, hetre ka co kö hui eö hnei eö hna atre?— Tru catre kö hnei ewekë hnei eö hna atre hui angeic?— Pine nemen?— Pine laka ka tru kö eö hui angeic. Nyimutre catre kö la itre macatre ne mele eö hui angeic, ene pe atre pengöne hnyawa kö eö la itre ewekë hui angeic.

Drei la ka tru hui easë asë?— Iehova Akötresie. Atre hnyawa kö Nyidrë la itre ewekë hu së. Ame la Nyidrëti a upi së troa kuca la ketre ewekë, loi e troa xecie koi së, laka, celë hi ewekë lai ka loi koi së, ngacama jole e troa kuca. Atre fe  kö eö laka, hna traqa ekö la ketre jole ka tru kowe la Atre Hamë Ini Ka Sisitria, celë hi matre tha ewekë ka hmaloi kö koi nyidrë troa drengethenge?—

Ame ngöne la ketre ijin, hnei Akötresieti hna sipo Iesu troa kuca la ketre ewekë ka tha hmaloi kö. Kola mama ngöne cahu iatr, laka hnei Iesu hna thithi fë la ewekë cili. Öni nyidrëti jë hi ka hape: ‘Kakati fe, maine cilieti a ajan, ananyine pi qathenge la jole celë.’ Iesu hi lai a amamane laka, tha ka hmaloi kö e itre xa ijin, troa kuca la aja i Akötresie. Atre fe hi eö la aqane nyipune Iesu la thithi nyidrë?—

Öni nyidrë: ‘Tha thenge kö la ajang, ngo loi pe thenge la aja i cilie.’ (Luka 22:41, 42) Eje hi, ame la aja i Iesu, tro pala hi a tro pa la aja i Akötresie. Ka xecie hnyawa koi nyidrë troa kuca la aja i Akötresie, nge pine ju pë hë la itre mekuna i nyidrë.

Nemene la ini hne së hna kapa qa ngön?— Ene la tro sa kuca pala hi la hnei Akötresieti hna qaja, ngacama hace ju hë. Ngo hetre ketre ini kö hne së hna kapa. Atre fe hi eö la ini cili?— Kola hape, isa kö Akötresieti me Iesu. Ka tru kö Iehova Akötresie nge tru catre kö la hna atre hnei Nyidrë hui Iesu, Hupuna i Nyidrë.

Ame la easa drengethenge Akötresie, tre, easë hi lai a amamane laka, easa hnimi Nyidrë. Öni Tusi Hmitrötre ka hape: “Dei lola aja koi Akötesie, laka eësha denge thenge la ite wathebo i nyidë.” (1 Ioane 5:3) Haawe, nyipi ewekë tro asë hi sa drengethenge Akötresie. Hapeu, aja i eö kö troa hane drengethenge Nyidrë?—

Tro sa ce xome la Tusi Hmitrötre me goeëne la hnei Akötresieti hna thele thene la itre nekönatr. Tro sa ce e la hna qaja ngöne Efeso mekene 6, xötre 1, 2, me 3. Kola hape: “Ange nekönate fe,  denge thenge ju la ite keme me thine i nyipunie thei Joxu ; ke celë hi meköt. ‘Metötëneju la keme me thine i ’ö ;’ celë hi wathebo hnapane ka hete hna thinge hnaeane ngön ; ‘mate manathithi ’ö, me lapa ahoeanyi ju e celë fen.’ ”

Haawe, Iehova Akötresie la ka upi eö troa drengethenge la keme me thine i eö. Kola hapeue la troa “metötë” nyidro? Kola hape, tro eö a wangatrunyi nyidro. Nge Akötresieti a thingehnaeane ka hape, maine tro eö a drengethenge nyidro, tro hë eö a “manathith.”

Tro ni a pane qaja koi eö la pengöne la itre atr hna amelene hnene la hna idrengethenge. Ka mele angatre ekö e Ierusalema, ketre traon atraqatr. Pine laka nyimutre la itre atr ka tha drengethenge Akötresieti kö, Iesu a thuemacanyi angatre ju, laka, tro ha lepe apatrene la traon. Ketre, ame kowe la itre atr ka ajane la thina ka meköt, hnei Iesu hna ahnithe koi angatre la aqane troa amele angatr. Öni nyidrëti ka hape: ‘E öhne hë hnei nyipunie la trongene isi e cile xötreithi Ierusalema, wangatre hmekune ju nyipunie, laka, easenyi hë troa lepe apatrene ej. Haawe, ijine tro ha tro trij e Ierusalema me kötre kowe la itre wetr.’—Luka 21:20-22.

Tune la hna qaja hnei Iesu, hna traqa hnene la trongene isi troa lepe la traon e Ierusalema. Hna cile xötreithe ej hnene la trongene isi angetre Roma. Ngo thatre kö la kepine matre nue Ierusalema hmaca pi hnene la itre soc. Nyimutre la itre atrene la traone ka mekune menune ka hape, ase hë nuamele angatr. Ene pe, lapa xetietë ju angatre e Ierusalema. Ngo nemene lo hnei Iesu hna upi angatre troa kuca?— Maine eö ju e Ierusalema, nemene la hnei eö hna troa kuca?— Ame la itre atr ka mejiune koi Iesu, tre, hnei angatre hna nuetrije la itre uma i angatre me kötre mele kowe la itre wetr.

Ase pi hë la ca macatre ka pexej, nge pëkö ewekë ka traqa e Ierusalema. Tune fe la hnaaluene macatre. Ketre tune mina fe la hnakönin. Nge kola jele hmone hnene la itre ka lapa pe e Ierusalema, lo itre ka kötre mel. Ame ju hi ngöne la hnaafoane macatre, bëeke hmaca jë hi lo trongene isi  angetre Roma, me cile xötreithi Ierusalema. Nge amë hë e cili, pë hmaca kö jëne kötre mel. Traqa ju hi la itre soce ngöne la ijine cili, a lepe la traon. Ala nyimu catre la itre ka mec, nge ame itre thelen, hna akalabusi angatr.

Nge nemene la ewekë ka traqa kowe la itre atr ka drengethenge Iesu?— Mele kö angatr. Pine laka nanyi angatre qa Ierusalema, haawe, pë fe kö ethanyine la isi koi angatr. Mele pë hë angatre hnene la hnei angatre hna drengethenge.

Hapeu, tro kö a hane thupë eö, e hnei eö hna drengethenge?— Maine jë troa wathebone koi eö hnei keme me thine i eö, troa elo e kuhu gojeny. Pine nemene matre nyidroti a qaja tune lai?— Wanga feni eö jë hnei loto. Maine jë ame e itre xa ijin, tro eö a mekune ka hape: ‘Pëkö loto la. Tha tro jë kö a wilë ni, ke, kolo pala hi a elo hnene la itre nekönatre e kuhu gojeny, nge pëkö hna wilën.’

 Hna mekune hi tune lai hnene lo itre atr ne Ierusalema. Ame ju hi la kola tro trij e Ierusalema hnei angetre Roma, mekune menune jë hi hnene la itre xa angetre Iudra ka hape, mele hë angatr. Haawe, pine laka hna lapa hnene la itre xan ngöne la traon, inyitipu jë fe hi hnene la itre xan. Hna thuemacanyi angatre hë, ngo tha hnei angatre kö hna dreng. Ame hë la thangane lai, meci la pune koi angatr.

Tro sa ce xome la ketre ceitun. Hapeu, hnei eö fe hë hna hane elo memine la uke mac?— Maine jë ame koi eö, ke, kösë nyine elone la eë. Ngo hna mecine lai, ke, maine troa mele la uma, tro fe hë eö a hane ce patre memin!

The thëthëhmine kö eö laka, ame la troa drengethenge, tre, tha ngöne hmekuje kö la itre xa hnepe ijine hi. Ngo maine tro pala hi eö a drengethenge, tro hë la aqane ujë cili a thupëne la mele i eö. Nge drei la ka qaja koi eö, ka hape, “Ange nekönate fe, denge thenge ju la ite keme me thine i nyipunie”?— Akötresieti hi. Tro eö a mekune hnyawa laka, Nyidrëti a qaja tune lai, ke, Nyidrëti a hnimi eö.

Ame enehila, e jë cahu itre xötre ka amamane la enyipiewekëne la troa drengethenge: Ite Edomë 23:22; Ate Cainöj 12:13; Isaia 48:17, 18; me Kolose 3:20.

[Iatr ne la götran 42]

Pine nemene matre ka loi e tro eö a drengethenge la itre ka tru?

[Iatr ne la götran 43]

Nemene la ini hne së hna xome qa ngöne la thithi Iesu?

[Iatr ne la götran 45]

Hna amelene tune kaa la itre atr celë hnene la hna drengethenge lo itre hna amekötine hnei Iesu?

[Iatr ne la götran 46]

Pine nemene matre nyipi ewekë tro eö a drengethenge ngacama tha öhne kö eö la ewekë hnamecin?